APP-mut Uummannami tapersersuineq annertusoq
Royal Greenlandip pisanik nalunaarsuinermi App-ia Uummannami aalisartunit ajunngitsumik tigulluarneqarpoq, taama aalisarnermut siunnersorti Edvard Olsen oqaluttuarpoq. Maanna Uummannami Ilulissanilu aalisartut 72-it pisatik App-ikkut nalunaarsortarpaat, arlallillu tunisinermi periuseq atorniarlugu kissaatigaat.
Royal Greenlandip pisanik nalunaarsuinermut atortuutaa “Indhandling” Ilulissani aalisartut 19-nit Iphone-mik app-ertalimmik tunineqarmata ukioq kingulleq novembarimi atorneqalerpoq. Taakkua pisanik tunisinermi periuseq ajornannginnerulissanersoq misilerartussaavaat, tamaattoqartorlu erngertumik paasinarsivoq. App-i misilitsinnermini angusivoq. Maanna qaammatit sisamat qaangiutereersut aalisartut katillugit 51-it Ilulissani app-i atorpaat, aamma marsimi Uummannami aalisartut tullinnguullutik misileraatinneqarput.
Aallartinnissartik nuannarigaat
Aalisartut 21-it ilanngunnerisigut Uummannami app-imik soqutiginninneq annertusoq Royal Greenlandip aalisarnermut siunnersortaa Ilulissaniittoq, Edvard Olsen, app-imik inerisaaqataasimasoq oqaluttuarpoq. Taassuma suleqataatalu, umiarsualivimmi pisortap Maren Jensen-ip, app-imik atuutsitsilerneq ulluni– 2021mi marsip 8-niit marsip 16-iata tungaanut ilinniartitsissutigaat.
- App-imk atuilernermi periutsit allanngornerat pillugu ulluni siullerni marlunni sulisunut ilisarititsivugut, kingornalu app-ip atorneqarnissaanik ilinniartippagut, Edvard Olsen oqaluttuarpoq.
Tamatuma kingorna aalisartunut ilisarititsisoqarpoq, tamannalu ilimagisamiit ingerlalluarneruvoq.
- App-i pillugu ajunngitsorujussuarmik tusagaqareersimagamik aallartinnisarnertik nuannaraat. Uagut nammineq suleqatittalu saqqummiussagut tigulluarneqarput, aalisartunut inuusuttunut ilinniartitsineq sivikinnerusumik ingerlanneqarportaaq ersarippoq, taakkuami Facebook-imi app-it atornissaat sungiusimavaat. Tamanna ilimagisamit ingerlalluarneruvoq, Edvard Olsen qungujulluni oqarpoq.
Naammagisimaarinnittut
App-i atuinissamik ilinniartitsereernerup kingorna atorneqartussanngorpoq. Tamanna suleriaatsit sungiusimasallu allanngorneranik nassataqarpoq.
- Aalisartut app-i atorlugu pisanik nalunaarsuinermut nutaamik sakkussaqalerput. Sumi aalisarsimanertik suullu pisarisimanerlugit nalunaarutigisarpaat. Aalisartut pisatik umiarsualivimmut tulaakkaangamikkit angallamminiit niusariaqarnatillu pappiaqqanik immersuisariaarupput, sulisullu paasissutissat qarasaasiamut naqitertariaaruppaat. Pisat maannakkut taamaallaat oqimaalutarneqarlutillu kingorna akuerineqarpata aalisartoq erngertumik kontomi imaasa allattorsimaffianik app-ikkut nassinneqassaaq. App-ip paasissutissanik erngertumik nassiussisarnera aalisartut isertitatik pillugit malinnaasinnaallutillu naatsorsuuserinermik oqilisaanneqaramik nuannaarutigisorujussuuaat, Edvard Olsen nassuiaavoq, nangipporlu:
- Suleqatitta app-imik pisussat tullii nammineerlutik ilitsersuussinnaagaat takusinnaagatsigu Uummannamut angalanerput iluarusuutigisorujussuuarput. Siullertut aalisartut Iphonemik uagutsinnit piareersagaasumik pisussaammata attartornissamut isumaqatigiissuteqarfigisussaavagut. App-ikkut aaqqiineq arlaqartunit piumaneqarmat atuisut amerlinissaat naatsorsuutigaarput, Edvard Olsen oqarpoq.
App-i sinerissami aalisartunut neqeroorutigineqarumaarpoq, tamannali sumi qaqugulu pissanersoq oqaatigissallugu maanna siusippallaarpoq . Taamaammat paasissutissanik amerlanerusunik pissarsiniarlutit Royal Greenlandip nittartagaa malinnaavigiuk.
