Suliffeqarfipput qinerneqarnissaq piinnarlugu pinnguarineqassanngilaq
Hermann Berthelsenip aviisimi Sermitsiami siunnersuuteqarneranut qisuariaat.
Royal Greenlandip 2009-mi ajutuungajalluinnarnera Royal Greenlandimi sulisorpassuulluta malinnaaffigaarput, paasivarpullu suliffipput annaatissagutsigu taamani pinngitsoqarata ilungersortariaqarluta.
Assersuutigalugu uanga ingerlatanni piumaffigineqarpunga ingerlatsinermut aningaasartuutit 40 %-imik annikillisariaqartut, unammilligassatullu tiguara nalunnginnakku tamatta sulisuusugut sukataarluta tunniussaqanngikkutta nunatsinni suliffeqarfiit aningaasaqarnikkut pingaaruteqarnersaat ajutuussasoq.
Royal Greenlandip tunisassiorfiit 37-t sinerissami ingerlappai, amerlanerpaallu aningaasat eqqarsaatigalugit kaavissinnaanngikkaluartut ingerlatinneqarput inuiaqatigiit ingerlatitaanerannut pingaaruteqarmata.
Sinneqartoorutillu assagut sarliaannanngilluaasarlugit ilungersorluta anguagut, soorunalumi Royal Greenland siulersuisoqarneratigut aammalu pikkorilluinnartunik avammut niuvernermut aammalu suliffeqarfissuarmik ingerlatsinermut misilittagalinnik qullersaqarneq annertuumik tunngaviliivoq. Taamaammat kissaatiginanngeqaaq tulluusimaarutigalugu suliffipput politikerit qinerneqarnissaq piinnarlugu pinnguarissagaat.
Hans Lars Olsen
Royal Greenlandimi tunisassiorfimmik ingerlatsisoq
