Ice Trawl Greenland A/S nutaamik kilisaatiliortitsivoq
Aalisakkerinermik ingerlatsiviup Ice Trawl Greenland A/S-ip kilisaammik raajarniummik nutaamik sanatitsinissamut amutsivik spaniamiittoq, Asterellos de Murueta Bilbaomiittoq, isumaqatigiissusiorfigaa. Kilisaat nutaaq, kilisaatip Nataarnap taartissaa, 2021-imi maajimi naammassilluni tunniunneqassasoq naatsorsuutigineqarpoq, Ice Trawl A/S-imi siulersuisut siulittaasuat Ove Rosing Olsen ilisimatitsivoq.
Allattoq Inga Egede, ineg@royalgreenland.com- Kilisaatip Nataarnap pioreersup ingerlatseqatigiiffik nunatsinnilu inuiaqatigiit sullilluarsimavai. Taamaammat Ice Trawl Greenland A/S-imi siulersuisut aalisarnermi ingerlatamik ingerlaannarnissaat nutaamik nutaaliaalluinnartumillu raajarniutitaarnikkut qulakkiissallugu pingaartissimavaat. Taamaammallu umiarsualiorfik Asterillos de Murueta Bilbao-miittoq umiarsualiornissamut sanasoriniarlugu isumaqatigiissuteqarfigaat, Ove Rosing Olsen oqarpoq.
Umiarsualiorneq aallartinneqareerpoq
Kilisaat Nataarnaq nutaaq Royal Greenlandip kilisaataatai nutaat, Sisimiut aamma Avataq, najoqqutaralugit sananeqarpoq, tunisassiorfissaalu kilisaatip Nataarnap raajanik tunisassiorfia najoqqutaralugu sananeqassaaq.
- Umiarsualiorneq aallartinneqareerpoq, umiarsuullu 2021-imi maajimi tunniunneqarnissaa naatsorsuutigaarput. Umiarsuaq meterinik 82,30-inik takissuseqassallunilu meterinik 18-inik silissuseqassaaq. Kilisaat 30-nik inuttaqarsinnaassaaq, ataasiittarissanik 28-nik ineeraqassallunilu marluuttarissamik ataatsimik ineeraqassaaq. Quleriinnik, katillugu 2950 kubikmiiterinik initussuseqartunik, usisarfeqassaaq, Ove Rosing Olsen oqarpoq.
Umiarsuup nutaap kilisaat Nataarnaq, Kalaallit Nunaata imartaani kilisannerup saniatigut Svalbardip imartaani kilisattartoq, assigalugu raajarniutitut taamaallaat atorneqassaaq.
Raajat kilisaammi tunisassiarineqartartussat kilisaatip sukkanerusumik usingiartarnissaa siunertaralugu kilisaammi pallitsilersorneqartassapput.
