Pinngorartitsineq najukkamilu tunisassiat

Kommuneqarfik Sermersuup illu pinngorartitsivik FoodLab 2019-imi Nuukullammi ammarpaa. Annikitsukkaanik tunisassiortartunut tunisassiorfinnik Iattartortitsinissamik neqerooruteqarnikkut isumassarsiamiit tunisassiamut naammassisamut eqaannerusumik suleriuseqarnissamik kissaateqarneq suliniummi tunngaviuvoq.

- Inuussutissalerinermi niuerutissanik nutaanik inerisaanissap pitsaanerusumik tunngavissaqarnissaa FoodLab-imi siunertarineqarpoq. Inuppassuit najukkami tunisassiassat ulluinnarni atussallugit pikkoriffigalugulu angerlarsimaffimminni nerisassioriaatsinik nutaanik qanganitsanillu misileraasarput. Nerisassiornermik soqutigisallit tamaasa maani Foodlab-imi kajungilersikkumavagut, taamaalillutimmi inuussutissarsiornermik suliffeqarfiit nutaat soqutiginartullu siunissaq ungasinnerusoq eqqarsaatigalugu pilersinneqarsinnaapput, Foodlab-imi suliniuteqarnermi aqutsisuuneq Anne Nivika Grødem oqarpoq.

Inuussutissalerinermik inuussutissarsiuteqarneq ilippanartoqartoq Royal Greenland A/S-ip aamma ilisimavaa, taamaalillunilu Foodlab suleqatiginiarlugu nalunaarpoq.

- Inuussutissalerineq piujuaannartitsineq eqqarsaatigalugu ineriartortikkumallugu pisiniarfiit ilisiviini najukkami tunisassiat amerlanerusut takussaalernissaat pingaaruteqarluinnarpoq. Inuussutissanik tunisassiortutut ineriartornermik taassuminnga tapersersuinissaq aamma piginnaasatsinnik ilisimasatsinnillu neqerooruteqarnissaq uagutsinnut CSR politikkitsinnullu pissusissamisoorpoq, Royal Greenlandimi nunatsinni tunisassianik tuniniaavimmi tuniniaanermut ingerlatsisoq Malik Hegelund Olsen oqarpoq.

Attartornermut akiliutsinneq

Royal Greenland aamma FoodLab suliniutit aalajangersimasut marluk tunngavigalugit suleqatigiipput. Siulleq tassaavoq Foodlab-ip iniutaanik attartornermut akiliummut aningaasaliineq, tassami tunisassiorfinnut iggavimmilu atortunut aningaasaleeqqaartariarluni nerisassanik pinngorartitsisutut aallartisaneq akisusinnaavoq.

- FoodLab-ip inaataani akunnikkaartumik attartorneqarsinnaasunik inuussutissaliornermut akuerisaasumik igaffeqarlunilu pitsaalluinnartunillu iggavimmi atortoqarpoq. Tassani nerisassanik pinngorartitsisut aningaasaleerujussuanngikkaluarlutik misileraallutillu tunisassiorsinnaapput, imaluunniit nerisassiornermut ilitsersuillutillu piffissami killilimmi sammisaqartitsisinnaapput, Anne Nivíka Grødem oqaluttuarpoq.

Royal Greenland taamaalilluni attartornermut akiliutinut aningaasaliinermigut aningaasaqarnikkut ikiuussinnaavoq.

- Atortussanik piseqqaartariaqaraanni nerisassanik pinngorartitsisuuneq akisusinnaasoq ilisimavarput. Attartornermut aningaasaliinitsigut pinngorartitsisup isumassarsiaminik piviusunngortitsinissani kisiat aallussinnaavaa, Malik Hegelund Olsen oqarpoq.

Ilitsersuisoqatigiit pilersinneqarput

Suleqatigiinnissamut isumaqatigiissummi suleqatigiissutigineqartussat aappaat tassaavoq ilitsersuisoqatigiinnik pilersitsinikkut pinngorartitsisunim siunnersuineq, tassaasoq FoodLab Advisory Board, FAB.

- Nerisassanik pinngorartitsinermik suliaqartut paarlaaqatigiinnissamik siunnersorneqarnissamillu pisariaqartitsisinnaasarput. Royal Greenland tamatumunnga atatillugu ilitsersuisoqatigiinnut pilersinneqaqqammertunut tassaasunut Foodlab Advisory Board, FAB-imut ilanngunnermigut tunniussaqarsinnaavoq. Ilitsersuisoqatigiit ilitsersuisunik soorlu niuertarfinni tuniniaanermut, inuussutissat pillugit inatsisinut, tunisassiornermut, suliassanik pilersaarusiornermut aamma suliffeqarfimmik ingerlatsinermut tunngasunik ilisimasalinnik ilaasortaqarpoq, Anne Nivíka Grødem oqarpoq, nangipporlu:

- Inuussutissalerinermik suliffeqarfimmik aallarniiniarneq paatsiveerunnarsinnaasoq nalunngilarput. FAB taamaammat inuussutissatut tunisassiassamik isumassarsisimasunut, paarlaaqateqarnissaminnut maannakkorpiarlu ikiorneqarnissaminnut pisariaqartitsisunut ikiortissatut atorneqartussatut pilersaarutaavoq. Inuussutissalerinermi niueruteqarnissamik piviusunngortitsinissamut akimmiffissaasinnaasut peernissaannut Royal Greenlandimik suleqateqarneq pingaaruteqarluinnarpoq, Anne Nivíka Grødem naggasiivoq.

Paasisaqarnerorusukkuit saaffissaq: Foodlab/Sermersooq Business-imi suliniutinut aqutsisuuneq - Anne Nivíka Grødem, Oqarasuaat 560282, e-mail: nivika@business.gl imaluunniit Nunatsinni tunisassianik tuniniaavimmi tuniniaanermut ingerlatsisoq Malik Hegelund Olsen, oqarasuaat 361302, e-mail. malo@royalgreenland.com

PAASISSUTISSAT

FOODLAB SUMUT ATORNEQARSINNAAVA? FoodLab-ip inaatai inuussutissatut tunisassianik annikitsukkaanik tunisassiornermut, nerisassanut tunngasumik sammisaqartitsinernut ilitsersuinernullu tulluussagaapput. FoodLab aammattaaq nerisassanik ussiinermut nerisassioriaatsinilli nutaanik misilittaanermut inimik peqarpoq.

FOODLAB KIKKUT ATORSINNAAVAAT? FoodLab kikkunnilluunniit nerisassanik tunisassiassanillu pitsaasunik misileraanermik nuannarisalinnut kikkunnulluunniit ammavoq. Illu Nuummi Nuukullak 35-miippoq, kikkulluunniillu inuussutissaleriumasut attartorsinnaapput.

FoodLab pillugu uani paasisaqarnerugit: www.foodlab.gl

Facebook @foodlabnuuk

Instagram @foodlab_nuuk