Newfoundlandimi peqqussuarniarnerup pitsanngorsaavigineqarnerani (FIP) ingerlariaqqinnissaata tullia aallartinneqarpoq

Royal Greenlandip peqqussuit Newfoundlandimeersut nioqqutissaatitut 2018-imi ilisaritippai, tunisassioriaaserlu ajornanngisaagaammat peqqussuit aapasut qerisullu nioqqutigineqarnissaat periarfissaalerpoq. Kingorna angorusutat niuerfinnilu piumaneqarneri annertusiartorput, maannalu Conchemi, New Harbourimi aamma Southern Harbourimi tunisassiorfeqalerpugut. Taamaalilluta peqqussuit aapasut uutallu ullumikkut nioqqutigisinnaallugillu New Harbourimi tunisassiorfimmi nutaaliaasumi peqqussuarnik uumatitanik tunisassiorsinnaanngorpugut.

Peqqussuarnik nioqquteqarnerup annertusigaluttuinnarnera pissutigalugu aalisarnerup MSC-tut akuerisaanissaa kissaatigineqaleraluttuinnarpoq. MSC-tut akuerisaanissamut naliliiffigineqarnissaq siunertaralugu misissuineq tunngavigalugu suleqatigiinnik aalisarnerup pitsanngorsarnissaanut sinaakkutissaanik pisarialinnik misissuisussanik siorna pilersitsisoqarpoq.

Suliniut ingerlariaqqinnissamut tullermut piareerpoq

Suliniummi sinaakkutit pilersinneqartut tunngavigalugit suliniut killiffimmut tullermut ingerlaqqippoq, tassalu tunisassiortut ASP sinniisoralugu MSC-mik suleqateqarneq ingerlatissavaat.

”Raajat issittup imartaaneersut Canadami aalisarneqartuni siulliullutik MSC-tut akuerineqarput. Tamanna 2008-mi pivoq. Saattuat tulliullutik 2013-imi MSC-tut akuerineqarput, taamatuttaarlu saarullinnik aalisarnermik pitsanngorsaanermi ASP aamma suleqataavoq. Raajat MSC-tut 2008-mi akuerisaanerat naammagisimaarnarluinnarpoq aalisarnerillu tamarmik nungusaataanngitsumik ingerlanneqarnissaat qulakkeerniarlugu pissuseqatigiiaat aalisarneqartut akuerisaanissaat anguniarlugit tulleriiaassavagut.”, ASP-mi pisortaaneq Derek Butler oqaluttuarpoq.

Niuerfiit pingaarnerit tassaapput USA aamma Europa, MSC-llu ilisarnaataa tungujortoq aalisakkanut saattuanullu Newfoundlandimi Labradorimilu aalisarneqartartunut nersornaataavoq pingaaruteqartoq – tamannalu aamma peqqussuarnut atuuppoq.

”Pinngortitami ataqatigiinnerup allanngornera pissutigalugu Newfoundlandimilu peqqussuaqassutsip annertusiartornera ilutigalugu peqqussuarniarneq annertusiartorlunilu nungusaataanngitsumik nioqqutigineqalersinnaaneranik kissaateqartoqaraluttuinnarpoq. Aalisarnermik pitsanngorsaanermik suliniutip nungusaataanngitsumillu aalisarnerup aalisarnermik naalakkersuinermik suliaqartunit ukkatarineqarnera iluaqutigalugu maanna siunissamilu aalisarnerup nungusaataannginnera qularinngilarput. Royal Greenlandip aqqutissiuussinera pillugu nersualaartariaqarlugulu aalisarnermik pitsanngorsaanissap aallartinneqarnissaa, anguniakkat aalajangersarneqartut angunissaat naliliillunilu misissuinermi amigaataasut suussusersinissaat piareersimaffigaarput.” Derek Butler naggasiivoq.

Aalisarnermik pitsanngorsaalluni suliniuteqarnermi anguniakkat aalajangersarneqartut ukiut sisamat ingerlanerini anguneqarnissaat siunertaavoq, taamaammallu suliniutip 2024-mi marsimi naammassineqarnissaa naatsorsuutigineqarpoq.