Tulaassuinermi pilersaarutit aningasatigut annaasaqatsaaliutaapput
Tulaassuinermi pilersaarutit Royal Greenlandip aningaasarpassuarnik annaasaqarnissaraluanik pinaveersaarutaapput pingaarutillit. Uummap tunisassiorfiani aalisartut piniartullu peqatigiiffiat suleqatigalugu tulaassuisarnernik aqutsilluartoqarpoq, aalisakkanillu 2014-imili eqqaasoqaqqissimanngilaq.
Allattoq Káte Hansen, kaha@royalgreenland.comRoyal Greenlandi ilaatigut Uummannami tulaassuinermi pilersaarutinik 2014-imi atuutsitsilerpoq. Taamani qullersat tunisassiorfimmi misissuineranni aalisakkanik tulaassukkat ilangaatsiaannik pitsaassutsimikkut ajorpallaalersimasunik pisisartullu piumasaannut naapertuukkunnaarsimasunik eqqaasoqartariaqarsimavoq.
- Tulaassuinermi pilersaarutinik atuutsitsilernerput aalisartunit aallaqqaammut akueriuminaatsinneqarsimaqalunilu naammagittaalliutigineqartaqaaq, ukiulli ingerlaneranni sungiukkiartorpaat, maannalu taamaattussaannartut isigilerpaat. Imalu sungiussimatigaat; niusigunik tulaasseqqinnissaminnut inniminniissapput. Tulaassuinermilu pilersaaruteqarallartillugu aalisakkanik 2014-imili igitsisimanngilagut, tunisassiorfimmi ingerlatsisoq Kirsten Kristensen Worm oqarpoq nangillunilu:
- Aalisartut piniartullu peqatigiiffiat suleqatigalugu maleruagassaliuussisimanerput pissutigalugu aalisartut illoqarfinni allaneersut ajoraluartumik ilaatigut tulaassuisinnaatittanngilagut. Umiatsiaararsortut Uummannameersut nunaqarfiineersullu aammalu allaneersut tulaassuisinnaajuaannarput. Tunisassiornikkullu artukkerneqannginnissaq aammalu aalisakkat pitsaassutsimikkut ajortilersimannginnissaat qulakkeerumallugu angallatit anginerit Ilulissaneersut, Qasigiannguaneersut Sisimiuneersullu tulaassuinermi ataatsimi immikkut 2-3 tonsinik tulaassisinnaasut tulaassuinermi pilersaarutit atorlugit tulaassitittarpagut.
Ataasiakkaat naammagittaalliortarput
Tunisassiorfimmili ingerlatsisup aalisartut ataasiakkaat tulaassinissaminnut itigartitaasimariarlutik imaluunniit Royal Greenlandimut tulaassuisartuunnginnertik pissutigalugu aalisarnermi atortunik piseqqusaanngeriarlutik eqqunngitsumik pineqarsorisut naammagittaalliortartut siumortarpai.
- Alisartut tamakku naammagittaalliukkajuttarput oqarlutillu Royal Greenland inuiaqatigiit pigimmassuk kikkut tamarmik assigiimmik pineqarlutik tulaassuisinnaasariaqartut. Taamatut naammagittaalliuutit tusagassiuutini aamma oqaatigineqartarput.
- Inuiaqatigiit-uku aningaasaataannik paarsilluarniarluta tulaassuinermi pilersaarutinik atuisariaqartartugut. Uanga tunisassiorfimmi ingerlatsisutut soqutigittaallunga akisussaanngitsuliorlungalu tulaassukkanik peqarpallaalernissaq nakkutiginngikkukku aalisagarpassuarnik eqqaanermik suliffeqarfimmullu aningaasarpassuarnik nalilimmik kinguneqarsinnaavoq, naggataatigullu uannik soraarsitsinermik kinguneqarsinnaavoq, tunisassiornermi ingerlatsisoq kissaammersimaarluni oqarpoq.
Tunisassiorfiup qerititsiveqarfia siorna allilerneqarpoq, tamannalu ilaatigut aamma Kinamiut sulilluarnerisigut tunisassiorfimmi 340-t missaannik tulaassuisulimmi tulaassuinermik ingerlalluartitsilersimavoq. Annertunerusumik qerititsiveqalerneq nunaqarfiit tunisassiassanik Uummannap tunisassiorfianut maanna assartuisoqarneranik kinguneqarpoq, taamalu nunaqarfinni tulaassuinermik pilersaarutinik aamma atuisoqarunnaarluni.
- Qaammat kingulleq Uummannami Ukkusissanilu teknikkikkut ajornartorsiuteqarnerput sulisussaaleqinerpullu pissutigalugit tulaassuinermi pilersaarummik qaqutigooraluartumik tamanut atuutsitsisariaqarsimavunga. Tulaassuinermi pilersaarut pillugu allagartaliilerama ernumasimavunga siornatigutut aalisartunit kimmartingaatsiarnissara ilimagalugu. Qujanaraluartumillu aalisartut piniartullu peqatigiiffiannik suleqateqarluarallartillunga ernumagisattut pisoqanngilaq. Allaammi ajornartorsiutaasinnaasunik nalaataqarnialersilluta aalisartut piniartullu peqatigiiffianeersut namminneq ataatsimeeqatiserinnikkiartorlutik takkussinnaasarput. Taamaammat peqatigiiffimmik suleqateqarnerput attaveqarnerpullu naammagisimaaqaara, tunisassiorfimmi ingerlatsisoq unnersiorpoq.
