Ilulissani tunisassiorfik qalerallit nerpiinik tunisassioqqilersoq
Qalerallit nerpiinik ukiukkut tunisassiorneq Royal Greenlandip Ilulissani tunisassiorfiani ukiut qulit uninngareerluni aallarteqqippoq. Aalisagaq piumaneqarluartoq siornatigut ilivitsuutillugu poortorneqartarpoq sikuujunnaaraangallu Qasigiannguanut tunisassiassanngorlugu nassiunneqartarluni.
Allattoq Inga Egede, ineg@royalgreenland.comIlulissani tunisassiorfik nerpinnik tunisassiulerpoq tunisassiorfik Danmarkimi inuussutissanut pisortaqarfimmit inuussutissanik tunisassiulernissamut akuersissummik tunineqarmat.
- Tunisassiornerput ulloq 9. marsi 2020 aallartipparput aallartisarluarsimalerlutalu. Kusanaqaaq nuannaaqaagullu. Tamanna Royal Greenlandimi nalitusaanerulernissamik periusissiaqarnermut naapertuuppoq, qaleralinnik tunisassialerinermi ingerlatsisoq Niels Ole Møller oqarpoq.
Qalerallit Ilulissani tunisassiorfimmut ukiuni qulini kingullerni tunineqaraangata ilivitsuutillugit poortoriarlugit tunineqartarput imaroqqaneranilu Royal Greenlandip Qasigiannguani tunisassiorfiani nerpii tunisassiariniarlugit assartorneqartarlutik.
- Imaroqqanerani qaleralinnik Qasigiannguanut suli assartuisassaagut, Niels Ole Møller erseqqissaavoq.
Ilulissani tunisassiorfimmi qalerallit nerpiinik tunisassiornermi sulisut 20-it missaanniittut suliffissaqartinneqarput, tulaassorneqartut apeqqutaatillugit suleqatigiiaat ataatsimiit marlunnut nikissinnaallutik. Tunisassiorfimmi maanna nerpit, avaleqqat, niaqqut, papeqqut, aalisakkat paperuiakkat niaquiakkallu kiisalu qalerallit erlaviiginnakkat tunisassiarineqarput.
Nunarsuarmi raajaleriffiit annersaat aamma Ilulissaniippoq qaleralinnut immikkoortortaqarfik ilanngullugu 130-inik sulisoqartoq.
