Nutaaq pillugu paasissutissat: Suna eqqortuunersoq eqqortuunnginnersorlu paasikkit

Suliniut Nutaaq 2015-imi aallartinneqartoq maanna aasaanerani saarullinniartoqarnissaata qulakkeerneqarnissaanut pingaaruteqarluinnarpoq.

Suliniut Nutaaq eqqarsaatigalugu Royal Greenland aalisartut suleqatigalugit pitsaassutsimut akillu ineriartornerinut tunngatillugu iluatsilluartumik pilersitsipput.

Suliniut Nutaaq suleqataaffigineqarluartoq Royal Greenlandip takusinnaavaa, ukioq mannali aammaartumik paasissutissat kukkusut tamat akornanni siammarterneqarput. Taamaammat paasissutissanik perusuttunut katersinikuuvugut.

Royal Greenlandip sooq Nutaaq aallartippaa?

• Naatsumik oqaatigalugu pitsaassuseq qaffassarniarlugu. Kingumut qiviassagaanni aasaanerani saarullinniarnermi nerpiit pitsaassusaat appasissimavoq. Aalisakkat aasaanerani sinerissap qanittuanukaraangamik ilaatigut ammassattortarput, ammassattornerisalu aalisakkat nalinginnaasumik qeritinneqaraangata nerpii aqilluttunngortittarpai. Nerpiit pisisartut aatsikkaangasigit aqillulersimasarput.
  
  
• Royal Greenland suliniut Nutaaq sioqqullugu bundgarnersorluni saarullinniarnermi pitsaassuseq pillugu unammillernartoqangaatsiarpoq, tassami nerpiit pitsaassusaat appasillunilu aatsinneqaraangami aqillulertarmat pisisartunit nunanit tamalaaneersunit utertitat hunnorujulikkaat tiguneqartarsimapput.
  
  
• Suliniummi Nutaaq-mi saarulliit minnerpaamik ulluni 14-ini qassutini uumatitsivinniitinnerisigut aqajarua imaarneqarlunilu nerpia suikkaanerulertarmat ajornartorsiut tamanna aaqqiiffigineqarpoq.
  
  
• Suliniut Nutaaq ukiut arfineq-marluk matuma siorna aallartinneqarmalli Royal Greenland pisisartut utertitaannik ikinnerungaatsiartunik tigusaqartarpoq.
  
  
• Tamanna pisisoqarnerulerneranik minnerunngitsumillu akit aalisartunut inuiaqatigiinnullu iluaqutaasumik pitsanngoriarnerannik kinguneqarpoq.

Suliniummi Nutaaq-mi qassutit uumatitsiviit qassit aalisartut Royal Greenlandimiit noqqaassutigaat?

• Royal Greenlandip qassutit suliniummi Nurtaaq-mi atorneqartartut aalisartunut suliniummi suleqataarusuttunut akeqanngitsumik atukkiuttarpai. Aalisartut 100-t qassutit uumatitsiviit suliniummi Nutaaq-mi atorneqartut atorlugit aalisarput, Royal Greenlandillu qassutit uumatitsiviit 250-it ukioq manna atukkiuttussaavai.

Suliniutip Nutaap ingerlanneratigut aalisarpallaartoqarpa?

• Naagga, aasaanerani saarullinniarneq Naalakkersuisunit aqunneqarpoq, taakkulu pisassiissutit aalajangersartarpaat. Tamatuma kingorna aalisartut pisassiissutit tamakkerlugit aalisassaneraat apeqqutaavoq. Suliniut Nutaaq tonsinik qassinik aalisartoqarneranut sunniuteqanngilaq, illuatungaanilli aalisakkat akillu pitsaassusaannik qaffassaavoq.
  
  
• Aalisakkat minnerpaaffissatut aalajangiussamiit minnerit suli uumasut piiarneqartarmata suliniutip Nutaap ingerlanneratigut aalisarneq nungusaataannginneruvoq. Siornatigut aalisakkat pisarineqartut tamarmik qaqinneqarlutillu aalisakkat mikivallaat nammineq immamut igeqqinneqartarput, tamannalu aalisakkat toquinnartarnerannik kinguneqakkajuppoq.

Suliniummi Nutaaq-mi aalisagarpassuit toqusarpat?

• Naagga. Aalisakkat eqqunngitsumik passunneqaraangata aatsaat toqusoqartarpoq. Aalisartut qujanartumik pikkoreqaat, Royal Greenlandillu paasissutissaatai naapertorlugit aasaq tamaat qassutini uumatitsivinni arfineq-marlunni aalisakkat ilaat toqusimapput.

Sooq qaqutigooraluartumik aalisakkat toqorartarpat?

• Suliniummi Nutaaq-mi periutsit malinneqanngikkaangata aalisakkat toqorarsinnaasarput. Qassutit uumatitsiviit imarisinnaasaasa killissaat Royal Greenlandimiit ilisimatitsissutigineqarsimasoq qaangerlugu immerneqarsimappata imaluunniit qassutit uumatitsiviit kuuit imermik tarajoqanngitsumik kuuttut sumiiffiilluunniit immami tarajukitsumiittut nalaanni inissisimasimappata aalisakkat toqorarsinnaapput.

Aalisakkat qaqugukkut kimit akisussaaffigineqartarpat?

• Aalisartut qassutit uumatitsiviit imailu Royal Greenlandip tunisassiorfiisa ilaannut tulaanneqarnissaasa tungaanut akisussaaffigaat. Aalisartut Royal Greenlandip qassutaataannik uumatitsivinnik atorniartut tamarmik allakkiamik suliniummi Nutaaq-mi periutsinik ersarissumik nassuiaatilimmik atsiortarput.