Tapiissutit pillugit politikki

Royal Greenlandimi tapiissutit pillugit politikkimi nunatsinni inuiaqatigiinni pitsaasumik ineriartornissap tapersersornissaa siunertaavoq, sammisallu uku tapersersorneqarput:

• Meeqqat inuusuttullu amerlanerusut meeqqat atuarfiat naammassigaangamikku pikkorissaqqinnissaat siunertaralugu ilaqutariit meeqqaminnik efterskolertitsisussat oqaatsinilluunniit pikkorissariartitsisussat aningaasatigut tapiissuteqarfiginissaat
• Ivalu & Minik fonden ukiumoortumik tunissuteqarfigineratigut inuusuttut nunani tamalaani ilinniagaqarumasut tamakkiisumik ilaannakortumilluunniit aningaasatigut tapiissuteqarfiginissaat
• Inuusuttut suliffeqanngitsut oqaatsit, pinngortitaq pillugu ilinniartitaanerit, kisitsisilerinermik ilinniartitaanerit kiisalu ilinnialernissamut pikkorissarnerit karakteriminnik qaffassaanissaannik periarfissinneqarnissaat siunertaralugu atortunik inaallagiatortunik pisinissamut imaluunniit oqaatsinik pikkorissariarluni atuartorluniluunniit angalanissamut aningaasaqarnikkut tapiissuteqarfiginissaat
• Kalaallit Nunaanni Timersoqatigiit Kattuffiat tapiissuteqarnissamut isumaqatigiissuteqarfigineratigut aammalu ukiut tamaasa pisartup Arctic Circle Racep ukiumoortumik tapiiffigineratigut kiisalu nunanut allanut unammisartut Elite Sport Greenlandimit toqqakkat ukiumoortumik aningaasatigut tapiiffigisarnerisigut meeqqat, inuusuttut inersimasullu timersortartut timersornermik sammisaqarnissaasa annertusarnissaat
• Meeqqat pisinnaatitaaffiinut sullissivik, MIO suleqatigiinnissamut isumaqatigiissuteqarfigineratigut meeqqat pisinnaatitaaffii pillugit ilisimasat siammarterlugillu pitsanngorsarnissaat
• Meeqqat inersimasullu inuuniarnermikkut unammillernartoqartut, soorlu angerlarsimaffeqanngitsut, tunngaviusumik pisariaqartitanik allanik amigaatillit, persuttagaanermik eqqugaasimasut il.il. sammisassaqarnissaannut aningaasatigut tapiinikkut nuannersumik misigisaqarnissaannut periarfissinnissaat
• Katersuiniarnerni, soorlu nuna tamakkerlugu ikiuiniaqatigiiffiup Neriuffiup katersuiniarnerani, aningaasanik tapiissuteqarnikkut innuttaasunut napparsimasunut atugassarititaasut pitsanngorsaaviginissaat
• Katersuiniarnernut aaqqissuussinernullu Royal Greenlandip tunisassiaanik tunissuteqarnikkut kattuffiit, atuartut soqutigisaqartullu allat anguniakkaminnik piviusunngortitsinissaannut peqataanissaq
• Paarisa, Namminersorlutik Oqartussani Pitsaaliuinermut Isumaginninnermullu Aqutsisoqarfiup ataani immikkoortortaq, suleqatigiinnissamut isumaqatigiissuteqarfigineratigut Royal Greenlandip attaveqaatit atugai aqqutigalugit peqqinnartumik nerisaqarnissamut ileqqunik siammarteralunilu siuarsaanissamut peqataaneq