Suliniut iluatsittoq
Royal Greenlandip inuttat 200-it kilisaatinit niusussat kilisaatinullu ikisussat Atlantic Aiways Air Greenlandilu timmisartortitsisoralugit angallanniarlugit sapaatip-akunnerani matumani suliniutini annertooq naammassivaa.
Royal Greenlandip kilisaatini inuttarpassuinut kilisaateqarfimmilu sulisuinut marlunngorneq apriilip 21-iat 2020 puigunaatsuussaaq. Royal Greenland sumiiffinni pingasuni, timmisartortitsivik Savalimmiuniittoq Atlantic Airways kiisalu Air Greenland ikiortigilluarlugit kilisaatini arfineq-marluusuni inuttanik 200-nik ullormi ataasiinnarmi siornatigut paarlaatsitsinikuunngilaq.
Qaammatip ataatsip sinnilaarlugu matuma siorna Covid-19- nunatsinni ajornartoortitsimmat imaannarsuarmi kilisaammiinneq isumannaannerpaasimassagunarpoq. Covid-19-imik tuniluuttoqaratarsinnaanera pakkersimaarniarlugu avataaniit nunatsinnut nunatsinniillu avammut angalanerit tamarmik matuneqarmata inuttanillu paarlaatsitsinissat pilersaarutaareersut kinguartinneqarmata umiartorneq nalinginnaasumiit sivisunerulerpoq. Covid-19 nunatsinni anigoriartorneqalermat Royal Greenlandip kilisaataataani Tuugaalimmi, Nataarnami, Avatami aamma Lomurimi, kiisalu Sikuaq Trawl aamma Niisa Trawl ApS-ip kilisaataataani Svend C-mi Regina C-milu inuttanik paarlaatsitsinissaq piviusunngorsinnaanngorpoq. Suliaq inuppassuarnik suliarineqarlunilu nukippassuarnik atuiffiuvoq.
Misissortinnerit mattusimatitaanerillu
Inuttat paarlaatsinnissaannut piareersaatit annertugamik nunatsinni Savalimmiunilu peqqinnissaqarfiit ikiortigalugit aatsaat piviusunngorsinnaasimapput, Royal Greenlandimi inuttalerinermi ingerlatsisoq suliamillu aaqqissuussisoq Mika Heilmann oqaluttuarpoq.
- Inuttat paarlaatsinnissaasa piviusunngortinnissaanut nunatsinni nakorsaaneq Henrik L. Hansen qujassutissaqarfigeqaarput. Inuttat Sisimiuni Nuummiluunniit kilisaammut ikisussat Covid-19-imik tunillatsissimanerlutik misissortinnissaat pillugu siunnersorlutalu Savalimmiuni peqqinnissaqarfik napparsimmavillu siunnersorpai, Mika Heilmann oqarpoq.
Inuttat kilisaammut ikisussat Covid-19-imut misissortinnermik saniatigut nunami najukkaminni ulluni 14-ini mattusimatinneqarput.
- Mattusimatinneqarneq eqquutsinneqarnersoq nakkutigilluarparput. Inuttat paarlaannerini siuliini inuttat marluk kilisaammut ikinnginnerminni mattusimatinneqarnertik eqquutsissimanngilaat, taamaammallu kilisaammut ikisinnaasimanngillat. Ajortoqaratarsinnaanera annertuallaarsimassagaluarpoq, tuniluuttoqannginnissaalu suna tamaat atorlugu pinaveersaartikkumavarput, Mika Heilmann nassuiaavoq.
Timmisartumik attartorneq
Inuttat 200-t nunani pingasunut, Kalaallit Nunaannut, Savalimmiunut Norgemullu angallanneqartussaapput.
- Tuugaalimmi Sisimiunilu inuttat qaammatini marlunni avalaqqagamik bussimut tappiorannartuiakkamut ilaallutik Tromsømi mittarfimmut ingerlanneqaramik najugaqartunik attaveqanngillat. Inuttat Savalimmiuniit Tromsømut timmisartortut tamarmik inunnik allanik attaveqannginnissaat qulakkeeqqaarparput. Kilisaammiit niusut taava Tromsømiit Savalimmiunut timmisartoriarlutik Kangerlussuarmut ingerlaqqipput. Tassanngaanniit inuttat Nataarnamut, Avatamut, Lomurimut aamma Svend C-mut ikisussat timmisartumik Air Greenlandimiit attartorluta Sisimiunukaallugillu Regina C-mut ikisussat Nuummukaappagut. Sisimiuni Nuummilu niusut kingorna Kangerlussuarmiit Savalimmiunut Tromsømullu timmisartortippavut, Mika Heilmann oqarpoq.
Sapiitsuliortut ersinngitsut
Inuttaqarnermi ingerlatsisoq immikkoortortamilu sulisut suna tamaat naammasiniarlugu ulapissimaqaat. Inuttalerinermilu ingerlatsisoq apuuttussat tamarmik apuussimalermata kilisaatillu Sisimiuniit, Nuummiit Tromsømiillu avalassimalermata eqqissiallannerup pianik anersaavallassinnaanngorpoq. Suleqataasimasunut tamanut nersualaarinnippoq.
- Aap, eqqissiallappunga. Inuppassuit Tromsømiit, Savalimmiuniit Sisimiuniillu suleqataapput. Pingaarnertulli Covid-19-imut tunngatillugu angalanermut misissuinermullu suleqatigiisitat suliami matumani naammassisaannut qutsavigiumavakka. Inuttat akuerisaanissaat pillugu aalajangiiniarnermi ikiuulluarput. Tamanna suliarujussuuvoq taakkulu unnussuarmut sulisarsimapput. Angalanissamut inniminniissuttarmatigut suliamik naammassinnissinnaasimavugut, Mika Heilmann oqarpoq.
- Uanga silarsuanni Corona pillugu allattoqarfimmiut sapiitsuliortuupput ersinngitsut.
Inuttat naammagittarsimanerannut pisunullu nalimmassarsimanerannut aammattaaq qutsavigingaarpai.
- Inuttanik naammagittangaartariaqarsimasunik pitsassuarnik sulisoqarpugut. Angerlarsimallutik mattusimasariaqarsimallutillu piumasaqaatit malittariaqarsimavaat. Inuiaqatigiit unittuunnginnissaanut ikiuutaanermikkut inuiaqatigiinnut taamaalillutik tunniusseqataapput, Mika Heilmann taama qujaniarpoq.
