Aappilattumi tupeqarfimmik nappaaneq iluarsiilluarneruvoq
Royal Greenlandip tunisassiorfiani aqutsisoqatigiit Aappilattumi Upernaviup eqqaaniittumi nunaqarfiup tunisassiorfiani sulisussaaleqineq akiorniarlugu immikkut ittumik iliuuseqarlutik ukioq manna juulip aallartinnerani tupeqarfimmik nappaapput. Toqqit tallimat katillugu inunnut qulinut inissaqartut kiisalu tupeq ataaseq perusuersartarfittut atorneqartoq juulip aqqaneq-aappaani atulerput.
Allattoq Inga Egede, ineg@royalgreenland.com- Sulisunik nunaqarfinnit allaneersunik Nordjobbilu aqqutigalugu suliartortunik Aappilattumi tupeqarfimmi utaqqiisaagallartumik najugaqartitsineq iluatsilluarpoq. Aappilattumi aasap ingerlanerani unissanata tunisassiorpugut, Royal Greenland Upernavimmi tunisassialerinermi ingerlatsisoq Flemming Andersen oqarpoq.
Tupeqarfik napparneqarmat Royal Greenlandi sulisunik nunaqarfinnit allaneersunik arlalinnik taamaasilluni tikisitsisinnaasimavoq.
- Aasap ingerlanerani sulisunik tunisassiorfimmut suliartortunik nunaqarfinnit allaneersunik nikerartunik sulisoqarpugut. Toqqit ilaat ataaseq suli atorpoq, tunisassialerinermi ingerlatsisoq oqarpoq, nangipporlu:
- Toqqit ukiukkut atorneqartussanngorlugit tulluarsagaanngimmata septembarip 30-ani piiarneqassapput.
Illusimaffimmik nutaamik inunnut arfinilinnut inissalimmik sananissamut akuerisaanissaq siumungaaq kissaatigalugu Flemming Andersen oqarpoq.
- Illut illusimaffiusinnaasut marluk, aappaa inunnut marlunnut inissalik aappaalu inunnut pingasunut inissalik, maanna pigaavut. Aappilattumili tunisassiorfimmi sulisussaaleqisarneq siumungaaq aaqqiivigissagutsigu illusimaffimmik minnerpaamik inunnut arfinilinnut inissalimmik sananissatsinnut akuerisaanissarput kissaatigaarput, Flemming Andersen oqarpoq.
Royal Greenlandip tunisassiorfia Aappilattumiittoq 2017-imi decembarimi napparneqarlunilu atulerneqartoq, ullormut 15 tonsinik tunisassiorsinnaallunilu 450 tonsinik qerisuuteqarsinnaavoq.
