Suliffimmi avatangiisit
Sulisut tamarmik suliffimmi avatangiisinik isumannaatsunik peqqinnartunillu neqeroorfigineqarsinnaanissaat kissaatigaarput
Royal Greenlandimi sulisut tamarmik tulluusimaarlutik sulisarniassammata suliffimmi avatangiisinik isumannaatsunik peqqinnartunillu pilersitseqataajumavugut.
Nalorninartut periarfissallu
Aalisarnermik inuuniuteqarneq ilaatigut timimut oqimaassinnaavoq. Soorlu aalisakkanik kipparissunngorlugit qerititanik kivitsineq, nerpinngorlugit tunisassiorfimmi sulineq, karsinik nuussuineq aamma aalisarnermi kilisaatinik qaqitsinermi. Tamatuma qaavatigut nerpilerinermi savinnik ipittunik atuineq.
Nunami immamilu suliffik pillugu naliliinerit, APV, inatsisitigut piumasaqaataasut ukiorpaalunngortuni ingerlanneqartarput. Sulinermi atukkatigut isorisassat paasineqarput, taakkunanngalu isornarnerpaat tassaallutik tunisassiorfinni sulinermi avatangiisit (i) oqimaatsunik kivitsinerit, (ii) nillertut suertullu kiisalu (iii) natit quasartut.
Suliffeqarfissuarmi sulinermi avatangiisitigut periutsit pingaarnerit ajornaatsullu nassuiaatigineqarnerat malillugu aaqqissuulluakkamik periuseqarnikkut sulinermi avatangiisit assigiissitaartumik pitsaasumillu siuarsarneqarsinnaalluarput. Tassuunakkut suleriutsit assigiiaartut sakkussallu najukkanut naleqqussarneqarsinnaasut suliarineqassapput. Ingerlatseqatigiiffik akimorlugu ersarissumik paasinarlunilu assigiimmik periuseqarnissaq qulakkeerneqassaaq.
2022-mi iliuutsit inernerillu
Piffissami tamakkiisumi sulisut naapertorlugit ajoqusertut amerlassusaat 2022-mi apparpoq. Tamanna naammagisimaarnarlunilu suliffimmi avatangiisit ukiuni kingullerni ukkatarineqarnerunerisa iluaqutaasimaneranik ersersitsivoq.
Sulinermi ajutoornernik nalunaaruteqartarnerit ersersippaat ajutoornerit amerlanerpaartaat tunisassiorfinni angallatinilu quasartunik maniilasunillu nateqarneq peqqutigalugu orlunerit imaluunniit nakkarnerit pisartut. Saviit atortullu innaallagiatortuunngitsut ajutoornernut arlalinnut peqqutaasarput, aammattaaq atortunik nakkartoqartillugu putukkukkut allatigulluunniit nakkarfigitinnerit ilaapput. Tunisassiorfinni nunamiittuni oqimaatsunik kivitsinerit ajornartorsiutinut ilaapputtaaq.
Suliffik pillugu naliliineq
Nunatsinni tunisassiorfinni tunitsivinnilu suliffimmik naliliinerit 2022-mi ingerlanneqarput.
Sulinermi timikkut atukkanut tunngatillugu illup iluani silaannaq, nipeqassuseq, natit quasartut maniilakuluttullu aammattaaq oqimaatsunik kivitsinerit pingaarnertut sammineqarput.
Sulinermi tarnikkut atukkanut tunngatillugu inuit ikittut pimmatiginninneq kiisalu kissaatiginngisamik kinguaassiornermut tunngasumik pissusilersornerit pillugit ajornartorsiutit uparuarpaat. Sammisanut tamanut tunngatillugu najukkami, isumannaallisaanermut ataatsimiititaliarsuarmi kiisalu Sulisoqarnermut Immikkoortortami sulinermi avatangiisilerisuni iliuusissiortoqartarpoq.
2019-2022-mut anguniakkat piviusunngortitsinerillu
Anguniakkat:
- Suliffimmi avatangiisinik aqutsinermut periutsimik paasiuminartumik ingerlalluartumillu silatikkut atukkanut naapertuuttumik pilersitsineq
Anguniakkanik naammassinninneq:
Pitsaassutsimut, sulinermi atukkanut avatangiisinullu (QEHS) nakkutilliinermut suleriaatsimik ataatsimoorussamik pilersitsinissaq nunatsinni, Tysklandimi Canadamilu sulissutigineqarpoq. Nakkutilleeriaaseq pitsaanerpaaq nassaariniarlugu ujaasisoqaleruttorpoq. Taamaammat suliffeqarfissuarmi nakkutilliinermi suleriaatsimik ineriartortitsineq suli angunngilarput, taamaattorli 2023-ip ingerlanerani angunissaa naatsorsuutigaarput.
Anguniakkap angunissaanut isumannaallisaaniaqatigiit suliffimmilu avatangiisilerisut pioreersut inerisarlugillu attannissaat sulissutigineqangaatsiarsimavoq. Taamaammat ukiuni kingullerni nunatsinni suliassaqarfimmut tassunga suliaqartussanik ilaterisoqarneratigut nuna tamakkerlugu najukkanilu suliniarneq patajaannerulerpoq.
Royal Greenlandip iluani sulisut tamarmik pisinnaatitaaffiit suliffeqarfimmilu periutsit pillugit ilisimatinneqartussaapput. Tamanna allaffinni tunisassiorfinnilu sulilersunut tamanut ileqqorissaarnissamut najoqqutassiamik tunniussinikkut pisarpoq. Sulisup ileqqorissaarnissamut najoqqutassiamik unioqqutitsisoqarsimanera paasippagu, maalaaruteqarnissamut najoqqutassaq malillugu aqutsisoq qaninnerpaaq imaluunniit Sulisoqarnermut Immikkoortortaq maalaarummik tigusaqassaaq.
Suliani ilungersunarnerusuni nittartakkatigut whistleblowereqarnermut aaqqissuussaq suliffeqarfiup avataaniittoq aqqutigalugu maalaaruteqartoqarsinnaavoq, matumanilu akerliliisoqarsinnaallunilu sulisutut illersugaaneq qulakkeerneqassaaq.
Suliffimmi tarnikkut atugassarititaasut pillugit suleqatigiissitanik najukkani aalajangersimasuni suleqat pisariaqartitsippat oqaloqatiginnissinnaanissaa qulakkeerumallugu saaffissanik ilinniartitsisoqarnissaq anguniarlugu suleqatigiissitanik pilersitsisoqarpoq. Unammillernartoq pillugu piginnaasanik allanik pisariaqartitsisoqarpat aqutsisoq Sulisoqarnermullu Immikkoortortaq ikiortigineqarsinnaavoq.
2030-mut angorusutat:
- Ingerlatseqatigiiffimmi tamarmi suliffimmi avatangiisit avatangiiserlu pillugit aqutsinermut periutsimik nalimmassakkamik tamakkiisumik atuutsitsilerneq
