Nuummi aalisartut saarullinnik uumasunik tunisipput
Royal Greenlandip saarullinnik uumasunik tunisineq maanna Nuup eqqaanut siaruarpaa. Sapaatit akunnerit arlaqanngitsut qaangiuppata Sisimiuni aalisartut aamma umiarsuarmut uumatitsivimmut “Maniitsumut “ saarullinnik uumasunik tunisisinnaalissapput. Umiarsuaq “Maniitsoq maanna aalisakkanik uumasunik Nuup eqqaaniit, Maniitsup eqqaaniit Sisimiullu eqqaaniit saarullinnik uumasunik Maniitsumi Royal Greenlandip tunisassiorfiani Nutaaq Cod-iliassanik assartuisalissaaq.
Allattoq Inga Egede, ineg@royalgreenland.com- Aalisartut nuummeersut tallimat sapaatip akunnerani 18-imi qassutinik nuutitsivinnik tunineqarput. Arfinngormat umiarsuup uumatitsiviup “Maniitsup” Kapisillit eqqaani Ameralimmilu qassutini aalisartut nuutitsitiviini aalisakkanik aallerpoq, Royal Greenlandimi tunisassialerinermi ingerlatsisoq, Sten Sørenasen oqarpoq.
Saarullinnik uumasunik aalisarfiusut siaruarterneqarnissaannik Royal Greenlandip kissaateqarnera maanna piviusunngortoq, Sten Sørensen oqarpoq.
- Saarulliit t uumatiinnarlugit umiarsuarmut tunineqartartut aalisartunut sumiffinni allani najugaqartut tunisisinnaanissaat neqeroorutiginissaa Royal Greenlandip ukiuni kingullerni kissaatigisaraa. Kissaatigisarlu taanna maanna Nuup eqqaani piviusunngortoq aamma Sisimiut eqqaanut siaruarneqarnissaa pilersaarusiorparput, Sten Sørensen oqarpoq, nangillunilu:
- Aalisarfiit isorartunerusuniittut saarullinnik uumasunik aalisarfiulernissaannik anguniagaqarnerput ukiup aalisarfiusup siusinnerusukkut aallaartinneratigut kingusinnersukkullu aalisarfiujunnaarneratigut sivisunersumik aalisarsinnaaneq anguniarneqarpoq.
Saarulliit uumasut qassutini uumatitsivimmiiteriarlugit uumatiinnarlugit umiarsuarmut uumatitsivimmut “Maniitsoq” –mut aalisartut tunisisarnerat Maniitsumi ineriartortinneqarluni 2014-imi misileraalluni aalisartoqareernerani ingerlanneqalerpoq. Ukiut siulliit Maniitsumi aalisariutaatillit ikitsuinnaat saarullinik uumasunik aalisarnermi akuutinneqarput, 2016-imili umiatsiaararsorlutik aalisartut aamma akuutinneqalerlutik. Maniitsumi alisartut aalisariutaatillit umiatsiaarasorlutillu aalisartut 80-it miisingisa 2017-imi saarulliit uumasut 6.000 tonsit missingi umiarsuarmut uumatitsivimmut “Maniitsoq”-mut tunisaat Maniitsumi Royal Greenlandip tunisassiorfianut assartorneqartarput, tassanilu saarulliit Nutaaq Cod-iutut tunisassiarineqalernerminni aatsaat toqunneqartarput.
Aalisartut tallimat akuutinneqarput
- Nuup eqqaani aalisartut tallimat akuttillugit aallartippugut. Aalisarnerup qanoq ingerlanera aalisartullu soqutiginninnerat aallaavigalugu immaqa saarullinnik uumasunik Nuup eqqaani aalisarneq annertusassavarput, Sten Sørensen oqarpoq.
Umiarsuup ”Maniitsoq” –ip katillugit saarulliit uumasit 85 tonsit ataatsikkut usisinnaavai. Arfinngormat majip aqqaneq aappaani siullermeerluni Kapisillit eqqaani Ameralimmilu aalisartut qassutini uumatitsiviini saarullinnik uumasunik aallerami 75 tonsit misinginik annertussusillit Nuup kangerluiniit Maniitsumi Royal Greenlandip tunisassiorfianut assartorpai.
Sten Sørensen oqarpoq ullut 14-it qaangiutsinnagit Sisimiuni aalisartut siulliit qassuitinik uumatitsivinnik qulinik tunineqarumaartut.
- Ukiup aalisarfiusup 2018-ip ingerlanerani Nuummi Sisimiunilu aalisartut qassutinik uumattsivinnik 20-inik sumiiffiit tamaasa immikkut tunisinnaajumaarlugit neriuutigaarput, Sten Sørensen oqarpoq, imalu naggasiilluni oqarluni:
- Kangaatsiap eqqaa tikillugu saarullinnik uumasunik aalisarneq siammerterusukkatsigu ukioq manna tamanna sulissutiginiarparput.
