M/tr Nataarnaq kiisami atertaarpoq

Umiarsuarmik atsiisup seqinnarissuugaa Sisimiuni umiarsualivimmut ornigussimasorpassuit saavanni tulluusimaarluni champagne umiarsuarmut erfagiuppaa.  

- Umiarsuarmik kusanartumik matuminnga atsiinera ataqqinaatitut isigalugulu siunissami pisaqarluarnissaanik kissaassivunga, atsiisoq Amalie Egede oqarpoq.

Ornigussimasunut atsiinerup kingorna Nataarnamut takornariartitsisoqarpoq, aammattaaq oqalugiartoqarlunilu, imeruersaateqarlunilu Royal Greenlandip nunatsinni tunisassianik tuniniaavianit ooqattaagassanik sassaallertoqarpoq.   

Atsiinissaq sikoqangaatsiarneranit kinguartinneqartoq

M/tr Nataarnap januaarimi 2022-mi atsernissaagalua Sisimiut eqqaanni sikup issuallaarnera peqqutaalluni kinguartittariaqarsimavoq. Taamaammat atsiinissap tungaanut aalisarluartoqalereersimavoq.

- M/tr Nataarnaq pisanik annertuunik tulaassillualereerlunilu naleqassutsiminik takutitsillualereerpoq. Eqqortumik aningaasaliisimanerput maanna takuneqarsinnaalereerpoq, Ove Rosing Olsen Ice Trawl Greenlandimi Royal Greenland peqatigalugu umiarsuarmik piginneqateqartumi siulittaasuusoq oqarpoq.  

Umiarsuup illoqarfimmi amutsiveqarfiusumi Bilbaomi Spaniap avannaaniittumi sananeqarnera 300 millioner koruuninik naleqarpoq. 

Royal Greenland nutaaliaanerusunik kilisaatitaassaaq

Suliniut Royal Greenlandip kilisaataataasa nutaaliaanerullutillu piujuartitsinermik tunngaveqarnerulernissaannik anguniagaqarnermut ilaavoq.

Umiarsuaq 82,3 miiterisut takissuseqarlunilu 18 miiterisut silissuseqarpoq. 2950 kubikmiiterinik usisinnaassuseqarnermigut sivisunermik avalaqqasinnaanngorluni, talittarnerit ikinnerullutillu akunnerit 24 ataallugit sivisussuseqarsinnaanngorput.

Inuttat 30-t inissaqarlutillu ataasiittarissanik ineeraqarpoq, aammattaaq timersortarfeqarlunilu pitsaasunik eqqumiitsuliortuniillu nunatsinneersunit kusassakkanik ataatsimoortarfeqarpoq.

Ice Trawl Greenland pillugu paasisaqarnerorusukkuit linki una toorlugu ingerlatseqatigiiffiup oqaluttuarisaaneranik atuakkiaq takusinnaavat.