Royal Greenlandip oqaluttuarisaanerani ukiup qiteqqunnerani angusat pitsaanerpaasa tullii anguneqarput

Ukiup qiteqqunnerani angusat pitsaasut pissuseqatigiiaanik aallussanik tassaasunik raajanik qalipalinnik, raajanik uusunik qalipaajakkanillu, qaleralinnik saarullinnillu niueruteqarnermik tunngaveqarput, saattuanilli Amerikami Avannarlermi niueruteqarneq pisarnermiit appasinnerummat unammillernartoqarpoq.

- Saattuat eqqaassanngikkaanni pissuseqatigiiaat aallussagut tunisaallualeqqikkamik Covid-19 sioqqullugu tunineqartut annertoqatigiinnangajappaat. Tamanna pitsaasuuvoq saattuanillu niueruteqarneq annertuumik unammillernartoqaraluartoq pitsaasumik angusaqarnissarput taamaalilluni qulakkeerneqarpoq, Royal Greenlandimi pisortaaneq Mikael Thinghuus oqarpoq.

Niuerfinni Amerikami Avannarlermiittuni saattuanik niueruteqarnerup unammillernartoqarnera pissutigalugu akileraannginnermi angusat nalinginnaasut 2021-mi angusat pitsaanerpaat naligissagaat naatsorsuutigineqanngilaq.

Pissuseqatigiiaalli aallussat allat niuerutigineqarnerisa ineriartornerat Covid-19 sioqqullugu angusatulli annertussuseqarnissaa naatsorsuutigineqarpoq.

Covid-19 tuniluunnerata nalaani illuatungaanik pisoqarpoq. Piffissami tassani pissuseqatigiiaat aallussat allat niuerutigineqarnerisa unammillernartoqangaatsiarneranni pingaarnertut saattuat niuerutiginerisigut ingerlatseqatigiiffiup tamakkiisumik isertitaqarnera qulakkeerneqarpoq.

- Niuerfinnut naleqqussartuarnissaq taamaalillunilu pissuseqatigiiaat assigiinngitsut niuerutigineqartut sunniivigeqatigiittuarnissaat pingaaruteqarmat nikerarnerit tamakku pissuseqatigiiaanut, uumasoqassutsimut niuerfinnullu tunngatillugu arlalinnik aallussaqarnitsigut periusissatut pilersaarutitta North Atlantic Championip patajaassusaa erserpoq. Soorlu raajanut, qaleralinnut, saattuanut kingullertullu peqqussuarnut inalugalinnullu periusissarput aamma taamaattoq, Mikael Thinghuus oqarpoq.

Nunarsuarmi aningaasaqarnerup nalorninartoqarnerani periusissatut pilersaarummi toqqammavigineqartup siammasinneranik angusat patajaatsumik ineriartortinnissaat qulakkeerneqarpoq, Royal Greenlandilu taamaalilluni nunatsinni nunanilu allani suleqatigisaminut kiisalu inuiaqatigiinnut kalaallinut tunniutiinnajuilluni tatiginarlunilu tapersersortaajuarsinnaavoq.

Ukiup qiteqqunnerani nalunaarusiaq pillugu uani paasisaqarnerusinnaavutit.

Ukiup aallartinnerani nalunaarutigineqartutuut pisortaaneq Mikael Thinghuus Royal Greenlandimi soraarumalluni siulersuisunut nalunaaruteqarnikuuvoq. Inuttassarsiuussineq siulersuisunit aallarnerneqartoq pilersaarutit malillugit ingerlavoq, siunissamilu qaninnermi naammassineqarnissaa naatsorsuutigineqarpoq. Mikael Thinghuus septembarip naanerani suliunnaassaaq, kingornalu aningaasaqarnermut pisortaq Nils Duus Kinnerup paarlatsissamik atorfinitsitsisoqarnissaata tungaanut pisortaaninngorallassaaq.

Paasissutissat sukumiinerusut perusukkukkit pisortaaneq Mikael Thinghuus oqarasuaammut +45 50 89 30 00-mut sianerfigisinnaavat.