Aappilattumi tunisassiorfik sulisussaaleqisoqarneranik matoqqagallarpoq
Aappilattumi Upernaviup eqqaaniitumi tunisassiorfik ukiup affaanik pisoqaassusilik sulisussaaleqineq pissutigalugu matoqqagallartinneqarpoq. Naak aalisartut tunisassiornermi ikiuukkaluartut tunisassiorfik tamakkiisumik tunisassiorsinnaanngilaq.
Allattoq Káte Hansen, kaha@royalgreenland.com- Aappilattumi sulisuvut aalajaattaraluaqisut ajoraluartumik ulluni makkunani suliartunngitsoortarput, taamaammallu ulluni marlussunni matoqqasariaqarpugut, sulisorisinnaasavullu naammalerpata tunisassioqqissinnaalissaagut, Flemming Andersen Upernavimmi pigisaanilu tunisassialerinermik ingerlatsisoq oqarpoq.
Tunisassiorfik nalinginnaasumik qulit missaannik ulapaarfiup nalaani sulisoqarsinnaasarpoq aammalu ulloq unnuarlu 15 tonsinik tunisassiorsinnaalluni. Tunisassialerinermik ingerlatsisup sulisussaaleqineq ilungersunarnerarpaa. Soorlu assersuutigalugu sapaatip akunnerata siuliani pingasuinnaat suliartorsimapput. Sulisussaaleqinerlu Upernaviup nunaqarfiini allani aamma atuuppoq.
- Tunisassiorfimmik nutaaliaanerpaanik atortorissaarutitalimmik aningaasaliissuteqaqqammernitsinni sulisut suliartunngitsoornerat assut ilungersunarpoq, Flemming Andersen naliliivoq.
Aalisartut aamma ilungersunaraat
Aappilattup eqqaani qaleralippassuaqaraluarpoq, aalisartullu 20-t missaanniittut pisaminnik tunisisinnaannginnertik aamma ilungersunaraat.
- Aalisartut pingasut tunisassiorfimmi suleqataanissaminnik neqeroorsimapput, tamannalu nuannaarutigisorujussuuarput. Taakkunannga marluk nalunaaquttap akunnerini arlalinni sulipput ataaserlu ulloq naallugu sulilluni, taamaakkaluartorli qerinasuartitsivitsinnik ajornartorsiuteqarnerput pissutigalugu tamakkiisumik tunisassiorsinnaasimanngilagut, tunisassiarisinnaasattalu affaannaat isumagisinnaavagut. Aammalu sulisut tallimat-arfinillit amigaatigiuartillugit ajoraluartumik tamakkiisumik tunisassiorsinnaanavianngilagut, Flemming Andersen oqarpoq.
Suliffeqarfissuarmi sulisoqarnermi ingerlatsisoq Christian Laursen ilisimatitsivoq, sulisut avataaneersut Upernaviup pigisaaniittut 21-usut, taakkunanngalu aqqanillit nunatsinneersuusut sinnerilu Nordjobbimeersuullutillu aamma filippineriusut.
- Sulisut taakku Upernaviup nunaqarfiini sulipput ulapittorujussuullutillu, naallu sulisut taakku pissarsiarisinnaagaluarlutigit sulisorisinnaasatsinnik pissarsiarisinnaasagut naammanngilluinnarput, Christian Laursen oqarpoq nangillunilu:
- Sinerissami kommuninut saaffiginnittarnitsigut ajoraluartumik paasivarput ingerlaannaq sulilersinnaasutut taaneqartartut sinerissami pissarsiarineqarsinnaanngitsut. Taamaammat sinerissamit sulisussarsiorsinnaajunnaaqqavugut, kommuninulli attaveqartuarsinnarpugut.
Royal Greenland Aappilattup avataaneersunik pingasunik ullummikkut inissaqartitsivoq. Allanik arfinik pingasunik inissaqartitsisinnaalernissaq siunertaralugu aningaasaliissutissanik noqqaasoqareerpoq, inissallu kingusinnerpaamik aappaagu sanallugit aallartinneqarsinnaassapput.
