Tunisassiorfik Nuussuarmiittoq tunisiffigineqarsinnaaleqqippoq

- Tunisisinnaannissaq 2019-imi ataasinngorneq decembarip quligiluaani ammaqqipparput. Aalisartut aalisakkanik qaqerlaanik qerinasuartitassanik tunisisartillutik tunisassiorfitoqqamut qaleralinnik tunisisassapput. Aalisakkat tunineqartut tunisassiorfittaap qerisuuteqarfiani kingorna uninngatinneqassapput, Arctic Fish Greenland A/S-imi pisortaagallartoq Frederik Olsen oqarpoq.

Aalisakkerinermik ingerlatsiveqarfik nunaqarfimmi tunisassiorfimmik nutaamik sanatitsilluni aallartimmat tunisassiorfitoqqamut Nuussuarmiittumut tunisisarneq 2019-imi juulimi matuneqarpoq. Nuussuarmi eqqaanilu aalisartut septembarip naanissaata tungaanut kilisaammut tunitsiviusumut tunisisarput.

- Tunisassiorfittaassaq 2020-mi apriilimi naammassissaaq, tunisassiorfittaassamili qerisuuteqarfiit atorsinnaalermata taamaammat tunisisinnaanissaq ammaapparput. Nuussuarmi imaq sikuppat, januaarimi februaarimiluunniit, qaleralinnik killeqanngitsumik tigooqqaasinnaalissaagut. Tungaanut aalisartut ullormut tonsinik pingasunik tunisassiorfitoqqami qerinasuartinneqaqqaartussanik tunisisinnaapput, Frederik Olsen nassuiaavoq.

Tunisassiorfittaassaq Nuussuarmiittoq upernaaru sananeqarluni naammassineqartussaq 700 kvadratmeterisut angissuseqassaaq. Tunisassiorfissaq qaleralinnik qerisunik 500 tonsinik uninngasuuteqarsinnaassallunilu qaleralinnik paperuikkanik niaquikkanillu tunisassiussaaq, taamaasillunilu nunaqarfiup innuttaasuinut suliffissaqartitsissagami pingaarutilittut inissisimassaaq.