Tunitsivinni aqutsisut Ilulissani katersuuttut

Royal Greenlandi katillugu 30-nik minnerusunik tunitsiveqarpoq, taakkulu sulisuisa amerlassusaat nunaqarfimmiit nunaqarfimmut allanngorarput. Aalisakkat assigiinngitsut najukkani umiatsiaararsortut tulaattagaat tunitsiviit tigoorartarpaat, taamaalillutillu inuiaqatigiinnut pingaaruteqarluinnarput. Tunitsivinni aqutsisut avannaani Kullorsuarmeersuullutillu kujataani Aappilattumeersuupput, imminnullu ungaseqigamik takukulaneq ajorput. Taamaammat tunitsiviit aqutsisui ataatsimiinnissaminnut qilanaarput, ataatsimiinnerullu ingerlarngata pilersarusiorneqarnera misilittakkanik unammillernartorpassuarnillu iluarsiinissamut isumassarsianik avitseqatigiinnissamut periarfissiilluarpoq.

- Qeqertarsuatsiaani tunitsiviup aqutsisuata Konrad Boyep sullivimmi avatangiisit pillugit unammillernartut isumannaallisaanermut ataatsimiititaliat ikiortigalugit qanoq aaqqiissuteqarfigisimanerai saqqummeeqqullugu aamma qinnuiginikuuarput. Tunitsivimmi sulisuni peqatigalugit periusissanik pilersitsinikuuvoq, taakkulu ajunngitsumik kinguneqarput, sulisoqarnermi siunnersorti Claus Nielsen, ataatsimiinnissamik aaqqissuussisuusoq, oqarpoq.

Atortut pitsaanerit

Sullivimmi pitsaasunik avatangiiseqarnissaq ataatsimiinnermi oqaluuserineqangaatsiassaaq. Royal Greenlandip 2020-mi ukiumilu tulliuttumi tamanna ukkatarinerussavaa. Piffissami kingullermi tunitsivinni isumannaallisaaneq pillugu Kalaallit Nunaanni Sullivinnik Nakkutilliisoqarfik arlallinnik peqqussuteqartarmat sullivimmi avatangiisit ukkatarineqarnerunissaat pisariaqartoq paasinarsivoq. Hans Larsen, sullivimmi avatangiisinut siunnersortaasoq, tunitsivinni atugassarititaasut pillugit paasissutissanik katersilluni ulapputeqarsimavoq, paasisanilu pillugit saqqummiissaaq. Kingorna Sullivinnik Nakkutilliisoqarfik sullivimmi isumannaallisaaneq, sulitilluni ajutoornerit ajoqusernerillu qanoq annikillisarneqarsinnaaneri pillugit saqqummiissaaq.

Royal Greenlandip tunisassiornermut imikkoortortaanut sammisaq taanna pingaaruteqarpoq.

- Sulitilluni ajoqusernerit ajutoornerillu annikillisarniarlugit iliuuseqarnerorusuppugut. Tunisassiorfimmi sulineq timikkut ilungersunarsinnaasoq ilisimaneqarpoq, tunisassiorfimmilu kivitsineq atortunillu nutarsarneqarsinnaasunik nutarsaaneq pillugit pitsaanerusumik aaqqiisoqarnissaanut ikiuutaarusullutalu suleriutsit sulinermilu timimik atueriutsit tulluarunnaarsimasut aaqqiivigineqarsinnaanerinik misissuerusuppugut. Tunitsivinni aqutsisut sumi pitsanngorsaasoqarsinnaanersoq aamma isummersoqatigiumavagut, Møller Lyberth oqarpoq. Taanna tunisassiornermut immikkoortortami ingerlatsisuuvoq ataatsimiinnermullu pilersaarusioqataalluni.

Sulisut tigummiinnarnissaat

- Sullivimmi ilorrisimaarnissaq pingaaruteqartoq ilisimaneqarmat sullivimmi avatangiisit eqqarsartaatsimut sunniisarnerat aamma ukkatarineqassaaq. Sulisunik tigumminniinnarnissamik anguniagaqarnermi sullivimmi avatangiisit pitsaasut pingaaruteqarput, sulisullu suliinnarumasut sullivimmi suleqatigiinnissamik nakussassaanissaq anguniarlugu pikkorissartitsisoqartarnissaa naatsorsuutigissavaat, Møller Lyberth ilassuteqarpoq.

Saqqummiisussat, tunitsivinni aqutsisunik eqqartueqateqartussat, Royal Greenlandip tunisassiornermut sulisoqarnermullu immikkoortortaaneersut arlaqarput.

Tikkili Ezekiassen, tunitsivimmi Attumiittumi aqutsisoq tunitsivinni aqutsisut ataatsimiinnerannut aappassaa peqataavoq, oqaluuserisassanullu isumalluarpoq.

- Ineriartornissarput anguniartuaannarparput, tunitsivinnilu aqutsisut ataatsimiinneranni sullivimmi ajornartorsiutaasinnaasut tamaasa eqqartornissaannut periarfissaqartarpugut. Tunitsivinni aqutsisut allat kisiisa peqatiginagit aammali qullersaqarfimmi sulisut peqatigalugit. Tunitsivinni aqutsisut ataatsimiinnerinit pissarsiaqarluartuaannarpugut, Tikkili Ezekiassen oqarpoq.

Tunitsivinni aqutsisut ataatsimiinnerat ullunik sisamanik sivisussuseqassaaq, arfininngornermilu novembarip aappaani 2019 ualikkut naammassissaaq.