Katuap aamma Royal Greenlandip qeqqussanik atuineq siuarsarniarpaat

Royal Greenlandip Nunatsinni tunisassianik tuniniaanermut pisortaa Malik Hegelund Olsen oqaluttuarpoq, Katuap Royal Greenlandillu suleqatigiinnerat kalaallit tunisassiaanik soqutigisaqaqatigiinnermik tunuliaquteqartoq:

- Katuamik suleqateqarneq pilersipparput peqqutigalugu kalaallit tunisassiaat ataatsimoorluta soqutigigatsigit, aamma takusinnaagatsigu suleqatigiilernissaq tulluartuusoq, taama oqarpoq Malik Hegelund Olsen.

Claus D. Schmidt, Katuami igaffimmi pisortaasoq Katuaq Royal Greenlandillu suleqatigiilernerat pillugu ima oqaaseqarpoq:

- Igaffitsinni kalaallit tunisassiaat atussallugit pilerigisorujussuuarput. Tamannami Katuap ilisimaneqaatigaa, tamatumalu ineriartortsiteqataaffiginissaa ataqqinnaatitut isigaarput.

Nerisassat peqqinnartut

Royal Greenlandip Katuallu suleqatigiinnermikkut Royal Greenlandip tunisassiaasa nutaanersaannik, qeqqussanik, atuineq siuarsarniarpaat.

- Royal Greenland qeqqussanik tunisassiornermik ineriartortitsilluni aallartitsinnikuuvoq aamma siusinnerusukkut Katuaq suleqatigalugu qeqqussat pillugit suleqatigiissitanik sulisitsinikuuvugut. Tamatuma saniatigut qeqqussat atorneqarnissaat siuarsarniarlugu soqutigisaraarput akui peqqinartut pissutigalugit, tassaasut atortussiassat pitsaasut, vitaminit inuussutissallu allat, Malik Hegelund Olsen oqaluttuarpoq.

Qeqqussat sassaalliutiginissaanut siunnersuutit

Qeqqussat assigiinngitsorpassuanngorlugit nerineqarsinnaammata sassaalliutigineqarlutillu, Royal Greenlandip Nunatsinni tunisassianik tuniniaavia piffissami aggersumi qeqqusssanik sassaalliutigineqarsinnaasunik siunnersuusiussaaq.

- Qeqqussat atussallugit pisariitsuarannguuvoq. Assersuutigalugu immamiit toqqaannartumik salatitut nerineqarsinnaapput, panertinneqarsinnaapput nerisassiornermilu akussatut atorneqarsinnaallutik, mamassutsimut sakkortusaatigalugit, imaluunniit qalanneqarsinnaapput sianneqarlutilluunniit unnukkorsiutissanut naatitanut akussanut ilaatillugit. Qeqqussat atorneqarsinnaaneri suli assigiinngitsorpassuupput, piffissamilu aggersumi Royal Greenland sassaalliutissanut siunnersuutinik ataasiakkaanik ilitsersuutitut ilusilikkanik saqqummiissaaq, taamatut Malik Hegelund Olsen oqarpoq.