Nioqqutissianik ineriikkanik assartuineq ingerlanneqaleruttorpoq
Sapaatit akunnerit pingasut kingulliit ingerlanerini Ukkusissani, Ikerasammi Saattunilu aalisartut nioqqutissiat ineriikkat tonsit 100-ikkaat Uummannami tunisassiorfimmut assartorpaat. Assartuinerit sikukkut siumuinnaq kilumiiterit 20-it 50-illu akornanni isoratussusillit ingerlaarfigalugit qamutaralannik biilinillu qamutinik kalitalinnik ingerlanneqarput.
Allattoq Inga Egede, ineg@royalgreenland.com- Aalisartut nunaqarfinneersut maannamut qalerallit nioqqutissiat ineriikkat palitsit 555-it Ukkusissaniit, Ikerasammiit aamma Saattuniit Uummannami tunisassiorfimmut assartoreerpaat. Nunaqarfinni qerisuusiviit ulikkaaqqippata nioqqutissianik assartuisoqaqqissasoq, Uummannami Royal Greenlandip tunisassiorfiani ingerlatsisoq, Kirsten Kristensen Worm oqarpoq.
Ukioq manna Ukkusissaniit suli marloriarluni assartuisoqaqqissasoq taamatuttaaq Saattuniit Ikerasammiillu suli minnerpaamik ataasiarluni assartuisoqaqqissasoq, Kirsten Kristensen Wormip oqaatigaa.
Ukiunnerani nunaqarfinni aalisarneq tunisassiornerlu ingerlaannaqqullugu nioqqutissianik ineriikkanik assartuisarnerit ukiut tamaasa ingerlanneqartarput.
- Nunaqarfinni qerisuusiviit inissakimmata nioqqutissiat ineriikkat tamaasa qerisuusivimminni inissaqartinneq ajorpaat. Sikuernissaa tiikillugu aalisarneq tunisassiornerlu ingerlaannarsinnaaqullugu qerisuusiviit imaarneqartariaqartarput, Kirsten Kristensen Worm oqarpoq.
Ullormut arlaleriartarput
Uummannami tunisassiorfiup ingerlatsisua, nunaqarfinni tunisassiorfiit ingerlatsisui aalisartullu suleqatigiinnerisigut nioqqutissianik ineriikkanik assartuisarneq ingerlanneqartarpoq. Tuniassassiorfinni ingerlatsisut suliakkiinerisigut aalisartut ullualuit ingerlanerini nunaqarfinniit Uummannamut sikukkut assartuisarput. Qamuteralaat ataatsit palitsit ataasiakkaarlugit, marlukkaarlugit annerpaamillu pingasukkaarlugit assartortarpaat. Ingerlaarfiit 20 kilumiiteriniit 50 kilumiiterinut isoratussusillit ingerlarfigalugit sila 25 -it tikillugit issittoq aalisartut ullormut arlaleriarlutik uteqattaarlutik assartuisarput.
- Aalisartut quliniit aqqaneq marlunnut amerlassusisllit maannamut palitsit 161-it Ukkusissaniit assartoreerpaat. Ukkusissaniit assartuinerit ullut pingasut ingerlanneqarput, taamatuttaaq Ikerasammiit palitsit 120-it ullut pingasut ingerlanerini assartorneqareerput. Aalisartut Saattuneersut ullut sisamat ingerlanerini nioqqutissiassat palitsit 274-it assartorpaat, Kirsten Kristensen Worm oqarpoq, nangipporlu:
- Aalisartut aalisarusunnerunerat pisssutigalugu aalisartut siornarniit ikinnerusut assartuipput. Ukioq manna aalisagaqarnerummat aalisartut siornarniit palitsit amerlanersut assartorpaat.
Nioqqutissiat nunaqarfinniit Uummannamut assartorneqartut assigiinngitsuupput tassaasut qalerallit niaquerlugit paperuikkat, avaleqqat kiisalu qalerallit ilivitsut. Palitsit assartorneqartut ilaat 525 kiilunik oqimaassuseqarput allallu 800 kiilunik oqimaassuseqarlutik.
Nioqqutissiat ineriikkat nunaqarfinni Uummannap pigisaaneersut sikuernissaata tungaanut Uummannami Royal Greenlandip tunisassiorfiata qerititsivissuini inaalinneqarallassapput.
Paasissutissat:
Assit: Kirsten Kristensen Worm
