Royal Greenland UNLEASH-imut peqataavoq
Royal Greenlandip piujuartitsineq tunngavigalugu ineriartortitsinermi anguniakkaminut angorusutaminullu atatillugu, inuusuttut tallimat Nuummeersut, Paamiuneersut, Qasigiannguameersut Sisimiuneersullu UNLEASH-imut peqataatippai – suliniut nunani tamalaani atuullunilu nunarsuarmut tamarmut piujuartitsilluni ineriartortitsinissamut anguniakkat angunissaannut inuusuttunit suleqataaffiusoq.
Allattoq Pilunnguaq Egede-EnoksenUNLEASH-ip Innovation Labs 2017-imili Danmarkimi, Singaporemi Kinamilu ingerlattarpaa. Piujuartitsineq pillugu aaqqissuussaq annertooq sunniuteqarluartorlu ukioq manna, inuusuttut 200-t nunanit issittumeersut peqataasoralugit, Nuummi ingerlanneqarpoq.
Inuusuttut piginnaanillit inuiaqatigiinni aqutsinermi, ajornartorsiutinik aaqqiinermi aamma inunnik isumaginninnermi avatangiisinullu tunngasunik aaqqiissuteqarnermi peqataatillugit allannguinerit pitsaasut pilertortinnissaat UNLEASH-ip anguniagaraa.
Royal Greenlandip aaqqissuussaq aningaasaleeqataaffigalugulu inuusuttut piginnaanillit ulluinnarni Royal Greenlandimi sulisuusut peqataanissaannut toqqarpai. Inuusuttut peqataasut allat peqatigalugit isumassarsiatik ineriartortillugillu suliffeqarfiit kattuffiillu piviusunngortitseqataasinnaasut attaveqatigissavaat.
Royal Greenland soqutigineqarluarpoq
Suliffeqarfinnut takornariartoqassammat UNLEASH-imut peqataasut eqimattat pingasut Royal Greenlandimut takornariarput. Takornariarnerminni suliffeqarfik pillugu paasisaqarlutillu suliffeqarfiup piujuartitsinermi anguniagaat paasisaqarfigaat. Sulisut pingasut suliffeqarfik pillugu saqqummiillutillu apeqqutinut akissuteqartuupput.
- Peqataasut Royal Greenland soqutigisupilussuuaat. Piujuartitsineq tunngavigalugu qanoq aalisarlutalu tunisassiornersugut aamma ilinniagaqarneq sulinerlu pitsaasoq pillugit sunik suliniuteqarnersugut apersuutigaat, Royal Greenlandimi CSR-ilerinermi ingerlatsisoq Malik Hegelund Olsen oqarpoq.
Aningaasarsiorluarniaraanni inuiaqatigiinni aallussaqarfiusuni avatangiiseq inuiaqatigiillu aaqqissuussaanerat eriagineqartariaqarput, taamaalillunimi piujuartitsineq tunngavigalugu ineriartortitsisoqassaaq.
UNLEASH aggustip 20-anniit 27-iat ilanngullugu ingerlanneqarpoq.
