Aalajaatsunik sulisoqarneq siuariaateqartitsivoq

- Aalajaatsunik sulisoqarnerput pissutigalugu ataavartumik tunisassiorsinnaasimallutalu ataavartumik tunisassiornerput nangissinnaavarput, taamaattumik aalisartut 2017-imisulli tunisinissamut isumaqatigiissuteqarfigeqqaarata tunisiartorfigisinnaavaatigut. Taamatuttaaq aalajaatsunik sulisoqarnerput pissutigalugu qalerallit nerpiinik tunisassiornerulerpugut, tamannalu 2018-imi nangiinnarsinnaavarput. Tamanna Royal Greenlandip tunisassiat nalitusarneqarnissaannut anguniagaqarneranik tunngaveqarpoq, taamaammat Royal Greenlandip Uummannami tunisassiorfiani nunaqavissunik Kinamiunillu 14-inik aalajaatsunik sulisoqarnerput usorsisimaarutigaara, Royal Greenlandip Uummannami tunisassiorfiani ingerlatsisoq Kirsten Kristensen Worm oqarpoq.

Qalerallit nerpiinik tunisassiornerulerneq

Royal Greenlandip Uummannami tunisassiorfiani sulisut massakkut 50-it missaanniipput, ulapaarfimmilu 85-iniit 100-usarput. Kinamiut 14-it Royal Greenlandip Uummannami tunisassiorfianut 2019-imi aasap tungaanut suliartorlutik 2017-imi juunip qaammataani tikipput. Tunisassiorfimmi ingerlatsisup oqaatigaa, qaleralinnik niaquikkanik paperuikkanillu aamma qaleralinnik ilivitsunik siornatigut annerusumik tunisassiortarsimallutik, massakkulli aalajaatsunik sulisoqarnertik pissutigalugu qalerallit nerpiinik massakkut annerusumik tunisassiortarlutik.

- Sulisussaaleqisarnerput pissutigalugu qaleralinnik niaquikkanik paperuikkanillu aamma qaleralinnik ilivitsunik 2015-imi 2016-imilu ulapaarfiusuni annerusumik tunisassiorpugut. Kisianni nunaqavissunik, Kinamiunik Nordjobbilu aqqutigalugu sisamanik sulisoqarnerput pissutigalugu suleqatigiiaanik marlunnik 2017-imi ulapaarfimmi sulisoqarnissatsinnut naammattunik sulisussaqariaratta qalerallit nerpiinik annerusumik tunisassiorpugut. Royal Greenland nunanit allaneersunik suliartortitsisimanngikkaluarpat suleqatigiiaanik ataasiinnarnik sulisoqarnikkut qaleralinnik ilivitsunik qerisunik ingammillu qaleralinnik niaquikkanik paperuikkanillu 2017-imi annerusumik tunisassiortariaqarsimassagaluartugut qularinngilara, Kirsten Kristensen Worm oqarpoq, nangipporlu:

- Qaleralinnik niaquikkanik paperuikkanillu aamma tunisassiortarpugut, qaleralinnilli angisuunik qerisunik massakkut tunisassiorpiarneq ajorpugut. Qalerallit nerpiinik tunisassiornerulernissarput anguniagariuarsinnarparput, aamma aalajaatsunik ullullu tamaasa suliartortartunik sulisoqarnerput pissutigalugu angusinnaavarput. Tamanna usorsisimaarnaqaaq, tunisassiorfimmi ingerlatsisoq oqarpoq erseqqissaatigalugulu, Royal Greenlandip Uummannami tunisassiorfiata nunaqavissunik sulisoqarnissani pingaartimmagu nunanit allaneersunik sulisoqarnissani pitsaanerutinngikkaa.

- Nunaqavissunik amerlasuunik Kinamiusulli suliffimminnik paarinnilluartunik ullullu tamaasa piffissaq suliartorfissartik eqqorlugu suliartortartunik sulisoqarpugut. Ullulli tamaasa suliartorneq ajortunik aamma sulisoqarpugut. Taamatuttaaq kommunimi suliffissarsiuussisarfik aqqutigalugu nunaqavissunik sulilersitsisarnikuuvugut. Taakkulu sulisoriinnarusuttorujussuugaluarpagut, ilaali ullualuinnarni ilaalumi nalunaaquttap-akunnerini arlalialuinnarni suleriarlutik suliartoqqinneq ajorput.

Kinamiut 14-it Royal Greenlandip Uummannami tunisassiorfiani sulisuusut sulisunut illusisimmavinni Royal Greenlandimit pigineqartuni attartorneqartunilu najugaqarput. Suleqatitik kalaallit naligalugit ineqarnermut akiliuteqartarput, akissarsiaqartarput akileraaruteqartarlutillu.

2017 –imi aasaagaa Kinamiut 14-it Uummannami Royal Greenlandip tunisassiorfiani sulilerput. Taakku 2019-i tikillugu Uummannami tunisassiorfimmi sulissapput

Sulisut aalakkaasut sulisoralugit Uummannami Royal Greenlandip tunisassiorfiani 2017-imi aasaaneraniit maannamut annertunerusumik qalerallit nerpiinik tisaanik tunisassiorput.

– Kinamiut suleqativut Uummannami tunisassiorfimmilu naleqqussarluarput, taama oqarpoq Uummannami Royal Greenlandip tunisassiorfiani ingerlatsisoq Kirsten Kristensen Worm. Assimi Kirsten Kristensen Wormip kinamiut ilaat assiliseqatigaa.