Saarulliit Nutaaq®-tut tunisassiat
Royal Greenland saarulliit pitsaassusaat qaffanniarlugu aalisariaatsimik tunisassioriaatsimillu nutaarluinnarmik pilersitsivoq. Saarulliit "Nutaaq"-tut tunisassiat nutaarsunninnerugamik, qaqqorinnerugamik mamarnerugamillu pitsaassutsimik nutaamik pilersitsipput.
Saarulliit Nutaaq®-tut tunisassiat immamiit qaqinneqarneriniit qeritinneqarnerinut akunnerit annerpaamik marluinnaasarmata saarullinnik tunisassioriaaseq nutaarluinnaavoq. Nutaaq® nutaarsunninnerugami, qaqqorinnerugami mamarnerugamilu saarullinnut pitsaassutsimik uuttueriaasermik nutaamik pilersitsivoq
Saarulliit nunatta imartaaneersut
Saarulliit nunatta imartaaneersut nillertumik minguitsumillu avatangiiseqaramik qaqqorissumik nerpeqarlutillu mamarluinnartuupput. Saarulliit tunisassiat suulluunniit pitsaassusaat nalilissagaanni uku marlussuit apeqqutaapput: Aalisakkap suminngaanneerfia uumaffialu aamma immamiit qaqinneqarneraniit nerrivimmiilernissaanut qajassuartumik sukkasuumillu suliarineqarnera.
Nutaaq®– tunisassioriaaseq nutaarluinnaq
Royal Greenland tunisassioriaatsimik nutaamik pilersitsinissamut aningaasaliinikuugami najuakkani aalisartut suleqatigalugit mamarluinnartumik tunisassiornissamut periuutsimik nutaamik pilersitsivoq.
Taaguuserparput Nutaaq®– Royal Greenlandimi saarullinnut pitsaassuseq nutaaq immikkuullarissorlu naqissuserniarlugit. Nutaaq™ aalisarnermiit nioqqutissamut piariikkamut passussineq siunertaq ataaseq, tassa aalisakkap qaqerlaap pitsaassusaata pigiinnarnissaa, anguniarlugu saarullinnut pitsaassutsimik qaffaataavoq.
Saarullinnik Nutaaq®-tut tunisassiassanik aalisarneq
Saarullinnik Nutaaq®-tut tunisassiassanik aalisarneq ukiup ingerlanerani qaammatialuinnarni, apriilimiit oktobarimut, saarulliit imaannarmiit sinerissap qanittuanut ikkattumut suffiartoraangata ingerlanneqartarpoq. Najukkani aalisartut saarullik qassutinut pulareeruni anillaqqinnginniassammat qassutitik qaarsup nalaani immamiitittarpaat. Aalisariaaseq qangatoorpoq qajassuartumillu ingerlanneqartarluni, taamaalilluni aalisakkat aalajangersimasut pisarineqarlutillu avatangiisit eriagineqartarput.
Qassutit ulikkaaraangata aalisakkat aalisarfimmut ungasinngitsumik tulattarfimmi tasertanut angisuunukaallugit assartorneqartarput. Tassani aalisartut qassutitik periuseq siittartumut assingusoq atorlugu imaartarpaat, tassa saarulliit immamiit qaqinneqaratik qassutiniit tasertamut nuunneqartarmata.
Royal Greenlandip kilisaataataata uumatitsiviup saarulliit tasertanit katersortarpai, tassanilu saarulliit immikkoortiterasuarneqartarput. Aalisakkat 45 cm-iniit minnerusut immamut uterteqqinneqartaramik suffillutik siunissami saarulleqassutsimut iluaqutaasinnaapput.
Kilisaatip uumatitsiviup saarulliit annerit kingorna isumannaatsumik qajassuartumillu tunisassirfimmi tasertanut taarserartumik imartalinnut assartortarpai. Aalisakkat tunisassiorfiup tunisassiorsinnaalernissaanut eqqissisimanartumik avatangiiseqarlutik tasertaniitinneqartarput. Aalisakkat suliarineqalernerminni eqqissisimanissaat nerpiisa pitsaassusaannut pingaaruteqarluinnarmat eqqissisimanartumik avatangiiseqarlutik unnuiseqqaarneqartuaannarput.
Kilisaatip uumatitsiviup saarulliit uumasut aalisartup qaasutaanit uumatitsivimmiit toqqaannartumik nuuttarpai.
Saarullik kusanartoq ima Nutaaq® -nngortarpoq
Sukkasuumik qajassuartumillu suliarinninneq saarulliit nerpiinut Nutaaq®-tut tunisassiat pitsaassusaannut immikkuullarissumut peqqutaavoq. Saarulliit piffissanngoraangat tunisassiorfimmut toqqaannartarput. Tassani aatsaat ilisimajunnaarsinneqartarput, kingornalu erngertumik tisaneqariarlutik nerpiisa erngerntumik aaverunnissaat qulakkerniarlugu imermi nillaarissumi aaviarneqartarput. Taamaaliornikkut pitsaassutsimik assigiissaartuullunilu nerpiit aappaluttumik simerneqannginnissaat qulakkeerneqartarpoq.
Saarulliit kingorna erlaviiarneqarlutillu nerpiliarineqartarput, taamaaleriarlugillu assaannarmik avaleraajarneqartarput. Suleqatigiit agguisartut pikkorilluinnartut nerpiit tamaasa ataasiakkaarlugit aappaluttumik simerneqarnersut nerpiilu qulloornersut misissoqqissaartarpaat, taamaattoqassagaluarpammi nerpiit tunisassiatut "Nutaaq®"-tut taaneqarsinnaanngillat.
Qaqqorissunik kusanartunillu nerpiliornissaq qulakkeerniarlugu agguisoqatigiit milittagallit nerpiit tamaasa assaannarminnik agguisarput.
Saarulliit nerpii uumallutik immamit qaqinneqarnerminniit annerpaamik akunnerit marluk qaangiukkaangata qeritinneqartarput. Kingorna qerinasuartinneqariarlutik nunani tamalaani atuisunut pitsaassutsimik pingaartitsisunut nassiussoriaannanngorlugit najoqqutassat naapertorlugit poortorneqartarput.
Saarulliit Nutaaq®-tut tunisassiat aqilutillu, kimeqarluarlutillu immikkuullarissumik nutaarsunnikkamik immikkut ittumik pitsaalluinnartuupput, taamaammallu igasut nerisassiortullu allat nerisassianik mamarluinnarlutillu illinnarluinnartunik pilersitsisinnaapput.
