Eqaluk
Eqaluk procentinik 5-iniit 15-inut orsumik akoqarami, D-vitamineqarluarami Omega 3-qarluaramilu nerissallugu peqqinnartuuvoq.
Eqaluk (Salvelinus alpinus) issittup imartaani uumasuuvoq, aalisakkallu nerpia aappalaarujuttoq igasunit nunanit tamalaaneersunit piumaneqarluarpoq. Aalisagaq aasami sivikitsumi immami nilleqisumi arriitsunnguamik alliartortarpoq. Eqaluk nunatsinni nerisassat peqqinnartut mamarluinnartullu ilagaat, tassami uullugu, siallugu, pujuugaliaralugu tarajorterlugulu nerineqartarpoq.
Eqalunnit tunisassiat
Aalisartut kujataani Paamiuniit avannaani Qaanaamut eqaluit annikitsukkaat Royal Greenlandimut tunisarpaat. Eqaluup atortui tamapajaamik atorneqarsinnaapput, taamatuttaarlu ilivitsuutillugu uulliatulluunniit tunisassiarineqartarpoq.
Eqaluk immami
Eqaluk aalisagaavoq immami nillertumi, Issittup nalaani uumasuuvoq, Europallu avannaani, Amerikami Avannarlermi Kangiatalu avannaani imermi tarajoqanngitsumi uumasuuvoq. Aalisakkap qaava taartuusoq sanerai kajortut taartuullutillu qorsuusinnaapput, aalisakkalli ilaasa sanerai aamma qaamasuusinnaapput. Aqajaa aappaluttuullutnilu, sungaartuullunilu qaqortuusinnaavoq.
Eqaluk ukiami kuut sikutinnagit kingusissukkut suffisarpoq, aalisakkallu aqajaa, sanerai alliit avaleraalu suffinerata nalaani aappillertarput. Ujaqqat ujaraaqqallu akornanni meterit 3-niit 5-inut, itinerusumiluunniit, suffisarpoq. Aalisakkat amerlanerit kilo ataaseq aappaaluunniit avillugu oqimaassuseqakkajupput, kiloniillu marlunniit oqimaannerusut angisuutut nalilerneqartarput. Eqaluit immami nuttarlutik uumasuusut imermi tarajoqanngitsumi suffisartuupput, nuttanngitsulli imermi tarajoqanngitsumi taamaallaat uumasuupput.
Aalisakkat amerlanerit aggustip qaammataani kuunni majortarput, kingornalu septembarip qaammataani suffisarfimminniittarput.
Eqaluit amerlanerpaat immami nuttarlutik uumasuusut pingaarnertut ammassannik, raajanik kingunnillu nerisaqartuupput. Aalisakkat kangerlunni imarluttuni qalerualinnillu uumasoqanngingajavittuni – illuatungianillu ammassappassualinni - allinerusarput.
Aalisarneq
Eqaluk nioqqutissatut tunisassiarineqarneq ajorpoq, nunaqavissullu qamarmik killeqanngitsumik aalisarsinnaavaat. Aalisagaq mamarluinnartoq juunip qeqqaniit aggusti ilanngullugu aalisarneqartarpoq. Ileqqutoqqatut aasaanerani aalisariarnermi aalisarneqartartut pingaarutillit ilagaat, taamaalillutik kuut aalajangersimasut ilaat ilaqutariinnit kinguaariippassuarnit aalisarfigineqartarput.
Eqaluk ullumikkut killilimmik inuuniutitut aalisarneqarpoq, taamaakkaluartorli najugaqartunit pinngitsoorneqarsinnaananilu piumaneqartuarami qassutinik aalisarneqartarpoq. Qassutinik eqalunniarnermi illoqarfinniit nunaqarfinniilluunniit ungasingaatsiartumukaqqaarluni ullumikkut aalisartoqartariaqarpoq, tassami ullumikkut umiatsiat sukkasuuliat qassutillu nutaaliat atorneqalermata taamaaliortoqartariaqarpoq.
Niuerfinnut aqqut
Umiatsiaararsorlutik aalisartut pingaarnertut eqaluttaminnik Royal Greenlandip tunisassiorfiinut tunisisarput. Eqaluk annikitsukkaarlugu tunineqartarpoq, kingornalu ilivitsuutillugu uullilluguluunniit nunatsinni niuertarfinnut, igaffinnut minnernut kiisalu nerisarfinnut annerumaanut neriniartarfinnullu tunineqartarpoq. Eqaluit Danmarkimi Kalaallit Illuinit Kalaallillu Peqqissartut Illuannit aamma piumaneqarluarput.
Aliikkutaralugu aalisartutut nammineq nerisassanik eqalunniarneq ukiuni kingullerni soqutigineqaraluttuinnarpoq.
Eqaluk iggavimmi
Eqaluk ukiuni untritilippassuarni inunnit mamarineqarluarpoq, tamannalu paasinarpoq, tassami sakkukitsumik asseqanngitsumillu mamaqarpoq. Aalisakkap nerpia aappalaarujuttuusoq assigiinngitsorpassuarnik nerisassiarineqartarpoq, soorlu uullugu, siallugu, pujuugaliaralugu tarajorterluguluunniit.
Aasaanerani ileqqutoqaq suli attanneqarpoq. Ilaqutariit aalisakkat qaqerlaat killumut ooriarlugit ujaqqamut amitsukujuumut kuillugit assaannarmik nerineqakkajupput.
