Sulisussaaleqineq akiorniarlugu immikkut ittumik iliuuseqarneq
Aappilattumi tunisassiorfiup sulisussaaleqinera akiorniarlugu Upernavimmi tunisassiornermik ingerlatsisoq immikkut ittumik iliuuseqarpoq. Avataaniit suliartortut tupernik inunnik qulinik inissalinnik tallimanik, kiisalu immikut tupernik marlunnik anartarfiullutillu uffarfiusunik tupeqarfiliorput.
Allattoq Inga Egede, ineg@royalgreenland.com- Tupeqarfik inunnut qulinut inissaqartitsisoq, tuluttut mine campimik taaneqartartoq, napparparput. Taanna sulisunit nutaanit piffimmeersunit, sinerissameersunit kiisalu Nordjobb aqqutigalugu suliartortunit marlunnit utaqqiisaagallartumik najugaqarfigineqassaaq. Sulisut avataaneersut quliusut tamarmik Aappilattumut tikeriarpata suleqatigiit paarlakaattut marlunngorluta tunisassiorsinnaalissaagut, sulisut aqqaneq-marluk ullukkoortuussapput qulillu unnukkoortuullutik, Royal Greenlandimi tunisassialerinermi ingerlatsisoq Flemming Andersen taama oqarpoq.
Toqqit ninngusuut
Toqqit tallimat immikkut inunnut marlunnut inissaqarput, talulerlugillu ataasiittarissat marlunngorsinnaallutik. Tupeq ataaseq 16x20 fodsinik uuttuuteqarpoq kiassagaallunilu.
- Toqqit napparneqartut aatsitassarsiornermi toqqit atorneqartartut assigaat, ninngugamillu pitsaasuupput siniffeqarlutik, nerriveqarlutik aammalu atisaasiveqarlutik. Tuperni innaallagissap aqqutaanik ikkussineq tallimanngorpat pissaaq, taamaasillutillu atorneqarnissaminnut piariissapput, Flemming Andersen oqarpoq, nangipporlu:
- Tupit marluk anartarfittut atortussanngorlugit napparneqarput. Aamma uffarfiusinnaasunik nappaasoqarpoq, kisiannili tupeqarfimmi erngup aqquteqanngimmat taakku atorneqarsinnaanngikkallarput. Sulisulli nutaat tunisassiorfimmut uffariartorsinnaassapput.
Saaffiginnittorpassuit
Royal Greenlandip tunisassiorfittaava Aappilattumiittoq, 2018-imi januaarimi tunisassiulersoq, ulapaarfimmi tamakkiisumik tunisassiornissaminut suli sulisunik qulinik amigaateqarpoq. Tunisassiorfik ullup unnuallu ingerlanerani 14,4 tonsinik tunisassiorsinnaavoq 450 tonsinillu qeritisisinnaalluni.
- Maanna aqqaneq-marlunnik sulisoqarpugut, tamakkiisumillu tunisassiussagutta suli qulinik amigaateqarpugut. Maani tunisassiorfitsinnut saaffiginnittorpassuaqarlunilu qinnuteqartorpassuaqarpoq, taamaammat isumalluarlutalu qiimanerulerpugut. Sulisussat piffimmeersut sisamat, sinerissameersut marluk, Nordjobbilu aqqutigalugu sulilersussat marluk tikissapput, soorlumi ajorunnanngitsoq, Flemming Andersen oqarpoq, nangipporlu:
- Suliffissarsiortut Aappilattumukannginnerini soorunami tupini najugaqarusunnersut apereqqaartarpavut.
Royal Greenland Aappilattumi illumik sulisunut tallimanut inissalimmik pisisimasoq tunisassialerinermi ingerlatsisoq ilisimatitsivoq. Illu pappialat piumasaqaataasut tamarmik isumagineqareerpata avataanit suliartortunit najugaqarfigineqalissaaq.
Aappilattuni toqqit napparneqartut assilineri allaaserisap ataani takuneqarfsinnaapput
