Nutaaq pillugu apeqqutit akissutillu

Sooq Royal Greenlandip Nutaaq aallartippaa?

• Naatsumik oqaatigalugu pitsaassuseq qaffassarniarlugu. Kingumut qiviassagaanni aasaanerani saarullinniarnermi nerpiit pitsaassusaat appasissimavoq. Aalisakkat aasaanerani sinerissap qanittuanukaraangamik ilaatigut ammassattortarput, ammassattornerisalu aalisakkat nalinginnaasumik qeritinneqaraangata nerpii aqilluttunngortittarpai. Nerpiit pisisartut aatsikkaangasigit aqillulersimasarput.
  
  
• Suliniummi Nutaaq-mi saarulliit minnerpaamik ulluni 14-ini qassutini uumatitsivinniitinnerisigut aqajarua imaarneqarlunilu nerpia suikkaanerulertarmat ajornartorsiut tamanna aaqqiiffigineqarpoq.
  
  
• Tamanna pisisoqarnerulerneranik minnerunngitsumillu akit aalisartunut inuiaqatigiinnullu iluaqutaasumik pitsanngoriarnerannik kinguneqarpoq. Nutaaq pillugu suliniuteqangaatsiarneq pissutigalugu saarullik tunisassiatut immikkoortukkaatut siorna sinneqartooruteqarfiusoq assersuutigineqarsinnaavoq.

Kina suliniummut Nutaaq-mut ilaasinnaava?

• Royal Greenland qassutinik uumatitsivinnik aalisartunut kikkunnulluunniit suliniummi peqataarusuttunut akeqanngitsumik atukkiussisarpoq.
  
  
• Angallat uumatitsivik Tuneq atorlugu sineriak Kangaatsiamiit Paamiut tikillugit isorartutigisoq tikissinnaallugulu saarulliit qassutini uumatitsivinniittut tunisassiorfimmut Maniitsumiittumukaattarpagut. Saarulliilli minnerpaamik ulluni 14-ini qassutini uumatitsivinneereeraangata aalisartut nammineerlutik tunisassiorfimmut aamma tulaassinnaavaat.

Suliniutip Nutaap ingerlanneratigut aalisarpallaartoqarpa?

• Naagga, aasaanerani saarullinniarneq Naalakkersuisunit aqunneqarpoq, taakkulu pisassiissutit aalajangersartarpaat. Tamatuma kingorna aalisartut pisassiissutit tamakkerlugit aalisassaneraat apeqqutaavoq. Suliniut Nutaaq tonsinik qassinik aalisartoqarneranut sunniuteqanngilaq, illuatungaanilli aalisakkat akillu pitsaassusaannik qaffassaavoq.
• Aalisakkat minnerpaaffissatut aalajangiussamiit minnerit suli uumasut piiarneqartarmata suliniutip Nutaap ingerlanneratigut aalisarneq nungusaataannginneruvoq. Siornatigut aalisakkat pisarineqartut tamarmik qaqinneqarlutillu aalisakkat mikivallaat nammineq immamut igeqqinneqartarput, tamannalu aalisakkat toquinnartarnerannik kinguneqakkajuppoq.

Suliniummi Nutaaq-mi aalisagarpassuit toqusarpat?

• Naagga. Aalisakkat eqqunngitsumik passunneqaraangata aatsaat toqusoqartarpoq. Aalisartut qujanartumik pikkoreqaat, Royal Greenlandillu paasissutissaatai naapertorlugit aasaq tamaat qassutini uumatitsivinni arfineq-marlunni aalisakkat ilaat toqusimapput.

Sooq qaqutigooraluartumik aalisakkat toqorartarpat?

• Suliniummi Nutaaq-mi periutsit malinneqanngikkaangata aalisakkat toqorarsinnaasarput. Qassutit uumatitsiviit imarisinnaasaasa killissaat Royal Greenlandimiit ilisimatitsissutigineqarsimasoq qaangerlugu immerneqarsimappata imaluunniit qassutit uumatitsiviit kuuit imermik tarajoqanngitsumik kuuttut sumiiffiilluunniit immami tarajukitsumiittut nalaanni inissisimasimappata aalisakkat toqorarsinnaapput.

Aalisakkat qaqugukkut kimit akisussaaffigineqartarpat?

• Aalisartut qassutit uumatitsiviit imaalu Royal Greenlandip tunisassiorfiisa ilaannut tulaanneqarnissaasa tungaanut akisussaaffigaat. Aalisartut Royal Greenlandip qassutaataannik uumatitsivinnik atorniartut tamarmik allakkiamik suliniummi Nutaaq-mi periutsinik ersarissumik nassuiaatilimmik atsiortarput.