Ilinniartoq Royal Greenland Japanimi suliffimmik misiliisoq
28-nik ukiulik Malu Laursen niuerneq nittarsaassinerlu pillugit Nuummi qaffasinnerusumik ilisimatusarluni ilinniartoq Royal Greenland Japanimi sapaatit-akunnerini arfinilinni suliffimmik misiliilluni sulileruttorpoq. Malu Laursen Royal Greenlandimi suliffimmik misiliinertalimmik qaffasinnerusumik ilisimatusarluni ilinniarnermini tuniniaanermut immikkoortortami Nuummiittumi aammalu niuernermik ineriartortitsinermut nittarsaassinermullu immikkoortortami Svenstrupimiittumi suliffimmik misiliilluni siusinnerusukkut ilinniartuuvoq.
Allattoq Inga Egede, ineg@royalgreenland.comSiunertaq
- Misilittagaqarnerulerumallunga taamatuttaaq Royal Greenland A/S pillugu ilisimasaqarnerulerumallunga Japanimut suliffimmik misiliiartorpunga, Malu Laursen oqarpoq.
Malup Japanimi sulinermi pissutsit sumiiffinni sulinermi pissutsinut allanut sanilliullugit allaanerusut misiginissai qilanaarai.
- Japanimiinninni sulinermi pissutsit allarluinnaat misigiinnarnagit suleriutsit allarluinnaat sulinermilu ileqqorissaariaaseq allarluinnaq aamma misigissavakka. Japanimiut ilaatigut ingammik sulinerup aammalumi ilinniakkamik ingerlatsinerup tungaatigut ataqqinnittumik isumaliortariaaseqarnertik ileqqorissaartorujussuunertillu ilisimaneqaatigaat. Tamakku toqqaannartumik misigisaqarfigisinnaanngorpakka, ilinniartutullu taama periarfissaqartitaanera immikkut illuinnartuuvoq, Malu Laursen oqarpoq, nangipporlu:
- Kingusinnerusukkut oqaluttuarisinnaasannik nuannersorpassuarnik misigisaqarnissara qilanaaraara. Massakamut ajunngilanga, tikilluaqquneqarluaqaangalu.
- Royal Greenland Japanimi suleqatikka pitsaapput, tikilluaqqulluarpaanngalu. Tokyomut apriilip 15-iani tikikkama aqaguani tikilluaqqusinertalimmik nuannataaqatigiippugut. Nuannersupilussuuvoq, Malu oqarpoq.
Malu Laursen 2019-imi maajip 28-ata tungaanut Japanimiittumi Tokyomiissaaq.
Malu Laursenip assinga kiisalu inuttaata Tokyomi assilisai allaaserisap ataani takuneqarsinnaapput.
Paasissutissat:
Assit: Malu Laursen
