Sumiiffinni tunisassiat assigiinngitsut ataatsimut poortukkat qanittukkut pineqarsinnaalissapput

Royal Greenlandimi tuniniaanermi pisortap Malik Hegelund Olsenip Royal Greenlandip tunisassiai tunisassianut ataatsimut poortukkanut ilaammata nuannaarutigaa, taakkumi Kalaallit Nunaanni pisisartunit piumaneqarluarmata.  

- Ullunut 14-inut atugassiaralugit poortukkat pioreersut pisiniarfinni pisiarineqarsinnaasut saniatigut allamik qinigassaqarsinaaneq anguniagaavoq. Pisisartutta poortugaq nunatsinneersunik  peqqinnartunik inuussutissaqarluartunillu imalik pissarsiarisinnaassagaat qularnaarniarparput, Malik Hegelund Olsen oqarpoq.

Tunisassiaq imaqarpoq ullunut qulinut neqit aamma aalisakkat qaleruallillu ullunut sisamanut, taamaalilluni sapaatip akunneranut marloriarluni aalisagartortarnissamik kajumissaarummut naleqqutissammat. Tunisassiamut Royal Greenlandip ilanngussaa makkuninnga imaqarpoq: Kinguppaat (raajat) qalipallit kiilu ataaseq, ammassaat kiilu ataaseq, saarulliup nerpia avitaq Royal Greenlandip  tunisassiaanit mamarluinnartumit Nutaaq Cod-imit kilitaq, kiisalu qaleraliminermit uutassiat. Tunisassiat Neqi A/S-imeersut ilaatigut savap neqaanik suppeliassanik, medisterimik, neqimik aserortikkamik aamma quttoqqamit ilivitsuutillugu siatassiamik imaqarput.

Ataatsimut poortukkanik tuniniaaneq nassiussuinerlu Neqi A/S-imit aqunneqassaaq, soorlu aamma taassuma ataatsimut poortukkat Neqi A/S-ip Narsami tunisassiorfianni poortortassagai, tunisassiamillu pisiumallutik inniminniisunut nassiussuuttassagai.

- Tunisassiap pisisartunit ilassilluarneqarnissaa neriuutigaarput aamma Neqi A/S-imik suleqateqarnerput annertunerulersissinnaagipput poortukkat ineriartorteqqissinnaaaniassagatsigit allanik angissuserlugit pisisartunullu allanut naleqqussarlugit, Malik Hegelund Olsen oqarpoq.

Neqi A/S KNI’p facebook-imi quppernerani allappoq nunatsinneersunik tunisassiaq qanittukkut sinerissami pisiniarfinni pisiarineqarsinnaalissasoq.