Sulisut angerlartiinnarneqartut suliartoqqissapput
Royal Greenlandip tunisassiorfia Uummannamiittoq erngup uuliamik mingutsinneqarnera peqqutigalugu sulisunik 34-nik ataasinngornermi ullaakkut angerlatitsiinnartariaqarsimasoq Nukissiorfimmiit imermik 1.000 liiterimik pilerneqarpoq. Tamanna peqqutigalugu sulisut 34-t ataasinngornermi ullaakkut angerlartiinnarneqartut marlunngornermi ullaakkut suliartussapput.
Allattoq Inga Egede; ineg@royalgreenland.com- Imermik minguitsumik 1.000 liiterimik pajunneqassalluta Nukissiorfimmiit neriorsorneqaratta tunisassiorfimmi tunisassiornermut atortut eqqiarlugit aallartissinnaanngorpavut. Taamaammat sulisugut angerlartinneqaannarnikut aqagu marlunngornermi ullaakkut suliartoqqissinnaapput, Royal Greenlandip tunisassiorfiani Uummannamiittumi aqutsisoq Kirsten Ajaaja Holm oqarpoq.
Pinasuartumik aaqqiineq
Tunisassiorfimmi Uummannamiittumi aqutsisoqatigiit illoqarfiup erngata uuliamik mingutsinneqarsimanera pissutigalugu tunisassiorsinnaajunaarallarnertik tallimanngornermi paasigamikkuli pinasuartumik aaqqiissuteqarlutik aallartitsipput.
- Aalisartut Uummannameersut pisaminnik tunitsivigisartagaat qaninnerit, Saattuni Ikerasannilu tunitsiviit, oqilisaanniarlugit suleqativut sisamat arfininngormat ullaakkut Saattunukartippavut. Suleqativut taakku sisamat maanna pisariaqartitsisoqarnerani ullaakkut unnukkullu Uummannamut Saattunullu uteqattaarput. Suleqativut allat marluk Ikerasammi tunitsivimmi arfininngormalli sulilerput, Kirsten Ajaaja Worm oqarpoq.
Uummannami pisut peqqutigalugit Uummannami aalisartut nunaqarfinnuinnaq tunisisinnaammata nunaqarfiit tunitsiviini tulaassuinissamut pilersaarusiortoqartariaqarsimavoq.
- Aalisartut 200-niit amerlanerusut Uummannami tunisassiorfimmut tunisisartut nunaqarfinni tunitsivinnuinnaq tunisisinnaatillugit tulaassuinermut pilersaarusiortariaqarsimavugut, tassa aalisartut nunaqarfimmi tunitsivimmut tunisitinnatik piffissamik inniminneeqqaartassapput.
Tunisassiorfimmi Uummannamiittumi sulisut 50-it missaaniittut akornini sulisut akunnermusiallit qulit missaaniittut angerlartiinnarneqanngillat. Taakku suleqatitik angerlartiinnarneqaraluartut 34-it peqatigalugit tunisassiornermi atortunik eqqiaassapput.
- Uummannami imeq salinneqareeriarpat tunisassioqqilernissatsinnut piareersimassaagut, Kirsten Ajaaja Worm oqarpoq.
