Avataq rekortileeqqipporngaasiit
Royal Greenlandip kilisaataa M/tr Avataq raajanik 1.000 tonsit sinnerlugit tulaassinermigut pingajussaanik rekortiliivoq.
Allattoq Inga Dora G. MarkussenVideo takuuk:
Time:
Qaammatip ataatsip missiliorlugu matuma siornatigut, Avataq Tordar Dimon naalakkatut aquttoralugu 25-nillu inuttaqarluni Nuummiit avalappoq. Taakku angalanerminni ilungersorlutik sulisimanerat maanna imminut akilerpoq. Kilisaat pingasunngornermi januaarip 12-anni Nuummi umiarsualivitoqqamut aatsaat taamak pisaqarsimatigaluni tulappoq.
- Nunap oqaluttuarisaanerani aatsaat siullerpaamik aallarnermi ataatsimi, raajanik 1.045 tonsinik umiarsuullu iluani suliarineqareernerisa kingorna 1.003 tonsinik oqimaassuseqalersunik aalisartoqarpoq, Royal Greenlandimi tunisassialerinermi ingerlatsisoq, Johan Berthelsen, tulluusimaarpalulluni oqaluttuarpoq.
Avataq pingajussaanik rekortiliivoq. Siullerpaamik maajip 18-anni 2020-mi aallarnermi ataatsimi raajanik 903 tonsinik usisimavoq. Aappassaanik aggustusip arfernganni 2020-mi usisat 24 tonsinik oqimaannerummata rekortiliineq qaangerneqarpoq, tassa imaappoq raajat 927 tonsit usisimavai. Rekortiliinerit allat ugguuna paasisaqarfigikkit.
Nuummut tikinnermi kilisaatip naalagaa Tordar Dimon, tunisassiorfimmi naalakkat aappaat Sebastian Bisgaard, tunisassiorfimmilu naalagaq siulleq Sámal Jákup Olsen, kiisalu igasoq Christian Nielsen.
Avatami naalakkat, Jógvan Tróndarson aamma Tordar Dimon, Avatap 1.000 tonsit sinnerlugit aalisarsinnaanngornissaanut piffissap apeqqutaaginnarnera taamanili oqaatigereerpaat. Tassami kilisaat 2.850 kubikmeterinik usisinnaassuseqarpoq, 82,3 meterisut takissuseqarlunilu 18 meterisut silissuseqarpoq, tamakkulu angalanermi ataatsimi taamak usisinnaassuseqalersitsipput. Ukiualuit matuma siornatigut kilisaat annerpaaq angalanermi ataatsimi 400-500 tonsit pallillugit pisaqarsinnaavoq.
- Aatsaat siullerpaamik aallarnermi ataatsimi, raajanik 1.045 tonsinik umiarsuullu iluani suliarineqareernerisa kingorna 1.003 tonsinik oqimaassuseqalersunik aalisartoqarpoq.
Umiarsuulli angissusaa matumani pingaaruteqartutuaanngilaq, inuttammi sullarissut inuttarinngikkaanni taamak pisaqarluartigisoqarsinnaanngilaq.
- Suliassaqarfinni tamani aalaakkaasunik inuttarissaarpugut, tamannalu sulinermik oqinnerulersitsivoq. Suliassaq kisimiillunga umiarsuarmillu aquttuullunga suliarisinnaanngilara. Inuttanuku pitsassuit nersualaagassaanerpaasut, kilisaatip naalagaa Tordar Dimon oqarpoq.
Inuttat ataatsimoortut
Maanna Avataq inuttat tullinnguuttut ikinnginneranni avalannginnermilu iluarsartugassat annikitsut isumagineqassammata usingiarneqaqqaassaaq. Takussavarpummi. Imaassinnaasoq rekortileeqqittut?
