Nunaqarfiga kusanartoq
Royal Greenland KNI-lu peqatigiillutik nuna tamakkerlugu ataavartumik naleqartitallu aallaavigalugit eqqagassalerinermik pilersitsinissamut suliniuteqarniarput.
Illoqarfitsinni, nunaqarfitsinni pinngortitamilu sumiluunniit eqqakkat piiarneqartariaqartut iginneqartariaqartulluunniit takusarpagut. Taamaammat nunaqarfinni eqqagassalerinermik ataavartumik pilersitsinissamut isumassarsianik nassaarnissaq kiisalu pitsaanerpaanik isumassarsisunut akissarsititsinissaq siunertaralugu ataatsimoorussamik suliniuteqarusuppugut.
Ulloq eqqagassanik katersiviusoq pineqanngilaq, siunissarli ungasinnerusoq eqqarsaatigalugu eqqagassat nunaqarfinni, illoqarfinni pinngortitamilu eqqarneqartartut annikillisinnissaannut suliniuteqarnissaq pineqarpoq.
Nunatsinni eqqagassat amerlanerpaartaat pisiniarfinni poortuutissanit, piniarnermit aalisarnermilu atortunit pisarput. Tassa imaappoq tamatta ulluinnarni pisariaqartillugit atugaralugillu pisiarisartakkatsinnit pisarput.
Eqqagassalli taamaattut pinngortitami amerlangaatsiarnerat ajoqutaavoq. Uagulli nammineq eqqagarigatsigit nammineerluta iliuuseqarfigisinnaavagut.
Itillermiut tassaapput eqqagassanik ajornartorsiummik aaqqiisimasut. Itillermi nunaqarfiullu eqqaani eqqagassamik ataasinnguamilluunniit takussaasoqanngilaq. Tamannarpiaq peqqutigalugu Itilleq aallaavittut atorlugulu Itillermiut isumassarsiorfigalugit suliniut ineriartortillugulu aaqqissussavarput.
Suliniutip ineriartortinnissaanut siullertut Royal Greenlandip KNI-llu Itillermiut katersortarfianni innuttaasunik ataatsimiisitsipput, matumanilu akunnialunni qanoq iliorlutik nunaqarfimminnik eqqiluissuutitsisarnertik kiisalu qanoq ilillutik ukiorpassuarni ataatsimoorussamik naleqartitaqalersimanertik oqaluttuaraat.
Royal Greenlandip KNI-llu juulip naanerani suliniummut atatillugu Itillermi filmiliornissaat tullinnguuppoq. Suliniut 2024-mi upernaakkut saqqummersinneqassaaq, ilaatigullu nuna tamakkerlugu unammisitsinermi nunaqarfiit aaqqiissutissanik pitsaanerpaanik siunnersuuteqartut ataatsimoorlutik akissarsiassaminnik annertuunik eqquisinnaajumaarput.
