Royal Greenland peqatigalugu nerisassianik allamiusoortunik misiliigit

Royal Greenland oktobarip 28-anni ”Nunatsinneersut allamiusut” qulequtaralugu Nuuk Nordisk Festivalimut peqataassaaq. Piffissami 16.00-miit 16.45 tungaanut Chilemiusut, Spaniamiusut, Norgemiusut, Englandimiusut, Japanimiusut, Kinamiusut Italiamiusullu nerisassiat Royal Greenlandip tunisassiaanik pingaarnertut akullit ooqattaarsinnaavatit.   

Royal Greenland ullumikkut 2.300-t missaannik amerlassusilinnik nunarsuarmi tamani sulisoqarpoq, taakkulu tamarmik nalitusaanermi periusitsinnut pingaaruteqarput. Tunisassiat tunineqariaannanngoraangata Royal Greenlandip tuniniaanermut immikkoortortai 15-it Asiami, Europami Amerikallu avannaani kujataanilu niuerfinnut tuniniaallutik aallartittarput.    

Royal Greenland ullumikkut nunani makkunani tuniniaanermut immikkoortortaqarpoq; USA, Chile, Kina, Japani, Tuluit Nunaat, Tysklandi, Frankrigi, Italia, Spania, Portugali, Sverige, Norge, Finlandi, Qallunaat Nunaat nunarpullu.

Eqqugassaq eqqoruk

Kalaaliminernik mamartunik eqquiniaatitsinermi makitsinissamut peqataarusukkuit, nerisassiat mamarinerpaasatit assileriarlugit facebookikkut imaluunniit instagramikkut ikkussissaatit, nerisassiallu suminngaanneernerat allariarlugu #NuukNordiskRG allallugu naggasiutigissavat.

Nuummiinngikkuit imaluunniit Nuuk Nordisk Festivalimut peqataasinnaanngikkuit eqquiniaatitsinermut peqataasinnaavutit. Facebookikkut qupperneq Royal Greenland.gl iserfigiinnassavat, ikkussaq likeriarlugu apeqqut una akissavat: Royal Greenlandip tuniniaanermut immikkoortortai nunarsuarmi qassiuppat? Oqaaseqarfissami akissutit allassavat, taava mamarunartunik eqquiniaatitsinermi makitsinissamut peqataassaatit.

Eqqugassaq 800 koruuninik nalilik makkuninnga imaqarpoq:

- Suluppaagaq – ilivitsoq niaquigaq
- Saattuat
- Saarulliit nerpii
- Japan raajat qalipallit aapasut
- Ammassaat
- Saarullik ilivitsoq
- Mattak
- Tamulugassat maskiinami panertitat
- Saarulliit maskiinami panertitat
- Kapisilik pujuugaq
- Aalisakkanik sampak

Makitsineq ataasinngornermi novembarip aallaqqaataanni 2021-mi pissaaq, Royal Greenlandillu facebookiatigut instagramiatigullu saqqummiunneqassaaq.