You have an outdated browser

Please update your browser

Update browser

Kilisaammiik aanngajaarniutinik eqqusseriaraluarneq suliniuteqarnikkut pinngitsoortinneqarpoq

Kilisaataatitsinnik aanngajaarniutinik eqqussineq akiorniarlugu suliniuteqarneq iluatseqqippoq. Nassaarneq kilisaatinik nunatta avataaniittunik nammineq nakkutilliinerup annertusineranit oqartussanillu suleqateqarluarnermit toqqaannartumik inerneruvoq.

Danmarkimi oqartussat Royal Greenlandip kilisaataataani Akamalimmi hashimik 100 gram-imik sisamanngornermi nassaarput. Royal Greenlandimi tunisassiornermut pisortaq Lars Nielsen ima oqaaseqarpoq: "Kilisaataatigut atorlugit eqqussineq, eqqunniakkat qanorluunniit annertutigigaluarpata, akuerineqarsinnaanngilluinnarpoq. Kilisaataatigut tamarmik ingammik nunatta avataaniikkaangata nammineq nakkutilliinerput ukiuni kingullerni annertusinikuullugulu kilisaataatitsinnik aanngajaarniutinik inerteqqutaasunik eqqussineq pinaveersaartinniarlugu oqartussat qanimut suleqatigaagut.”

Akitsuuserisut Royal Greenlandip inassutaa naapertorlugu Akamalimmi hashimik annikitsumik toqqortarineqarsimasumik nassaarmata annertusisamik suliniuteqarneq sapaatip-akunnerani matumani iluaqutaavoq. Nassaarineqartoq annertunngikkaluartoq aanngajaarniutinik inerteqqutaasunik nunatsinnut eqqusseriaraluarnerup pinngitsoortinneqarnera Royal Greenlandip akitsuuserinermullu oqartussat suleqatigiilluarnerinut uppernarsaataavoq. 

" Royal Greenlandimi sapinngisarput tamaat pisut tamakku, ilaatigut namminerisatsinnik misissuinitta annertusineratigut oqartussanillu suleqateqarnikkut, pinaveersaartinniartarigut erseqqissassallugu pingaaruteqarpoq. Aanngajaarniutinik anngiortumik nunatsinnut eqqussinerup aningaasatigut pissarsiaqaataanissaa eqqarsaatigalugu qanoq ilinikkulluunniit eqqusseriartoqarsinnaasartoq ilisimavarput – aamma kilisaataatitsinniit. Taamaammat eqqussinissaraluaq pinngitsoortinniarlugu annertuumik suliaqartarpugut," Lars Nielsen naqissusiivoq.

Kilisaataatigut aanngajaarniutinik inerteqqutaasunik peqannginnissaat qulakkeerniarlugu Royal Greenlandimit oqartussat qanimut suleqatigineqartuassapput. Isumannaallisaanerup qaffasissuunissaanut taamatuttaarlu sulisutsinnik, niuerutitsinnik inuiaqatigiinnillu illersuinissamut tunniusimalluta suliniuteqarnissamut pisussaaffipput suliami matumani naqissuserneqarpoq.

...