KNAPK-mik suleqatigiinnissamik isumaqatigiissut pillugu nutaarsiassaq

Ullutsinni aalisarnermi atugassarititaasunut naleqqussakkamik Royal Greenland aamma KNAPK (Kalaallit Nunaanni Aalisartut Piniartullu Kattuffiat) suleqatigiinnissamut isumaqatigiissusioqqammerput. Nunatsinni aalisarnerup iluani tunisassiortut annersaasa kiisalu aalisarnermi kattuffeqarnerup iluani aaqqissuussaanerup annersaata akornanni qanimut suleqatigiinnerunissamik isumaqatigiissuteqarnikkut naqissusiisoqarpoq, tamannalu aalisartunut Royal Greenland-imullu pingaaruteqassasoq isumaqarpugut.

Pingaarutilitsigut ataatsimoorussilluta suliniuteqarnissarput isumaqatigiissuteqarnitsigut tunngavilerparput. Assersuutigalugu sinerissap qanittuani piujuartitsisumik aalisartoqarnissaa ataatsimoorluta qulakkeerniassavarput kiisalu avatangiisimut aalisagaqassutsimullu ajoqutaasunik aalisarnermi piniutaarsiutit saliinissamut aamma tapersersuissalluta. Nunatsinni aalisakkanik maannamut atorluarneqanngitsunik misileraalluni aalisartoqarnissaa siuarsassavarput taamalu ililluta isertitsissutaasinnaasunik nutaanik periarfissaqartoqalersillugu nunatsinnilu tunisassiornermi tunngavigineqartunik amerlisaaqataalluta.

Nunatsinniit tunisassianik nunarsuup sinneranut nioqquteqarsinnaanermik ineriartortitsinissaq pingaarutilittut suliassat ilagaat. Inuussutissalerinerup iluani isumannaatsuutitsinissap pitsaassutsillu pingaartinneqarnissaata qulakkeernissaanut tamatta soqutigisatta suleqatigiissutiginissaa qilanaaraarput, Royal Greenland-illu ullut tamaasa tunisassiassaqarnissaa qulakkeerniarlugu nunatsinni aalisartorpassuarnut atugassarititaasut pitsaanerpaatinneqarnissaat aamma pilersitseqataaffigalutigu.

Isumaqatigiissut manna ataatsimut anguniakkatta ataasiusup illua-tungeriilluta ataqqinninnermik paasinninnermillu peqarluta isumaqatigiissusiaraarput. Suleqatigiinnissamik nukittunerusumik isumaqatigiissuteqarnitsigut nunatsinni piujuartitsiviusumik siunissamullu qulakkeerinniffiusumik ataatsimoorluta suliniuteqarnissarput qilanaaraarput.