Nipisanniarneq naammassilluarpoq
Nipisat suaat kiilut kingulliit naatsorsorneqarsimalerput, tulaanneqartullu 2023-mi annertusisimasut Royal Greenlandimit nuannaarutigalugu nalunaarutigisinnaavarput.
Aalisarfinni amerlanerni nipisanniarluartoqarpoq, Royal Greenlandilu nipisat suaannik ukiup siulianut sanilliullugu 2023-mi tigooqqaanerusinnaasimavoq.
Suuat tigoorarneqartut Royal Greenlandip oqaluttuarisaanerani annertunerpaat ilaanniipput. Taama nalunaarpoq Møller Lyberth, Royal Greenlandimi ingerlatsinermut aqutsisoq.
- Kingusinnerusukkut aallartikkaluarluta ingerlalluarpugut. Aalisartut taama amerlatigisut ulapaarfiup nalaani maanga tunisissallutik aalajangersimanerat nuannaarutigalugulu usorsisimaarutigaarput, Møller Lyberth oqarpoq.
Royal Greenland 983 tonsinik tigooraavoq, tigooqqakkallu ulapaarfiup aallartinnginnerani Royal Greenlandip tigooragassatut anguniagaanit 905 tonsiusunit annertunerupput.
Ineriartorneq naammagisimaarnartoq
Suaat annertussusaat 2022-mi tigoorarneqartunut sanilliullugit 168 tonsimik annertusipput.
- Tamakkiisumik isigalugu ineriartorneq naammagisimaarnarluinnarpoq, taamaalillutalu nutaanik atortutaarnissamut aningaasaliisimanerput immikkut akilersinnaasoq erserpoq. Taamatuttaaq ulapaarfiup tulliani ingerlalluarnerusinnaalluta paasivarput, Møller Lyberth oqarpoq.
Tunitsiviit pisariunnginnerusumik periuseqarlutik annertunerusunik tigooraasinnaanerinut Nuuk assersuutitsialaavoq. Tassani saarulliit 130 tonsit tigoorarnerisa saniatigut nipisat suaat 151 tonsit tigoorarneqarput.
Ulapaarfiup nalaani piffissap sivikitsup ingerlanerani ilaatigut annertuunik tulaassuisoqarpoq. Tamanna silaginneranik ukioq mannalu nipisaqarluarneranik ilaatigut peqquteqarsorineqarpoq.
- Tunitsivitsinnili ingerlalluarpugut, Møller Lyberth ilanngullugu oqarpoq.
Nipisat suaannik tigooraanerpaavoq
Ulapaarfiup nalaani 1.383 tonsit nuna tamakkerlugu tulaanneqarput. Aalisartut nipisat suaannik tunisissagaangata Royal Greenland tunitsivigiumaneqarnerusimavoq.
Royal Greenlandip tulaanneqartut 71 procentiisa missai tigooqqarai sinneri ingerlatseqatigiiffiit allat agguataarlugit tigooqqarpaat.
- Tamanna soorunami tulluusimaarutigingaarparput, pilersuisutsinnillu ulapaarfiup nalaani suleqateqarluarsimanerput pillugu qujavugut, Møller Lyberth oqaluttuarpoq.
Aalisartut nipisat suaannik (piffissami apriilip 18-ianiit juunip 1-ianut) Royal Greenlandimut tunisisimasut agguaqatigiissillugu isertaat 69.000 koruuniupput. Aalisartut tunisinerpaat qulit piffissami pineqartumi agguaqatigiissillugu 251.000 kr.-inik isertitaqarput. Aalisartup ataatsip tunisaqarnermini isertai annertunerpaat 304.000 kr.-iupput.
