Naruip Royal Greenland Japanimi pisisartunut qaninnerulersippaa
Royal Greenland suliffeqarfiuvoq nunani tamalaani immikkoortortaqartoq, sulisullu nunani assigiinngitsuniittut suliffeqarfissuaq ingerlatiinnarumallugu ullut tamaasa tunniussaqaqataasarput. Taakku ilagaat Hidehito Narui.
Allattoq Mathies Hvid ToftRoyal Greenlandip nunani tamalaani tuniniaanini ukiuni kingullerni annertusivaa.
Ingammik Kangiani, Japanilu nunaavoq Royal Greenlandip sivisunerpaamik immikkoortortaqarfiginikuusaa. Tassani annermik qalerallit, saattuat raajallu Issittup imartaaneersut tunineqartarput.
Hidehito Narui Japanimi tuniniaanermut ingerlatsisutut atorfeqartoq ukiuni arfineq-marlunngortuni Royal Greenlandimi sulisutut pingaaruteqarluinnartuuvoq.
- Tunisassiatta Japanimi nunanilu tamalaani tuniniarnerisigut Kalaallit Nunaata aningaasaqarneranut inuiaqatigiinnullu ineriartortitseqataasinnaagama tulluusimaarutigaara. Royal Greenlandip tuniniaaneratigut Kalaallit Nunaanni aalisartunut soqutigisalinnullu toqqaannartumik sunniuteqarsinnaavugut, Hidehito Narui oqaluttuarpoq.
Hidehito Naruip Japanimi niuerfinni, soorlu niuertarfissuarni igaffissuaqarfinnilu, pisisartut pingaarnertut attaveqarfigisarpai.
Pitsaassutsip qaffasissup tuniniaaneq annertusartarpaa
Royal Greenlandip tunisassiaasa pitsaassusaat qaffasippoq, tamatumalu toqqaannartumik sunniuteqarnera Hidehito Naruip arlaleriarluni aqqusaarsimavaa.
Assersuutigalugu pisisartup unammillertit ilaanni akikinnerusumik tunisassiaatilimmi pisisalerniarluni suleqatigiinneq taamaatissimavaa. Pisisartorli kinguninngua Royal Greenlandimut uteqqippoq.
- Pisuni taakkunani tunisassiatta pitsaassusersuat malugisaqaara. Tunisassiatsinnik passussisartut tamaasa sinnerlugit sinnerlugit tulluusimaartaqaanga, taamatuttaarlu tunisineq iluatsikkaangat naammagisimaarnartaqaaq, Hidehito Narui nassuiaavoq.
Tunisilluarneq Kalaallit Nunaat pillugu ilisimasanik siammarterisinnaavoq
Japanimi aalisakkanik qalerualinnillu nerisaqarneq qangaaniilli ilitsoqqussarineqarlunilu tulluusimaarutigineqarpoq.
Taamaammat tunisassiat pitsaalluinnartut pingaartinneqarlutillu atuisut pitsaassutsimut qaffasissumut akiliilluarusuttartuusut Mr. Hidehito Naruip ilisimavaa.
- Tunisassiat Atlantikup Avannaaneersut qaffasissumik pitsaassuseqarput, taamaammallu Japanimi piumaneqarluartarput. Tunisassiat taakku tuniniartarneri nuannaarutigaakka, tassungalu ilanngullugu Kalaallit Nunaata ilisimaneqarneranut siammartereqataanera nuannaarutigaara, Narui oqarpoq itisiliillunilu:
- Tunisassiaatigut pitsaasut amerlasuut Kalaallit Nunaannit nunanillu Atlantikup Avannaaniittunik allanik soqutiginnilernerannut iluaqutaassasut neriuutigaara.
Royal Greenland nunatta avataani 849-nik, tamarmik tunisassiatsinnik Atlantikup Avannaaneersunik tuniniaanermi suleqataasunik sulisoqarpoq. Royal Greenland Kangiani 36-nik sulisoqarpoq, taakkunanngalu 28-it tuniniaavitsinnut Japanimiittumut attuumassuteqarput.
