Paasisaqarnerugit Aalisakkat tukertitaanngitsut

Saarullik Atlantikup Imartaaneersoq

Time:

Saarullik Atlantikup imartaaneersoq isseqarluartumik qaqqorissumillu nerpeqarnini, umamimik sakkukitsumik mamaqarnini assigiinngitsunillu nerisassiarineqarsinnaanini pillugu nunani tamalaani mamarineqarluarpoq

Saarullik Atlantikup Imartaaneersoq (Gadus morhua) nunarsuarmi aalisakkani ilisimaneqarnerpaat ilaat mamarluinnarami, nerpia suikkaasuugami immikkullu ittumik umamisunnissuseqarami piumaneqaqaaq. Saarulliup nunatta eqqaani Atlantikup Imartaaneersup nillertumi minguitsumilu alliartortanera sumiiffinniit allaniit arriinnerusarmat nerpia mamartumik tunguarnitsumillu mamaqalernissaminut piffissaqarluartarpoq.

Atlantikup Imartaaneersunit tunisassiat

Royal Greenlandip saarullik Atlantikup Imartaaneersoq tunisassiaa assigiinngitsunik aggorlugu pineqarsinnaavoq, aalisagarlu ilivitsuutillugu nerpinngorluguluunniit, ameqartiinnarlugu ameerluguluunniit saaniarlugulu tuniniarneqartarpoq. Aalisagaq allatulaaq aamma annikitsunngorlugu aggugaq ameqartillugu ameerluguluunniit imaluunniit assigiimmik angissusilinngorlugu aggorneqartarpoq. Saarullik Atlantikup Imartaaneersoq aammattaaq nioqqutissatut piareeriikkatut ooriaannaallugu, siatassanngorlugu qallikkatut, naqittakkamik qallikkatut imaluunniit mamarsaasikkalut aamma pineqarsinnaavoq.

Tunisassiat nalunaarsorsimaffiat

Saarullik Atlantikp imartaaneersoq immamiitilluni

Saarullik Atlantikup Imartaaneersoq Atlantikup avannaata Barentillu imartaani uumasuuvoq. Umiusaqarnini aminilu kusanartunik milaasalik immallu naqqani uumaffimmini atugassarititaasut malillugit allanngorartoq ilisarnaatigilluaramiuk ilisariuminartuuvoq. Immap naqqa qanillugu itissutsini meterit 50-iniit 200-t missaannik ititigisumi uumasuukkajuppoq imarlu nillertoq 2-10°C missaannik nillissusilik uumaffigiumanerusarpaa. Saarullik narrutuujunngilaq, Nunattalu imartaani annermik ammassannik raajanillu issittup imartaaneersunik nerisaqartuuvoq. Pissuseqatini minnerit nerisarlugit ilisimaneqarami sunilluunniit nerisaqarsinnaasuuvoq.

Saarulliup Atlantikup imartaaneersup uumaffii

Saarullik Atlantikup Imartaaneersoq Atlantikup avannaata Barentillu imartaani uumasuuvoq.

Saarullik Atlantikup imartaaneersoq marluk sisamallu missaannik ukioqaleraangami manniliorsinnaalertarpoq, avatangiisilli nillertut peqqatigalugit saarullik ilaatigut arfineq-pingasunik ukioqaleraangami aatsaat suffisinnaalertarpoq. Saarulliit assigiinngitsut sisamat Atlantikup imartaanin uumasuupput, uumasoqatigiillu tamarmik suffeqqaarfimminnut suffiartortarput. Ukiuunerata naaneraniit upernaap tungaanut imaq 1-imiit 8°C-imik kissassuseqartillugu suffisarput.

Sikuiuitsup imartaata avannaata kangiani saarulliit amerliartortutut nalilerneqarput, nungusaataanngitsumillu aalisartoqarpoq. Saarulliit Barentsip imartaaniittut, matumani saarulliit ilaat sej kullerillu saniatigut pisat, nungusaataanngitsumik aalisarneqartutut Marine Stewardship Councilimit 2015-imi akuerineqarput.

Aalisarneq

Saarullinnik Atlantikup imartaaneersunik aalisarneq sinerissap qanittuani avataanilu aalisarnertut taaneqarsinnaavoq. Saarullik Atlantikup imartaaneersoq sinerissap qanittuani pingaarnermik bundgarninik, najukkami aalisartut saarullinniutigisartagaannik, aalisarneqarpoq. Pisat kingorna aalisariummut qaqillugit tisariarlugit Royal Greenlandip tunisassiorfiinut tulaanneqartarput.

Bundgarnit

Najukkami aalisartut saarulliit Atlantikup imartaaneersut bundgarnit atorlugit pisatik qaqikkaat.

Avataani saarullinniarnermi kilisassutit atorneqartarput. Kilisassutit tassaapput qassuterujussuit aalisakkat, pissuseqatigiiaanik allanik ilaqakkajuttut, pisariniarlugit immap naqqatigut kalinneqartartut. Royal Greenlandip aalisarnermi avammut asuliinnaq eqqaanissaq pinaveersaartinniarlugu pisat tamaasa tunisassiarisarpai. Tamatuma saniatigut immap ataqatigiinnerata sapinngisamik ajoqusinnginnissaa siunertaralugu immap naqqani avatangiiseq aalisariutillu orsussamik atuinerat eqqarsaatigalugu kilisariaatsit pinngortitamut ajoqusiivallaanngitsut pillugit ilisimatusarneq ineriartortitsinerlu Royal Greenlandimit tapersersorneqarpoq.

Royal Greenlandip kilisaataataa Sisimiut

Kilisaataaterput Sisimiut saarullinnik Atlantikup imartaaneersunik aalisarlunilu kilisaammi tunisassiortarpoq, tassani aalisakkat qeritinneqannginnerminni pingaarnertut erlaviiarneqarlutillu niaquerneqartarput.

Aalisarnerput pillugu uani paasisaqarnerugit

Saarulliit Nutaaq®-tut tunisassiat immikkut pitsaassuseqartut bundgarnersornikkut aalisarneqartarput. Aalisartut qassutitik ulikkaaraangata aalisakkat uumatillugit qassutiminninngaanniit tatsiamut qassutinik ungalulimmut nuutittarpaat, taamaalioraangamillu namminneq qasutitik ungalunut ikkuteriarlugit aalisakkat eqqissisimasumik ungalunut ikaartittarpaat.

Royal Greenlandip kilisaataataa uumatitsivik sapaatip-akunneranut arlaleriarluni saarullinnik aallerlunilu tunisassiorfimmut Maniitsumiittumut ikaassisarpoq. Saarulliit tunisassiorfiup eqqussinissaata tungaanut tatsiani imermik tarajulimmik imilinniitinneqartarput.

Tunisassiorneq

Saarullik Atlantikup imartaaneersoq pisarineqaraangami tunisassiorfinni kilisaatiniittuni nunamiittuniluunniit tunisassiarineqartarpoq. Kilisaammi Sisimiumi saarullik nerpinngorlugu, ameqartillugu ameerluguluunniit saaniiarlugulu tunisassiarineqartarpoq. Aaalisakkat qaqinneriniit nerpii akunnerit sisamaniit arfinilinnut qaangiukkaangata qerisinneqartarput, taamaalillutillu nutaarsunnilluarlutillu qaffasissumik pitsaassuseqartarput.

Aalisartut saarullinnik pisaminnik Maniitsumi usingiaasut. Ulapaarfiup nalaani saarulliit Atlantikup Avannaata imartaanersut sila atoruminartillugu tunisassiorfimmut ullut tamaasa tunineqartarput.

Nunatsinni najukkani aalisartut qanimut suleqatiginissaat nunani tunisassiornitsinnut pingaaruteqarluinnarpoq. Pitsaassuseq qaffasinnerpaaq qulakkeerniarlugu pinasuartumik, kingusinnerpaamillu aalisakkat pisarineriniit akunnerit 24-t qaangiutsinnagit, tunisassiornissaq pingaaruteqarpoq. Taamaammat aalisartut saarulliit ullut tamaasa Royal Greenlandip tunisassiorfiinut tulaattarpaat, saarulliillu erlaviiarneqapallallutillu, aaviarneqapallallutillu sikulersorneqarniassammata naapertuuttumik tunisassiarinissaannut periusissiortoqarnikuuvoq.

Pitsaassutsimik nakkutilliineq

Saarulliit Atlantikup Avannaata imartaaneersut nerpiinik Royal Greenlandip tunisassiaa qeritinneqartinnagu, poortorneqartinnagu pisisartutsinnullu nassiussuunneqartinnagu pitsaassusaa misissorneqartarpoq.

Saarullik poortorneqartinnagu qerinasuartinneqartinnagulu ameqartillugu ameerluguluunniit, saaneqartillugu saaniiarluguluunniit tunisassiorfimmi nerpinngorlugu tunisassiarineqartarpoq. Kinami nerpiit kipparissunngorlugit, paperunngorlugit assigiimmillu angissusilinngorlugit aggorneqariarlutik tunisassiareqqitassanngorlugit Koszalinimut Polenimiittumut nassiunneqartarput. Aammattaaq tunisassiorfik ataaseq nunatsinniittoq saarullinnik tarajortikkanik, Spaniamut Islandimullu toqqaannartumik tunineqartartunik, tunisassiortarpoq.

Royal Greenlandip saarullinnik tunisassiai Nutaaq™ pitsaassuseq qaffasinnerpaaq qulakkeerniarlugu immikkut ittumik tunisassiarineqartarput. Nutaaq™-nik tunisassiorfimmi saarulliit nalullutik tunisassiorfiup iluanut apuukkunik immamiit qaqinneqarnerminniit akunnerit marluk iluini toqunneqarlutillu, aaviarneqarlutillu nerpiliarineqartarput. Saarullinnik Nutaaq™-tut tunisassioriaaseq immikkut ittoq atorlugu tunisassiornikkut tunisassiaq nutaarsunninnerullunilu, nerpia qaamanerullunilu mamarnerusarpoq.

Saarulliit Nutaaq®-tut tunisassiat pillugit uani paasisaqarnerugit

Niuerfinnut aqqutaa

Tunisassiat piariikkat tunisassiorfinniit, assersuutigalugu nunatsinniit Polenimiilluunniit, niuerfinnut toqqaannartumik nassiunneqartarput. Ukiuni kingullerni saarulliit piumaneqarnerat annertusisimasoq Royal Greenlandimi paasineqarpoq. Atuisut Tuluit Nunaanniittut USA-miittullu saarulliit Atlantikup imartaaneersut piumalluarpaat, taakkununngalu tulliupput Spania, Portugal aamma Sverige.

Saarullik Atlantikup imartaaneersoq iggavimmi

Saarullik Atlantikup imartaaneersoq nunarsuarmi aalisakkani ilisimaneqarnerpaagunarami assigiinngitsunik nerisassiarineqarsinnaanini mamarluinnartuuninilu pissutigalugit qangarsuaaniilli piumaneqarluarpoq. assigiinngitsunik nerisassiarineqarsinnaanini mamarluinnartuuninilu pissutigalugit nunani tamalaani ilaqutariinnit mamarineqarluarpoq. Saarulliup Atlantikup imartaaneersup orsoqassusaa, proteineqassusaa kaloriaqassusaalu imminnut naleqquttumik agguataarluarsimapput, aammalu selenimik,B12-imik B6-imillu akoqarluarlunilu orsumik omega-3-mik annikitsumik akoqarpoq.

Qaqqorissoq isseqarluartorlu

Nerpiit ooqanngitsut panertinnaveersaarlugit poortorneqartarput. Kissarpallaanngitsumik uukkit, nerpiullu isseqaannarnissaa anguniarlugu sivisuallaanngitsumik uukkit.

Saarullik Atlantikup imartaaneersoq nillertumi arriitsumik alliartortarami mamassutsimigut kimeqarluarpoq. Immami nillertumi alliartortarami nerpia issorsimalluartuullunilu nerisassiarineqarsimatilluni ooqanngitsuutillunilu qaqqorissuusarpoq. Nerpia takisuunik naggutaasanilluni isseqarluarlunilu avittartoq tunguarnilaartumik mamaqarpoq. Saarullik kimikitsumik mamaqarami immuttalinnik miseqqissallugu akoqarluartunilluunniit nerisassiornermi atussallugu naleqquppoq.