Qeqertarsuarmi saattuasnik tunisineq sisamariaatinngorluni qaffappoq

- Piffissami kingullermi saattuanik tunisineq annertuvoq, taamaattumik saattuanik pitsassutsikkut qaffasissunik tunisassiorumalluta saattuarniat ataasiakkaat malitassaannik tulaassuinermi pilersaarutinik atuutsitsilerpugut. Saattuarniat ulloq suna aamma qanoq annertutigisunik tunisisinnaanerannik tulaassuinermi pilersarut imaqarpoq, taama oqarpoq Qeqertarsuarmi Royal Greenlandip tunisassiorfiani ingerlatsisoq, Jakob Broberg.

Ulapaarfik siusippoq

Saattuanik tunisineq aprilip 29-iani aallartippoq, kisianni Upernaviup eqqaani aalisarfiup nalaani sikoqartarnera pissutigalugu saattuarniat aalisariutit tallimaasut tunisarnerat aatsaat maaji naajartortoq ingerlallualerpoq.

- Naak Upernaviup eqqaani sikoqartarnera pissutigalugu saattuarniarnermut akornutaagaluartoq taamaattoq ukioq manna saattuanik tunisineq siornarniit siusinneruvoq. Maajip 24-iani saattuanik tunisinerup allartilluarneraniit maannamut siornaniit tunisat sisamariaammik annertunerupput, tamannalu naammagisimaarpara, tunisassiorfiup ingerlatsisua oqarpoq nangipporlu:

- Nipisat suaannik tunisineq siornarniit sisamariaammik qaffisinneruvoq, maannalu aamma saattuanik tunisineq sisamariaammik qaffammat sulisuvut 30-it missaaniittut saattuat Upernaviup eqqaani pisassat nungunnissaata tungaanut sulissapput. Maannakkorpiaq ulapeqigatta sapaatip akunnerisa naaneri ilanngullugit sulisuvut sulisarput.

Tunisassiat pitsaasut

Angallatit saattuarniutit tulaassuisut marluk saattuanik uumatitsivinnik angallatiminni atortorissaaruteqarmata saattuat Qeqertarsuarmi tunisassiorfimmut tunineqarnerminni suli uumasarput.

- Saattuanik qaffasissumik pitsaassusilinnik tunisassiorusukkatta saattuarniutit marluk uumatitsiveqarnerat pitsaalluinnarpoq. Angallatit saattuanik uumatitsivittaqanngitsut tunisaat aamma pitsaasuutillugit tunisassiariumallugit tulaassuinermi pilersaarutit atuutsippavut, Jakob Bronerg oqarpoq, nangipporlu:

- Pikkorilluinnartunik aamma pisussaassutsiminnik ilaginnaajumanngitsunik tunisassiorfimmi aqutsisoqarnera aamma sulisoqarnera pissutigalugu suannik aamma saattuanik tunisassiornermi angusarissaarnerput naaammagisimaarluinnarpara aamma nuannarutigaara. Tuniassiorfiup maanna sanaartorneqalersup atuutilerneratigut suli angusavut- aamma aalisakkanik tunisinermi- pitsaanerulerumaartut neriuutigaara.

Nipisaqarluarnera aamma saattuaqarluarnera upernaaq manna kianneruneranik pissuteqartoq Jakob Broberg isumaqarpoq.

Qeqertarsuup Tunuani nipisanniarneq juunip 17-iani unissaaq, Upernaviullu eqqaani saattussat pisassat 400 tonsisut pisarineqarpata saattuarniarneq unissalluni.