Inuusuttut nunarsuarmi angalatittarpagut
Royal Greenlandimi piginnaasallit nunani tamalaani pissutsinut paasisimasaqassapput. Tamanna ilaatigut sulisut inuusuttut piginnaasallit nunarsuarmi angalatinnerisigut qulakkeerneqartarpoq.
Allattoq Pilunnguaq Egede-EnoksenNunarsuarmi angalaarnikkut suliffeqarfiup nunani tamalaani immikkoortortaqarnera paasisimasaqarfigineqalerlunilu piginnaasallit ineriartornissamut periarfissinneqartarput, Royal Greenlandimi sulisoqarnermut ingerlatsisoq isumaqarpoq.
Niuernermik Ilinniarfimmi AU-mi qaffasinnerusumik ilinniartut ukiut tamaasa nunatta avataani suliffimmik misiliinissaannik periarfissinneqartarnerisa saniatigut Royal Greenland suliffeqarfimmi pikkorissaaveqarpoq.
- Siammasinnerusumik paasisimasaqarnerulernissaat neriuutigaarput. Royal Greenland nunani tamalaani immikkoortortalittut tamakkiisumik qimerluussagaanni, nunarput immikkoortortatut mikivoq. Assersuutigalugu Svenstrupimi immikkoortortatsinni suliffimmik misiliinikkuinnaq suliffeqarfipput nunarsuarmi suliffeqarfittut siammasinnerusutut ilisimalerneqarsinnaavoq, suliffeqarfissuarmi sulisoqarnermut ingerlatsisoq Christian Laursen oqaluttuarpoq.
Suliniutit taakku sulisut sulisoriligassallu pikkorissut piginnaasaqalerlutillu sulisoriinnarnissaannik siuneqartaqarnertik assigiissutigaat.
Royal Greenlandimi ilinniartut marluugaangata agguaqatigiisillugu ataaseq ilinniareernerup kingorna suliffeqarfimmi atorfinittarpoq.
Avatangiisit nutaat
Royal Greenland suliffeqarfiup iluani sulisunut piginnaasalinnullu aalajangersimasunut tulluarsakkamik pikkorissaaveqarpoq. Sulisut taakku toqqakkat ilaanniippoq siornatigut naatsorsuuserisutut sulisimallunilu Royal Greenlandimi AU-tut ilinniartuunikoq, Miki Eriksen Jensen.
Miki ilinnialeqqammerpoq, tassungalu atatillugu Royal Greenlandip Svenstrupimi immikkoortortaani ilinniartassaaq.
- Ilinniagaq aallartitara nuannaralugulu naammassiguma kinguneqarluartumik tapertaasinnaanngornissara neriuutigaara. Avatangiisini nutaani sunik ilikkagaqarlungalu misigisaqarnissara pissanganarpoq.
Ilinniagaq Royal Greenlandip nunami tunisassiorfiini naatsorsuinermi suliassanut tunngatillugu aaqqiissuteqarnissamut piginnaasaniffiusussaq 2023-mi juunip qaammataa tikillugu ingerlassaaq.
Miki Eriksen Jensen
Royal Greenlandimi aalisarnerup, inussutissalerinerup, teknikkeqarnerup, aqutsinerup, assartugalerinerup allaffissornerullu iluani ilinniartoqarsinnaavoq.
Nunarsuarmi periarfissarpassuit
Royal Greenland nunarsuarmi sumiiffinni assigiinngitsuni tuniniaaveqarlunilu immikkoortortatut ingerlatseqatigiiffeqarpoq. AU-tut ilinniartuullunilu Canadami suliffimmik misiliisimasoq, Karla Jørgensen, oqaloqatigaarput.
- Canadami suliffimmik misiliineq soqutiginarsuaarlunilu nuanneqaaq. Peqqussuit uumatillugit tuniniarneqartarnerat inaarutaasumik misilitsissutissatut allaaseraara, tassungalu atatillugu Canadamiinnera ilikkagaqarnaqaaq.
Ilinniarnermik nunamilu allami misigisassarsiornermik tapertariisitsinissaq Karlamut aallaqqaammut nangiarsimasumut pikkunarsimavoq.
Royal Greenland nunatsinni, Canadami Europamilu 48-nik tunisassiorfeqarpoq.
- Aallaqqaammut pissangaqalungalu nunami allami najugaqaatigalunga sulisinnaassanerlunga qularigaluarpara. Sunaaffali angerlarsimasutut misigisimalerniartunga. Suleqatikka Canadameersut pitsaaqalutillu ikiuukkumatoqaat.
Karla Canadami suliffimmik misiliinerup saniatigut Svenstrupimi misiliisimavortaaq. Karlap ukioq manna nunat tamalaat akornanni niuernermi aamma ussassaarinermi qaffasissumik ilinniakkani angusarissaarluni naammassivaa. Ilinniartut allat nunarsuarmi misigisassarsiorlutillu periarfissarsiornissaannik kaammattorusuppai.
- Sulisugut angalallutilluunniit nunatta avataani atorfinikkaangamik suliffeqarfipput sinnerlugu avammut kiinnertussatut sinniisutulluunniit taaneqarsinnaalertarput. Tunisassiagummi nunatsinneersuupput, suliffeqarfissuarmi sulisoqarnermut ingerlatsisoq Christian Laursen naggasiivoq.
Karla Jørgensen
