You have an outdated browser

Please update your browser

Update browser

Raajap sananeqaataa immikkuullarissoq ilisimasaqarfigileruk

Raajat issittup imartaaneersut nunarsuaq tamakkerlugu piumaneqarluartuupput, Royal Greenlandillu annertunersaat uusutut qalipaajakkatullu tunisassiarivai. Raajalli issittup imartaanersut qanoq ilisimasaqarfigaagut?

Royal Greenlandip inuussutissarsiutigalugu ph.d.-nngorniartoq Signe Vansgaard Lyngbymi Danmarks Tekniske Universitetsimeersoq suleqatigalugu raajap timaa immikkuullarissoq ilisimatusarfigalugu misissornikuuaa. Kisianni sunaana raajap timaa pillugu ilisimasariaqaripput? Raajat qalipaajarneqarnissaminnut qanoq inerittarnersut, qaleruai qaqugukkut taarsertarnersut qaqugukkullu uusutut qalipaajakkatullu nerineqariaannanngortarnersut eqqarsaatiginagu ulluinnarni nerisarisarpagut .

"Raaja qanorpiaq ittuunersoq paasiniarparput, ingammik qaleruani pissusissamisut taarseraangagu, suliniummi aqutsisup Niels Bøknæsip RG Innovationimeersup, suliniummi aallaqqaataaniilli malinnaasimasup, oqaatigaa.

Signe Vangsgaardip raajat qalipaareernermi kingorna nerpiisa pitsaassusaat iluanaarutigineqarsinnaaneralu qaffatsissinnaasoq isumaqarami ph.d.-nngroniarluni allaatigisamini raajap qaleruaata taarsertarnera ukkatarivaa. Raaja arfinilinnik ukiulik uunneqarsinnaalerlunilu qalipaajarneqarsinnaalersimasarpoq, qalipaalu uumanerata nalaani arlaleriarluni taarsereersimasarpoq. Raajap pissusissamisut qaleruaanngillatsiarnerani imaluunniit qaleruaajareernerata kingorna qalipaajaraanni pitsaanerulertarnersoq Signep Ph.D.-imut suliaminut atatillugu misissorpaa.

Raajat uusut qalipaajakkallu qaffasinnerusumik pitsaassusillit anguniagaapput

Royal Greenland raajaanik Issittup imartaaneersunik tunisassiortut nunarsuarmi annersaraat, taamaammat Royal Greenlandip tunisassiorfiini Sisimiuniittumi Ilulissaniittumilu raajanik uusunik qalipaajakkanillu tunisassiornermi qalipaajaariaatsip pitsanngorsartuarnissaa pisariaqarpoq. Tamanna ukiut 20-30-it kingulliit sulissutigineqarpoq. Signe aammattaaq paasisassarsiuutigaluni sulinimiutiminut misiliutissaminik aallerluni 2023-mi aasaanerani Royal Greenlandip tunisassiorfiani Sisimiuniittumiippoq.

Ilisimasassarsiortut soqutiginartuaannarput

Royal Greenlandimiit ilisimatusartunik suleqateqarnissaq ammaffigineqartuaannarpoq, pingaartumik aalisakkat qaleruallillu nunatsinneersut pitsaanerulernissaat anguniarneqartillugu.

“Inerisaasunik sulisorpassuaqarnatalu laboratoriarpassuaqanngilagut kiisalu sorpassuarnik uuttortaanissamut periuseqarnata. Taamaammat ilisimatusartunik pikkorissunik uuttortaatinillu immikkuullarissunik atuisinnaasunik suleqateqakkajuppugut,” Niels Bøknæs oqarpoq nangillunilu:

“Ilisimatusartut sulinerminni tigussaasunik aallussaqarlutik amerlanertigut Kalaallit Nunaannut suliartorsinnaanerminnut periarfissaasarmat qanimut suleqatigerusuttarpaatigut. Tamanna nuannaraat. Tunisassiat Kalaallit Nunaanneersut soqutigisarivaat, taamammat ilisimatusartunik pikkorissunik sullarissunillu suleqateqarnissaq ajornartorsiutaaneq ajorpoq,” Niels Bøknæs naggasiivoq.

Royal Greenlandip nunarsuarmi aalisakkanik tunisassiortut assigalugit tunisassiassanik pitsaanerusunik tunisassiornissamut, nakkutilliinermut qaffasissumillu pitsaassusilinnik tunisassiornissamut piumasaqaatit malippai. Taamaammat ilisimatusartuarnissaq kiisalu ataqatigiissakkamik tunisassioriaatsit pioreersut inerisartuarnissaat Royal Greenlandimut pisariarpoq.

...