Tunisassiorfik Kangaatsiamiittoq ukioq manna suliffitsialattut toqqarneqarpoq
Royal Greenlandip tunisassiorfia Kangaatsiamiittoq Kangaatsiami Sulinermik Inuussutissarsiutillit peqatigiiffiannit 2019-imi suliffitsialattut toqqarneqarpoq. Tunisassiorfimmi aqutsisoqatigiit sulinerup nalaani eqaarsaartitsisalernissamik, sulisunik ilaqutaannillu timersortitsinissamik kiisalu suliffimmi qaammammi suleqatitsialammik toqqaasarnissamik suliniuteqarneri toqqaanermut tunngavilersuutaapput.
Allattoq Inga Egede, ineg@royalgreenland.com- Kangaatsiami 2019-imi suliffitsialattut toqqagaanerput nuannaarutigalugulu tulluusimaarutigeqaarput, tunisassiorfimmi ingerlatsisoq Jørgen Inusugtoq, KSIP-mi ilaasortat katersortarfimmi nereqatigiinneranni toqqagaanerminnik nalunaarfigineqarluni, allagartamik nersornaasiuttakkamik tunineqarluni Royal Greenland Kangaatsiamullu pisiniarsinnaanissaminut allagartamik tunineqarluni tupatsinneqartoq taamak oqarpoq.
Sullivimmi avatangiisit peqqinnartut
Kangaatsiami tunisassiorfiup aqutsisoqatigiivi nutaat sulisumi sulliviini avatangiisit peqqinnartut atulersinniarlugit sammisassanik nutaanik aallarniipput.
- Timerput atorlugu sulilersinnata sulisut eqaarsaarnissaat peqqinnartuusoq isumaqaratta ullaat tamaasa sulinitta nalaani eqaarsaaqatigiittarpugut. Suleqatitsinnut ilaqutaannullu arfininngornerit tamaasa timersortarfeeqqami timersortitsineq aamma aallartipparput. Arfininngornerit tamaasa timersortitsigaangatta minnerpaamik inuit qulit peqataasarput, taamaammat iluatsilluarpoq, Jørgen Inusugtoq oqarpoq.
Qaammammi sulisutsialak
Royal Greenlandip tunisassiorfiani Kangaatsiamiittumi aqutsisoqatigiit, tassaasut tunisassiorfimmi ingerlatsisoq Jørgen Inusugtoq, sullissinermi aqutsisoq Martin Jerimiassen, tunisinermi aqutsisoq Ejner Jerimiassen, kiisalu keyuseri Oline Themothæussen 2019-imilu marsip aallaqqaataani atorfinitsinneqartut, sulisutik suliartortarnissaannik kajumissaarniarlugit qaammammi sulisutsialammik toqqaasarnissaq aamma atuutsilerpaat.
- Sulisugut aalajaallutik sulisarnissaannik kajumissaarniarlugit qaammammi sulisutsialammik toqqaasarnissaq atulerparput. Tamannalu iluatsilluarpoq, sulisummi arlaqartut siornatigut aalajaatsumik suliartorneq ajortut maanna ullut tamaasa suliartortalerput, ilaallu qaammami sulisutsialattut aamma toqqarneqarsimapput. Taamaammat sullivimmi avatangiisit peqqinnartuutinniarlugit suliniutigut iluaqutaapput. Taamaammallu aqutsisuusugut suliffitta Kangaatsiami suliffitsialattut toqqagaanera tulluusimaarutigeqaarput, Jørgen Inusugtoq oqarpoq.
Tunisassiorfimmi ingerlatsisoq 2019-imi suliffitsialattut toqqagaanerminni allagartamik nersornaasiunneqartartumik kiisalu pisiniarsinnaanissamut allagartamik 500 koruuninik nalilimmik tunineqarpoq.
- Juullilernerani tunisassiorfimmi nereqatigiinnissamut pisiniarsinnaanermut allagartaq atorneqassaaq, Jørgen Inusugtoq oqarpoq.
