Bootcamp – Ataatsimoorneq ineriartornerlu
Royal Greenlandimi ilinniartut arlallit 2021-mi novembarip aallaqqaataaniit tallimaanut Kangerlussuarmi ukiumoortumik bootcampertitsisoqarnerani peqataapput. Bootcampi inuttut ineriartornermut, teambuildingernermut Royal Greenlandimillu suliffeqarfittut ilisarititsinermut tunngasunik ukkataqarfiusoq. Ilinniartut 14-it Royal Greenlandimiillu pilersaarusiortut pingasut peqataapput.
Allattoq Inuuteq KriegelRoyal Greenland ilinniartunut sinerissameersunut tamanut ukiut tamaasa bootcampertitsisarpoq, ukiunili kingullerni tamanna Covid-19 peqqutigalugu ajornakusoorsimavoq. Bootcampi juunimi ingerlanneqartaraluartoq siorna taamaatiinnarneqarpoq, ukioq mannalu qaammatialunnik kingusinaarluni ingerlanneqarpoq, Ungaaq Abelsenimulli, Royal Greenlandimi ilinniarnermut siunnersortimut ukioq manna bootcampertitsineq iluatsilluarpoq.
- Unammillernartoqaraluartoq ingerlalluaqaaq. Covid-19 peqqutigalugu marluk peqataanngillat, aappaa ilinniartoq aappaalu ilitsersuisoq suliffeqarfimmut attuumassuteqanngitsoq. Kisiannili soorunami sillimareerpugut, taamaammat ingerlalluaqaaq. Peqataasut erngerlutik ataqatigiillualerlutillu attaveqatigiillualerput, Ungaaq oqaluttuarpoq.
Inuttut ineriartorneq assigiinngitsuunerlu
Bootcampimi sammisassat sungiusarnernik eqimattakkaarlunilu suliaqarnernik arlalinnik ilaqarput, pingaarnertulli imminut suliarineq, akisussaaffimmik tigusineq ilinniartullu akornini teambuildingerneq sammineqarput.
- Bootcampi inunnik allanik ilisimasaqalerfiugami nuanneqaaq. Taamaalilluni aamma nammineq siunissaq, Royal Greenlandimiinnaanngitsoq inuttulli namminertut siunissaq, ammaffiginerulernarpoq. Pikkorissarnerit imminut qiviarnermut tunngapput, taamaammat peqataaneq pissarsiaqarfiulluarpoq, Parnúna Nielsen Johansen Nuummeersoq oqaluttuarpoq.
Saffiuunngorniamut Nikki Hansenimut Sisimiuneersumut Royal Greenlandip suliffeqarfittut periarfissarpassuaqarnera eqiiallaffiuvoq.
- Ilinniartut allat ilisarisimalerpagut, suliffeqarfimmilu sulererpiarnersut paasisaqarfigaarput. Suliffeqarfimmi ilinniarnissamut periarfissat taamak amerlatigisut imaallaat paasivara, Nikki oqaluttuarpoq, nangipporlu:
- Isummersorsinnaatitaanerput tusarnaarneqarnerpullu aamma iluaqaaq.
Peqataasut tamarmik assigiinngitsunik tunuliaquteqarmata imminnut immersorsinnaasimanertik isumassarsinarsimasoq peqataasut apersorneqartut tamarmik oqaatigaat.
Bootcampimi aamma suleqatigiilluni pinnguaatit assigiinngitsut misilerarneqarput.
Aappaagumut piareersimaneq
- Naggasiullugu ilinniartullu nalilersueqatigiippugut, sapaatillu-akunnera ingerlalluarlunilu sammisassat pitsaasuusut ilinniartut isumaqarput. Atorluarsinnaasaminnik pissarsisimallutillu naammagisimaarinnipput, Ungaaq oqaluttuarpoq.
Sungiusarnerit eqimattakkaarlunilu suliaqarnerit saniatigut pikkorissarnerup ingerlanera tamaat peqataasuni unammiuaartoqarpoq, kiisalu bussinut ilaalluni angallassisulerluni Kangerlussuarmi takornariartoqarpoq.
Kangerlussuaq aamma takornariarneqarpoq.
Bootcampi ilinniarnermut siunnersortimit Ungaaq Abelsenimit, Sulisoqarnermi ineriartortitsinermut aqutsisumit Sara Biilmann Egedemit kiisalu Sulisoqarnermi ineriartortitsinermut siunnersortimit Claus Nielsenimit aaqqissuunneqarpoq.
Ilinniartunut aallartittussanut bootcampertitsinissap tullia aappagu juunimi ingerlanneqassasoq pilersaarutaavoq.
