Aalisakkanik uumasunik assartuineq ingerlalluarpoq
Aalisakkanik uumasunik assartuineq ukioq manna ingerlalluarpoq. Assartuineq ingerlalluangaarmat Royal Greenlandip tunisassiorfiata Maniitsumiittup aalisariutillu uumatitsiviup Maniitsup malinnaaniarnerat unammillernartoqarpoq. Taamaammat Royal Greenlandip kilisaataataata Sisimiup aalisariut uumatitsivik Maniitsoq kangerlunni aalisakkanik uumasunik tigooraasoq malittarissavaa. Aalisakkat uumasut kingorna kilisaammut issorarneqarlutillu kilisaammi nerpinngorlugit tunisassiarineqassapput.
Allattoq Inga Egede, ineg@roaylgreenland.com- Aalisartut 100-it missaanniittut aalisakkanik uumasunik 2000 tonsit missaanniittunik sinerissami, avannaani Maniitsumiit kujataani Paamiut tikillugit, uumatitsivinniittuuteqarput. Aalisagarpassuummata isorartummallu aalisariut uumatitsivik ”Maniitsoq” tunisassiorfimmut Maniitsumiittumut aalisakkanik assartuinissaminut malinnaasinnaanngilaq. Tunisassiorfik Maniitsumiittoq aammattaaq sapaatip-akunneranut 300-niit 400 tonsinut taamaallaat tunisassiorsinnaammat aalisagarpassuit uumasut tunisassiarineqarnissaat anguniarlugu allatut aaqqiivugut, Royal Greenlandimi tunisassialerinermi ingerlatsisoq Sten Sørensen oqarpoq, nangipporlu:
- Kilisaatip Sisimiup saarullinnik uumatitsivinneersunik tunisassiornissaa pillugu Namminersorlutik Oqartussanit akuersissummik pinikuuvugut. Sisimiup aalisariut uumatitsivik sinerissami kangerlunnukaqattaarnerani maanna malissavaa. Taava aalisartut pisarnertut pisatik uumatitsivinniittut aalisariummut uumatitsivimmut tunissavaat, aalisakkallu uumasut kingorna Sisimiunut issorarneqareerunik nerpinngorlugit tunisassiarineqassapput.
Maniitsumi tunisassiorneq ingerlaannassaaq
Tunisassiorfik Maniitsumiittoq Nutaaq-Cod-inik mamarluinnartunik tunisassiuinnassasoq tunisassiornermi ingerlatsisoq aammattaaq oqarpoq.
- Uumatitsivik Maniitsumi tunisassiorfiup eqqaaniittoq saarullinnik uumasunik ulikkaarlugu immernikuuarput, taakkulu nerpinnik Nutaaq-Cod-inik sapaatip-akunnerini marlunni tunisassiornissamut naammapput. Aammattaaq piffissami aalajangersimasumik aalisakkat aalajangersimasumik annertussusillit kilisaammut Sisimiumut issorarneqassapput. Taamaammat Sisimiut aalisakkat sinerissami uumatitsivinniittut annikillinissaasa tungaanut, sapaatip-akunnerini marlunni pingasuniluunniit, taamaallaat ikiuutissaaq, Sten Sørensen oqarpoq.
Nutaaq-Cod-it 2000 tonsit missaanniittut Royal Greenlandip tunisassiorfiani Maniitsumiittumi 2019-imi tunineqarlutillu tunisassiarineqarput. Tunisassiorfik maannamuugallartoq uumatitsivinniit 130-t 150-illu akornanni amerlassusilinniit ukioq manna Nutaaq-Cod-inik 2500 tonsinik tunisillunilu tunisassioreersimalerpoq. Saarullinnik uumasunik aalisarneq 2020-mi novembarip tungaanut ingerlaannassangatinneqarpoq.
Paasissutissat:
Assit: Inuuteq Kriegel
