Saarulliit Nutaaq-tut tunisassiat iluatsilluarput

Aalisarnermut Piniarnermullu Naalakkersuisup Aqqaluaq B. Egedep Royal Greenland tunisassiorfia Maniitsumiittoq 2021-mi ullumi ataasinngorneq juunip 7-iani takornariassavaa. Suliniut Nutaaq saarullinnik uumatitanik qajassuartumik aalisarlunilu tunisassiornermut tunngassuteqartoq pillugu paasisaqarnissaq takornariarnermut siunertaavoq. 

Royal Greenlandimiit aallartitat Naalakkersuisoq Nuummiit Maniitsumut umiatsiaqatigivaat, aallartitallu ilagaat Sten Sørensen, saarulliit saattuallu pillugit ingerlatsinermi aqutsisoq. Taassuma Nutaaq-nik tunisassiorneq, bundgarnersorluni aarlisarneq uumatitsivimmiititsinerlu, misileraatitut 2015-imi aallarneeqataaffigisimavaa.  

- Saarulliit Nutaaq-tut tunisassiat pitsaasuullutillu mamartuugamik piumaneqarluinnarnerat erseqqissassallugu pingaaruteqarpoq. Europami ingammillu Tuluit Nunaanni atuisut tunisassiaq ilisimalersimavaat, piumaneqarneratalu annertusiartuinnarnissaa ukiorpaaluit sulissutiginikuuarput. Tunisassiornermi misilittagarpassuit naapertorlugit pisuussutinik aalisarsinnaasatsinnik nalitusaalluta tunisassioriaatsimik pilersitsinerput taamak inerneqarpoq, Sten Sørensen oqarpoq.  
 
Saarullinnit orsoqarluartunit pitsaaneruvoq  
Saarullinnik Nutaaq-tut tunisassiorneq bundgarnersorluni aalisarnermit, tassa aalisakkat qaqeriarlugit niaqui atatiinnarlugit niaquerlugillunniit erlaviiarlugillu karsinut iliorarlugit tunineqartarnerannit, allaaneruvoq.  
- Qassutini uumatitsiitigaluni bundgarnersorluni aalisarnermi aalisartup aalisagaq attunngilluinnartarmagu immikkuullarequtaavoq. Aalisakkat bundgarninik aalisarneqariarlutik qassutinut uumatitsivinnut Royal Greenlandimiit tunniunneqartunut ungasinngitsumilu inissinneqarsimasunut nuunneqartarput. Saarulliit minnerpaamik ulluni qulini tassaniittarput, kingornalu kilisaammit uumatitsivimmit “Maniitsoq”-mit aaneqariarlutik immikkoortiterneqarlutillu saarulliit mikinerit immamut uterteqqinneqartarput. Saarulliit uumasut kilisaatip uumatitsiviup tasinngortanut tulattarfiup eqqaaniittunut assartortarpai. Saarulliit tasinngortani eqqissisimaartinneqareerunik tunisassiorfimmut nuullugit ”milluarneqassapput”, kingorna ilisimajunnaartinneqariarlutik toqunneqartarput, nerpiliarineqartarput, qeriteriarlugit illersuuserlugit imermik qallerneqartarput. Periuseq taanna annerpaamik akunnernik marlunnik sivisussuseqarpoq, Sten nassuiaavoq.   

Saarulliit Nutaaq-tut ilisarnaaserneqarnissaannut qajassuartumik aalisarlunilu tunisassioriaaseq kisimi apeqqutaanngilaq. Saarulliup aqajaruata imaqannginnissaa aalajangiisuulluinnartarpoq.  
 
- Ilisimariikkatsitut bundgarnersorluni aalisarnermi aalisartup aalisakkat aqajarui ulikkaaqqasut tunisarpaat. Aalisakkat nerpii taamaalillutik orsoqarnerullutillu aqinnerulersarput, nerpiliarineqarnerminnilu ajalulersarput. Tunisassiat taakku niuerfinni nunani tamalaaniittuni piumaneqangaanngillat, tamannalu saarulliit kilomut akiisa appasinnerata ersersippaa, Sten Sørensen nassuiaavoq, nangipporlu.  
- Illuatungianik saarulliit minnerpaamik ulluni qulini qassutini uumatitsivinniitinneqarsimagaangamik nerpii suikkaanerullutillu, qaqqorinnerullutillu mamarnerusartut suliniut Nutaaq naapertorlugu paasivarput. Tunisassiassat pisinnaasagut atorlugit nalitusaanissaq Royal Greenlandimut pingaaruteqarpoq, atuisullu saarullinnut orsoqarluartunit Nutaaq piumaneruppassuk tamanna Royal Greenlandimuinnaanngitsoq aammali aalisartumut pitsaasuuvoq, Sten Sørensen oqarpoq.  

Uparuaaneq akuerinngilaa  
Bundgarnersorluni aalisartup Nutaaq-tut tunisassioriaaseq ungasinngitsukkut uparuarpaa. Aalisartup saarullinnik qassutinut uumatitsivinnut nuussineraniit kilisaatip uumatitsiviup aallernissaanut piffissaq sivisuallaartoq, tamannalu pissutigalugu saarulliit perlerlutik toqunerannik kinguneqartartoq uparuaatigineqarput, tamannattaarlu uumasunik naalliutsitsinerusoq aalisartoq isumaqarpoq.  
Qassutit uumatitsiviit piffissaliussami aallerfigisarnerat unammillernartoqarfiusoq Sten Sørensenip siunersivaa, uparuaatilli sinneri akuerinngilai.  
 
- Bundgarnersorluni aalisarneq aallartiaarnerugaluttuinnartoq ukiut ingerlanerini takusarparput, aalisartullu amerligaluttuinnartut suliniummut soqutiginnilersimapput. Kilisaatip uumatitsiviup aalisarfik annertooq angallavigalugulu kangerlunni qassutit uumatitsiviit aasartussaavai, taamaammallu qassutit uumatitsiviit imaarnissaat utaqqinarsinnaavoq. Saarullilli sapaatip-akunnerpassuini ajorani uumasinnaavoq, qassutilli uumatitsiviit, ingammik upernaakkut aput aatsillugu, kuummut ungasinngitsumi inissisimappata ajornerusinnaavoq, Sten Sørensen oqarpoq. 

Saarulliit qassutini uumatitsivinni sapaatip-akunneri arfineq-pingasut tikillugit uumasinnaasut saarulliillu tunisassiornerup ingerlarngani naalliuttarnersut ilisimatuussutikkut takussutissaqanngitsoq misilittakkat takutippaat. Illuatungaanilli tunisassioriaaseq nungusaataanngilaq. 
- Saarulliit mikinerit qassutiniit uumatitsivinniit immikkoortillugit immamut uterteqqittarpagut, tamannalu nuannaarutigaarput. Periuseq taamaalilluni nungusaataananilu pisuussutinik illersuivoq. 

Soqutigineqaraluttuinnarpoq  
Aalisartut qassutinut uumatitsivinnut nuussuiitigalutik bundgarnersorluni aalisarnermut ilanngutissallutik soqutiginninnerat aallaqqaataaniilli annertusigaluttuinnarsimavoq, aallaqqaataanimi aalisartut 25-it peqataasut ullumikkut aalisartut 120-nit amerlanerusut peqataapput. Royal Greenland taamaalilluni ukiuni tallimani kingullerni saarullinniarnermi annertusaasimavoq. 
 
- Aalisartut utaqqinissaasa sivikillineqarnissaa siunertaralugu kilisaat ”Sisimiut” qassutinik uumatitsivinnik imaarsisussatut atuutilersipparput. Ukiut siuliini arlaleriarluta iluatsilluartumik taamaaliorpugut. Aammattaaq qassutinik uumatitsivinnik amerlanerusunik siorna pisivugut, qassutillu uumatitsiviit maanna 200-it missaanniipput. Saarullinnik Nutaaq-tut tunisassiassanik aalisarnerup aalisartunit Sisimiuneersunit soqutigineqarnera ukiuni kingullerni annikippoq, maannali arlallit peqataanissartik kissaatigimmassuk aalisartunut taakkununnga qassutinik uumatitsivinnik pissarsinissarput sulissutigaarput, Sten Sørensen oqarpoq.  
 
Aalisartut aalisariaatsimut tassunga soqutiginnikkaluttuinnarnerannit pissarsiassaq annerpaaq tassaavoq tunisassiap malunnartumik pitsaanerunera, aalisariaaserli aalisartup Royal Greenlandillu aningaasaqarneranut aammattaaq iluaqutaavoq. Maannakkorpiarli Sten Sørensenip ulapputigisaanik allamik unammillernartoqalersimavoq.  
 
- Aap, ajoraluartumik sulisut najugaqavissut avataaneersullu amerlisarniarlugit suliniuteqaraluarluta sulisussaaleqisarpugut. Tamanna kinguarsaataavoq, siunissarlu ungasinnerusoq eqqarsaatigalugu tunisassiorsinnaassusitsinnut arriilisaataasinnaagami ernumanartoqarpoq, Sten Sørensen naggasiivoq.