Aqutsisumiit ingerlatsisumut

Eike siornatigut Royal Greenlandip tunisassiorfiani Paamiuniittumi tunisassiornermi aqutsisutut atorfeqarsimasoq, maanna ilinniareerluni Paamiunut angerlaqqittussanngorpoq.

Eike 35-inik ukioqarpoq, allaffimmiutut procesteknikkeritullu ilinniarsimasuulluni

Aqutsisumiit ingerlatsisumut  

Eike allaffimmiutut ilinniarnini 2015-imi naammassigamiuk Royal Greenlandip tunisassiorfiani Paamiuniittumi ukiuni marlunni atorfeqaqqaarsimavoq.  

- Tunisassiorfik suliffigissallugu nuannareqaara. Immikkoortortat tamarmik inuillu kikkuugaluarpataluunniit suleqatigissallugit soqutigisaraara, tassami tunisassiaq pitsaanerpaaq angussagutsigu suleqatigiittariaqarpugut, Eike Poulsen oqaluttuarpoq.  

Eike piginnaasani qaffassarniarlugit meeqqani taamanikkut marluusut aappanilu ilagalugit Narsami procesteknikeritut ilinniariartorluni nuuppoq.

- Ukiuni marlunni ilinniareerlunga nunannut suleqatinnullu uternissara qilanaareqaara, Eike aggustip aallaqqaataanni tunisassialerinermi ingerlatsisutut atorfinittussaq oqarpoq.

Periarfissarpassuit  

Eikep Paamiuni peroriartoraluarluni tunisassiorfiup soqutiginassusaa arajutsisimavaa, aatsaammi Royal Greenlandip allaffiani atorfinikkami tunisassiorfik iseqqaarpiarpaa. Allaffimmiutut sulereernermi kingorna tunisassiornermi siuttutut sulilerpoq. 

- Inuusuttuaraallunga tunisassiorfiup qanoq soqutiginartiginera ilisimanngilara. Allaffimmiooreerlunga tunisassiornermi aqutsisutut atorfinikkama nuannaringaarakku piginnaasakka qaffassassallugit aalajangerpunga, Eike oqaluttuarpoq.  

Eike allanut kajumissaarilluni naggasiivoq;  

- Neriuppunga inuusuttut kinguaariillu tulliuttut Royal Greenlandimi periarfissat atorluassagaat. Nunatsinni nunaqqatitta kivitseqataanissaat pisariaqartipparput, taamaammat linniaqqinnissamut ineriartornissamullu periarfissagissaarnera atorluaqqunaqaaq.  

Tikilluaqqusaalluarpoq 

Siornatigut Paamiuni tunisassiornermi siuttutut sulinermini ersarissumik siunnerfeqarluni suliaqartarsimanera iluarisimaarneqarpoq. Taamaammallu angerlarluni suliartornissaa qilanaarineqarpoq. 

- Uanga inuttut nammineerlunga Eikep suleqatigilernissaa qilanaareqaara. Paamiup tunisassiorfiani siunissaq eqqarsaatigalugu unammillernartut Eikep ammaffigiuaannarai nalunngilara, taamaammat oqartoqarsinnaavoq massakkut periarfissaqaqqilersoq, Paamiuni tunisassiorfimmi ingerlatsisoq Jan A. Jørgensen oqarpoq.