Aqutsisussaq
Aaneeraq Josefsen Royal Greenlandip tunisassiorfiani Maniitsumiittumi pitsaassusilerinermi sulisutut 2016-imi aallartippoq, kingornalu pisoqarsimaqaaq. Oqitsuinnaasimanngilarli.
Aaneeraq tunisassiorfimmi Maniitsumiittumi pitsaassusilerisunut sisamaasunut aqutsisuuvoq. Ulapaarfiuvoq, ingammik aasakkut saarullinnik tunisassiat Nutaaq tunisassiarineqartarmata. Aaneeraq taamaakkaluartoq qungujulallunilu nipaa saamallunilu ersarippoq: ’Maaniinnera nuannareqaara – suleqatigiilluta aammali aqutsisoqatigiilluta ikioqatigiittarpugut. Susoqarnissaa ullullu qanoq ingerlanissaa pissangagiuaannarpara’.
Aaneeraq aqutsisutut 2018-imi maajimi atorfinitsinneqarami piffissaq siulleq taamak misigisimanngilaq. Atorfinitsinneqarnissani sioqqullugu suleqatigiiaat aqutsisuattut atorfeqarami aqutsisoq sulinngiffeqaraangat angalagaangalluunniit suleqatiminik aqutsineq akisussaaffigisarsimavaa. Aqutsisoq saaffigisinnaatillugu ingerlalluarpoq; Aaneeraq sianersinnaajuaannarlunilu nammineq aalajangiisinnaananilu sulisut ajornakussoortunik oqaloqatigisariaqanngilai. Aaneeraq suleqatigiiaat aqutsisuattut 2018-ip aallartinnerani pikkorissareerami aqutsisuugallartutut atorfinitsinneqarpoq, namminerli atorfimmut qinnuteqarnissani takorloorsimanngilaa. kajumissaarneqarnermigut pitsaassusilerinermi aqutsisutut atorfimmut qinnuteqarpoq namminerlu akisussaasunngornera ilutsigalugu suna tamarmi allanngorpoq. ’Piffissap ingerlanerani inissanniinnanga misigigaluttuinnarpunga, aqutsisuuneq suliarujussuummat soraarniuteqarnissara eqqarsaatigaara’.
Suleqatiminit ikiorneqarnermigut aqutsisutullu ilinniarnermigut allannguivoq
'Qujanartumik tunisassiorfiup aqutsisoqatigiivinut aqutsisunullu allanut ikiortissarsiorama ikiorluarneqarpunga’, Aaneeraq oqaluttuarpoq. Aaneeraq tunisassiorfimmi aqutsisut aqutsisullu allat isummersoqatigilluarnerisigut Royal Greenladi Academy-mi aqutsisutut ilinniarnermik pingasunik immikkoortortalimmik ingerlatsissalluni 2019-imi periarfissaqalerpoq. Ilinniakkami nammineq aqutseriaaseq, suleqatinik oqaloqateqarneq aamma pilersaarusiorneq ukkatarineqartarput.
Tunisassiorfimmi Maniitsumiittumi sulisut tamarmik Sulisa+, inuttut ineriartornermik imminullu aqussinnaanissamik pikkorissarneq, ingerlappaat. ’Sulisa+ har suliffitsinnut pitsaalluinnarpoq; sulisut tamarmik nuannaarnerulerlutillu, pingaartinneqarlutillu, tunisassiorfimmi suleqatigiinni nukittuuni suleqataanerminnik misigisut qularinngilara’. Aaneeqqap aqutsisutut ingerlalluarluni ullumikkut atorfeqarneranut Sulisa+ sulisunut tamanut ingerlanneqartoq aamma aqutsisutut ilinniarneq aalajangiisuusimapput.
Ilaquttani qanippai
Aaneeraq Maniitsumi inunngorpoq, aqqaneq-marlunnilli ukioqarluni angajoqqaani avimmata Nuummut nuuppoq. Nuummi atuarlunilu HTX naammassivaa, ataatanili angajunilu suli Maniitsumi najugaqarlutillu sulimmata 2016-imi Maniitsumut uteqqikkusulerpoq. Aaneeqqap atorfimmini ingerlalluarnini pissutigalugu Maniitsumi najugaqarnini nuannaraa, tassami uissanilu najugaqatigiillutillu ilaquttatik qanimut najorpaat.
