Niuerfinni nunani tamalaaniittuni tuniniaaneq ingerlanneqartarpoq
Royal Greenland nunatsinni aallussaqarluarpoq, nunarsuulli ilarujussuanut siammarsimavoq. Tassami tunisinerit annertuut nunani tamalaani pisarput aningaasallu nunatsinni inuiaqatigiinnut iluaqutaasussat taakkunani iluanaarutigineqartarput.
Allattoq Mathies Hvid Toft
Royal Greenland aalisakkanik qalerualinnillu tuniniaanermut tunngatillugu nunarsuarmi allanngorarfiusumi ilaavoq.
Taamaammat unammillerluarsinnaajumalluni nunani tamalaani allaffeqarnissaq pisariaqarpoq.
Bruno Olesen, Royal Greenlandimi suliffeqarfissuarmi tuniniaanermut pisortaq taama nassuiaavoq.
- Akit pitsaanerpaat pissarsiarissagutsigit, taamaalillutalu inuiaqatigiinnut iluaqutaasussamik sinneqartooruteqassagutta, nunani tamalaani suut piumaneqarnerunersut malinnaavigisinnaasariaqarpagut, Bruno oqarpoq.
Royal Greenlandip kaaviiaartitaasa 0,5 procentii ataallugit taamaallaat nunatsinni pilersinneqartarput.
Royal Greenland ilisimasanik pingaarutilinnik tuniorarpaa
Taamaammattaaq Royal Greenland nunani tamalaani pikkorissunik sulisoqartariaqarpoq. Niuerfiit sumut saqinersut paasinissaannut sulisut ikiuutaasinnaapput.
- Aamma periarfissanik nutaanik peqaleraangat malinnaasinnaassapput. Periarfissat nutaat tassaasinnaapput annertunerusunik piumasaqarnerit imaluunniit tunisassiatta toqqagassat allannguiffiginissaasa pisariaqalersimanerat, Bruno Olesen oqarpoq itisiliillunilu:
- Taamaalilluta akit pitsaanerusut pissarsiareratarsinnaallugillu nunani tamalaani unammillertitsinnut unammillerluarsinnaanerusinnaavugut.
Royal Greenland ilaatigut tamakku peqqutigalugit nunani assigiinngitsuni tuniniaaveqarpoq.
Royal Greenland pisisartunut qaninnerulerpoq
Royal Greenland eqqortumik oqaatigissagaanni nunani 15-iniit amerlanerusuni tuniniaaveqarpoq.
- Royal Greenland niuerfinni assigiinngitsuni sulisut najugaqavissut iluaqutigalugit pisisartunut qaninnerulerlunilu pissutsinut nalinginnaaleriartortunut malinnaasinnaavoq. Suliffeqarfissuup ukiuni kingullerni iluanaaruteqarneranut tamanna peqqutaaqataangaatsiarlunilu periusissatut pilersaarutitsinni pingaarutilittut inissisimavoq, Bruno Olesen nassuiaavoq.
Royal Greenlandimmi tuniniaanini patajaannerulersikkumallugu nunani assigiinngitsuni tuniniaanermik ingerlataqarpoq.
Royal Greenlandip niuerfigisartagaani annerpaaq ullumikkut tassaavoq Kina, nunanilli soorlu Europami, USA-mi Canadamilu, kiisalu Kangiani Amerikamilu Kujallermi annertuumittaaq tunisaqartoqartarpoq.
