Royal Greenlandimiit Nils Duus Kinnerup inuulluaqquarput
Ukioq nutaaq aallarnerfigalugu Royal Greenlandimi aningaasaqarnermut nutaamik pisortartaassaagut. Nils Duus Kinnerup, ukiuni 17-ni aalajaalluni Royal Greenlandimi sulereerluni, 1. januar 2025 aallarnerfigalugu aningaasaqarnermut pisortatut atorfimminit tunuarnissani aalajangerpaa
Royal Greenlandimiit Nils Duus Kinnerup inuulluaqquarput
Ukioq nutaaq aallarnerfigalugu Royal Greenlandimi aningaasaqarnermut nutaamik pisortartaassaagut.
Nils Duus Kinnerup, ukiuni 17-ni aalajaalluni Royal Greenlandimi sulereerluni, 1. januar 2025 aallarnerfigalugu aningaasaqarnermut pisortatut atorfimminit tunuarnissani aalajangerpaa.
Tamanna Royal Greenlandip nunatsinni qullersanik najugaqartitsinissamik siunertaqarnerata malitsigisaanik pivoq, tassami Nils inuttut atukkani peqqutigalugit siunertamut matumunnga peqataasinnaanngilaq.
Nils Royal Greenlandimi sulinermini suliffeqarfiup aningaasaqarnikkut aqunneqarneranut ineriartorneranullu pingaaruteqarsimavoq, matumanilu pissutsit ilungersunartut kingorna suliffeqarfiup piffissami sivisuumi sinneqartooruteqarsimaneranut sunniuteqarluarsimalluni.
Nilsip aningaasaqarnikkut ineriartornermut sinneqartooruteqartarnermullu sunniuteqangaatsiarsimanera, aammattaaq ingerlatseqatigiiffik tamaat isigalugu aqutsilluarlunilu pimoorussilluarsimanera ilisimalluarlugulu qujamasuutigaarput
Nilsip nammineerluni aamma suliffeqarfiup nunani tamalaani ingerlanneqarneranut sunniuteqaqataasimanini tulluusimaarutigaa.
2008-mi Royal Greenlandimi sulileqqaarninnit aqqusaarsimasakka nuannersorpassuupput. Ingerlatseqatigiiffiup ineriartorneranut niuernikkullu iluatsitsilluarneranut maanna suli atuuttumut Kalaallit Nunaannilu inuiaqatigiinnut iluaqutaasumut peqataasimanera nuannerlunilu pissarsiaqarnaqaaq. Suliffeqarfissuarmi tamarmi, kangianiit kitaanut, Kalaallit Nunaanniit Japanimut, USA-miit Canada-mut kulturerpassuarnilu assigiinngitsuni suleriuseq pilersissimasarput tulluusimaarutigaara
Nils Duus Kinnerup suliffeqarfissuarmi siunnersortitut suleqqaarallassaaq, matumanilu pisoqartaqatigiit
qanimut suleqatigalugit patajaatsumik ingerlatsisoqarlunilu aalaakkaasumik nikeriartoqarnissaa qulakkiissavaa.
Royal Greenland maanna aningaasaqarnermut pisortamik nutaamik ujaasileruttorpoq, tamannalu sapinngisamik piaarnerpaamik nalunaarutigineqarumaartoq naatsorsuutaavoq. Aningaasaqarnermut pisortaq nutaaq Nuummi allaffeqarumaarpoq.
