Silaannaap pissusia nukissarlu

Royal Greenlandip kilisaataatai kilisaatinik nutaanik marlunnik pingaartitat aalajangersaqqitat naapertorlugit ilusilersukkanik 2019-imi ilaneqarput. Tamanna nioqqutissat piareeriikkat tonsi ataasiugaangata nukissamik atuinerup annikillinissaanik naatsorsuuteqarnermik kinguneqarpoq. M/tr Sisimiumi nutaami perlukut aalisakkat orsuisut qajuusiatullu tunisassiaralugit atorluarneqartarput, taamaammat atorluaanerugaluartoq tunisassiarineri nukissamik atuiffiungaatsiartarput. Kilisaammi tassani nukissamik atuineq tamakkiisoq CO₂ -millu aniatitsineq qaffassasoq naatsorsuutigisariaqarparput.

Royal Greenlandip Marine gas uulia (MGO) kilisaatini tamani orsussatut ullumikkut atortarpaa. MGO-p ikuallassaammik annikitsumik (< 0,1%) akoqarnini taamaammallu Heavy Fuel Oilimiit (HFO), tassa ikummatissamit oqimaatsumiit, mingutsitsinikinnerunini iluaqutigaa. MGO aammattaaq ipeqannginneruvoq. Uuliat assiginngitsut pineqartut tamarmik CO₂e-mik aniatitsinerat assigiippoq.

Anguniagaq

Kilisaatit avataasiutit uuliamik ikummatissiamik atuinermikkut Royal Greenlandimi CO₂e-mik aniatitsinermut tamakkiisumut peqqutaanerpaammata kilisaatini CO₂e-mik aniatitsineq annikillisikkumavarput.

Suliffeqarfissuarmi nukissamik atuinerup tamarmi annikillisinnissaa aammattaaq ukkatariumavarput.  Sumiiffinni erngup nukinganik nukissamilluunniit ataavartumik allamik atuiffiusuni maskiinat uuliatortut innaallagiatortunik pisinnaatilluta taarsersornerisigut ikummatissanik nunap iluaneersunik atuinerput annikillisikkumavarput.

2019-imi killiffik

Kilisaatit CO2e-mik silaannarmut aniatitsinerisa naatsorsornerat ikummatissaasivimmiittut atorneqarsimasut naapertorlugit naatsorsorneqarpoq:

• Kilisaatit avataasiortut (kilisaatit raajarniutit aamma aalisagarniutit, ningittagarsortut): Nioqqutissat piareeriikkat tonsi ataasiugaangata CO₂e 1,52  tonsi
• Sinerissap qanittuani aalisartartut (kilisaatit, umiatsiaaqqat, uumatitsiviit): Nioqqutissat piareeriikkat tonsi ataasiugaangata CO₂e 0,83  tonsi
• Immap ikerinnaasiortut: Nioqqutissat piareeriikkat tonsi ataasiugaangata CO₂e 0,51  tonsi

Suliffeqarfissuarmi 2019-imi nukissamik atuineq nioqqutissat piareeriikkat tonsi ataasiugaangata 2.700 kWh missaaniissimavoq.

2022-mi anguniakkat

Suliffeqarfissuarmi tamarmi nukissami atuinerup ukiumut 5%-imik annikillisinnissaa.

Suliniutit

• Tunisassiorfinni tunitsivinnilu suliaqarfiit ataasiakkaat atuinerisa annertussusaannik misissueriarluni nukissamik atuinerup annikillisinnissaa
• Kilisaatit nutaat (2019) kilisaatinut atorunnaartunut sanilliullugit pitsannguutit naliliiffiginissaat
• Ilisimasat pigineqareersut "paasissutissarpassuillu" atorlugit nukissamik atuinerup tamakkiisup annikillisinnissaa
• Kilisaatissat tulliuttut CO₂e-mik silaannarmut aniatitsinerisa annikillisinnissaannut anguniagassanik aalajangersaaneq

2030-mi angorusutat

Nukissamik aallerfiusinnaasunik bunker uuliamullu taartissaasinnaasunik ukiuni makkunani pimoorussilluni ilisimatusartoqaleruttorpoq. Ilisimasat pigineqareersut tunngavigalugit nioqqutissat naammasseriikkat tonsi ataasiugaangata kilisaatit CO₂e-mik atuinerisa 25%-imik aamma suliffeqarfissuup nukissamik atuinerata 30%-imik annikillisinneqarnissaat 2030-p tungaanut suliniuteqarpugut