Pisuussutinik sapinngisamik atorluaaneq
Tunisassiassat perlukui nioqqutissaniit nalinginnaasumik tunisassiarineqartartuniit allaanerusarmata saniatigut pisat atorluarnissaat unammillernarpoq
Aalisakkat imarmiittut annertussusaat killeqarmata aalisakkap pisarineqarnerminiit sapinngisamik atorluarnissaanut pisussaaffeqarpugut.
Aalisakkat qaleruallillu tunisassiarisartakkatta atorluarneqarnissaat pillugu akisussaaffimmik tigusiumavugut. Matumani saniatigut pisat atorluarneqarneruneratigut inuussutissanik nutaanik pilersitsisoqarlunilu soorluttaaq proteininik uulianillu tunisassiornermi imermit atorneqartumiit piiaaneq nerukkaasiornermi akuutissiornermiluunniit periarfissanik nutaanik pilesitsinnaasoq.
Nalorninartut periarfissallu
Tunisassiornermi sinnikut pillugit unammillernartut tassaapput sinnikut tunisassiarineqartartuniit allaanerunerujussuat. Amerlanertigut sinnikunik atorluaaniaraanni teknologii immikkuullarissoq atorlugu imaluunniit assaat atorlugit passussingaatsiarneq pisariaqartarpoq, taamaammallu igitsinissaq periarfissatuaalersinnaasarpoq.
Aalisagaq nerpittaajarneqaraangat niaqua, amia qimerlualu sinnerutissapput, peqqunnillu, soorlu raajanik saattuanillu, qalipaajaanermi qalipappassuit sinnerutissapput. Nutaaliornikkut, aningaasaliinikkut ajornanngippallu avataaneersunik suleqatiserinnillunilu isumalluutinik pitsaanerusumik inississuinikkut atorluaanerulluni tunisassiortoqarsinnaavoq.
2022-mi iliuutsit inernerillu
Ukioq 2022 saarulliit niaquinik Maniitsumeersunik panersigassatut aalisarnermilu neqitassatut tuniniarneqartartunik tunisaqarfiulluaqqippoq.
Newfoundlandimi aalisakkat amiinik panertitsilluni angerlarsimaffimmi uumasuutinut nerukkaatissatut tunisassiorneq misilerarneqarsimavoq. Tunisassiaq pitsaasorujussuullunilu misilerarneqarnikuuvoq, isumassarsiarlu ingerlateqqinneqarsinnaasoq paasineqarpoq.
Nutaaliornermut immikkoortortaq 2022-mi pilersinneqarpoq, tassanilu tunisassiassat nutaamik tunisassiaralugillu tunisassiassat atorluarnerunissaat ilanngullugu sulissutigineqartarpoq.
2019-2022-mut anguniakkat piviusunngortitsinerillu
Anguniakkat:
- Suliffeqarfissuarmi tunisassiassaasinnaasut atorluarneqarnerisa minnerpaamik 80 %-inut qaffannissaat
- Tunisassianik nutaanik iluanaaruteqarfiusinnaasunik pilersitsinissaq
- Imikumik kuutsitsinikkut qalipakunik aalisakkallu sinnikuinik eqqaanermik annikillisaaneq
Anguniakkanik naammassinninneq:
Tunisassiassap 70 %-ia tunisassiarineqarsinnaasoq piffissami misissuinerup inernerisa takutippaat, matumanilu sinneruttut maanngaannartitat, erlaviit immikkoortukkaallu tunisassiarissallugit ajornakusoortupilussuit naatsorsuinermut ilaatinneqarput. Nunami tunisassiorfiusuni tunisassiassat 80 %-iisa atorluarnissaannut anguniagarput ajoraluartumik angusimanngilarput.
Tunisassiassat 40%-iisa missaat atorluarneqarsinnaassusaat 90%-nit qaffasinnerusoq nunatsinni tunisassiorfinnut tunisassiassat atorluarneqarsinnaanerannut misissuinerup takutippaa, taakkununngalu qalerallit ilaapput.
Tunisassiorfinni Newfoundlandimiittuni saarulliit tunisassiarineqartut sinnikui, niaqui, qimerlui perlukullu angerlarsimaffimmi uumasuutinut nerukkaatissanik niuerfimmut imaluunniit neqitassatut tuniniarneqartaramik atorluarneqangaatsiarput. Tamatuma saniatigut saattuat raajallu qalanneqaraangata qajoq aalartillugu miseqqiassatut (skaldyrsfond) ukiorpaalunni tunisassiarineqartarpoq.
Raajat saarulliillu sinnikuinik misileraanermi suliniutit arlallit ingerlanneqarnikuupput. Royal Greenland taamaalilluni EU-mi suliniummut ukiuni sisamani ingerlanneqartussamut, Waseabi-mut, peqataavoq, matumanilu sinnikut atorlugit tunisassianik nutaanik, soorlu assersuutigalugu proteininik, mineralinik kiisalu teknologii ilisimatusarnermik tunngavilik atorlugu tunisassiat tunisassiarinissaannut periarfissat misissoqissaarneqartarput. Pingaarnertut suliniutigineqartut ilaat tassaavoq saattuat qaleruaannik panertitsilluni neqitassanik ineriartortitsineq.
Ilulissani raajat qalipaannik qajuusiorluni immikkut ittumik tunisassiortoqartarpoq. Sulili raajat qalipaasa ilaat arrorlutillu siaruartarnermikkut katersorneqarsinnaanatik imermut maanngaannartumut pisarput. Taamatut pisoqartarnerata annikillisarnissaa anguniarlugu siornatigut iliuuseqartoqarsimagaluarpoq, matumanili angingaatsiartumik atortoqartariaqarnera tunisassiallu piumaneqarnerata annikillisinnaanera ajornartorsiutaavoq.
2030-mut akorusutat
Suliffeqarfissuup nunami tunisassiorfiini kilisaatinilu tunisassiassaasinnaasunik tamakkiisumik atorluaaneq.
